Read Sembeleke 1 Kotindi 1 Bible Online

1 Kotindi 1 - Sembeleke bible

1 Kotindi 1

¹Koda꞉ma꞉ ipika꞉ hone pa꞉la꞉eki pitolo hata꞉ I̱ta꞉ Yesu Ketisona꞉ aposolo hali hano la꞉la꞉me. I̱ Poloma꞉ make nika꞉ kame Sosenisima꞉ make dikana꞉ma꞉ tapaasopa꞉ wape doe.

²Iki Kotindi daoni pa꞉ta꞉ haleme Koda꞉na꞉ siosi wanda꞉hali pa꞉ta꞉ wape polo pi doe. Koda꞉ma꞉ ikita꞉ ipika꞉ yakopiki wanda꞉hali hamina꞉ wi la꞉la꞉me. Iki mo Yesu Ketiso yaapo ta꞉ma꞉ni pea hata꞉ Koda꞉na꞉eki haleme wanda꞉hali pa꞉ta꞉ loa꞉me. Kutupa mo kenke paeyao pa꞉ta꞉ hata꞉ nika꞉ Tekehali make ika꞉ Tekehali Yesu Ketisona꞉ biki wi aleme wanda꞉hali make iki paeyao pa꞉ta꞉ wape polo pi doe.

³Nika꞉ Apa꞉ Koda꞉ma꞉ pita꞉ Tekehali Yesu Ketiso yaapoma꞉ iki pa꞉ta꞉ pa hameke a꞉ta꞉ma꞉ homolo hata꞉ ika꞉ puki lopa꞉niawaena꞉e laa alopa꞉me. Ketiso yaapo ta꞉ma꞉ni pea hamono Koda꞉ma꞉ niki epeala꞉ ekimanu

⁴Koda꞉ma꞉ iki pa꞉ta꞉ mo Yesu Ketiso pa꞉ta꞉ yama꞉ pa a꞉ta꞉ma꞉ homa tamba꞉ mina꞉la꞉eki handolo hata꞉ I̱ma꞉ ipiki pa꞉ta꞉ keiyae pi lo halome.

⁵Ikana꞉ma꞉ Ketiso yaapo ta꞉ma꞉ni pea hata꞉ ala꞉ta꞉ ala꞉ta꞉ paeyaoma꞉ hamoko halememe. Pi alemeeki paeyao make hone witelemeeki paeyao make apa꞉taaso hata꞉ paeyaona꞉ hamoko halememe.

⁶Hande Ketisona꞉ pita꞉ ikana꞉ma꞉ wopu da̱o̱la miniki halememe. Kutupa ikana꞉ma꞉ mo nika꞉ Tekehali Yesu Ketiso peneme yaena꞉yeke handeteke hata꞉ mo Koda꞉na꞉ epeaasa꞉eki ma꞉nda꞉ na mina꞉pa꞉lalememe.

⁸Kutupa ame kini pua pea pa mo paelo pa꞉la꞉ Natena꞉ epena꞉ kone Koda꞉ma꞉ iki wopu da̱o̱la haatiki puemena꞉ la꞉tiki pu halieke. Koto mo nika꞉ Tekehali Yesu Ketisona꞉ Natena꞉ iki pa꞉ta꞉ eki hau ma꞉nda꞉ na handa꞉ wilieke loa꞉me.

⁹Mo Yesu Ketiso nika꞉ Tekehali yaapo ta꞉ma꞉ni puemena꞉ yeke wi la꞉la꞉ Koda꞉ma꞉ta꞉ ipika꞉ la꞉ ula꞉ pimanu na tunkuliki ota꞉ pilieke. Ipiki pa꞉ta꞉ hone tulaapa꞉peke ya꞉la꞉me. Siosi wanda꞉hali ka꞉taalualu pea haemekeeki

¹⁰Kametonuo. Nika꞉ Tekehali Yesu Ketisona꞉ bikina꞉ ikana꞉ma꞉ do haumanu puemena꞉ do honke alome. Ka꞉ta꞉ alualu pea na hake pi homekena꞉ kake mandakena꞉ wia hapa꞉peke. Kutupa make homeke hone wiata꞉ homeke hau puluekema꞉ iki paeyao ota꞉ tunao hapa꞉peke.

¹¹Kametitio. Iki pa꞉ta꞉ Kolauna꞉ tapakema꞉ la kimieki loa꞉me. Paeyaoma꞉ ape ape lo halememe leme ekina꞉ loa꞉me.

¹²I̱ma꞉ta꞉ do ekina꞉ alome. Iki paeyao homeke homekema꞉ la la pu alota꞉ I̱ta꞉ Polona꞉ halie o I̱ta꞉ Apolosina꞉ halie o I̱ta꞉ Pidana꞉ halie o I̱ta꞉ Ketisona꞉ halie laa la alualu pitelememe.

¹³Ketisota꞉ tunkula꞉ alualu pea halemekea. Mo hande a꞉ka꞉tei wape piki tina꞉ iki pa꞉ta꞉ Polo mea pua endiaemekepe. Polona꞉ bikina꞉ bapitaisi pimipe.

¹⁴Iki paeyao bapitaisi na puake pa Kitisipusi pita꞉ Kaiasi yaapo homeke peaowa꞉ ekina꞉ Koda꞉ pa꞉ta꞉ keiyae pi alome.

¹⁵Kutu pua꞉ ekita꞉ ma꞉nda꞉ma꞉ Polona꞉ bikina꞉ I̱ bapitaisi peaeya꞉me laama꞉na꞉yeke loa꞉me.

¹⁶Kutupa make mo hande Sitepanisi ipika꞉ weki wanda꞉ ame̱le̱ iki bapitaisi peaowa꞉pate pa mandane wanda꞉hali bapitaisi peaowa꞉ ekita꞉ I̱ma꞉ hone na witolome.

¹⁷Ketisoma꞉ I̱ma꞉ wanda꞉hali bapitaisi pealuekema꞉ na tapaeya꞉pate hande Pi Seliapo walonoyeke tapaeya꞉me. Kutupa mo hande a꞉ka꞉tei wape piki tina꞉ Ketiso endiaemeke ekina꞉ pi manu ula꞉ wele pita꞉la꞉ ekita꞉ pa tunkulaama꞉na꞉ I̱ma꞉ta꞉ hande Pi Seliapota꞉ mo kenke haliwekima꞉ hone witeleme tupa꞉ walonoyeke I̱ na tapaeya꞉me. Ketisota꞉ Koda꞉na꞉ wele pita꞉la꞉eki pita꞉ hone wotu wita꞉la꞉eki yaapo

¹⁸Hoke hauna꞉ alupulu pa꞉la꞉ wanda꞉halima꞉ta꞉ hande a꞉ka꞉tei wape piki tina꞉ endiaemeke pi pa꞉ta꞉ta꞉ Pa ekie alemepate pa Koda꞉ma꞉ mea da꞉taasa꞉ wanda꞉halima꞉ta꞉ do pi pa꞉ta꞉ta꞉ Koda꞉na꞉ wele pita꞉la꞉ ekie aloma꞉me.

¹⁹Pa ekipeke mo Baibolo buka pa꞉ta꞉ do wape pa꞉la꞉eki ula꞉me.Mo hone wotu witeme haliwekina꞉ hone wotu witeme ekita꞉ hoeyaalueke.Kutupa mo wape pa꞉la꞉eki wotu handeleme haliwekina꞉ handeleme ekimanu make tea꞉ nane mea wina꞉ lolueke laa wape pa꞉la꞉me.

²⁰Koto ekina꞉ mo hande hone wotu witeme haliwekita꞉ ekipape o mo hande wape pa꞉la꞉eki wopu handeleme haliwekita꞉ ekipape o do kenkena꞉ mo pi hotia꞉la꞉meeki wotu handeleme haliwekita꞉ ekipape. Koda꞉ma꞉ walolota꞉ Do kenkena꞉ hone wotu wita꞉la꞉ ekita꞉ Pa alee laa wala꞉leke handa loa꞉me.

²¹Koda꞉ma꞉ ipika꞉ hone wotu wita꞉la꞉ ekima꞉ta꞉ do kenkena꞉ hone wotu witeleme wanda꞉halima꞉ ipiki handaapa꞉na꞉ yeke sa꞉sa꞉ piekeme. Kutupa mo wanda꞉halima꞉ do nikana꞉ma꞉ walo haloma꞉ pi pa꞉ta꞉ Pa ekie alemepate pa mo opiteleme wanda꞉halita꞉ Koda꞉ma꞉ mea da꞉taasa꞉me.

²²Mo Diu wanda꞉halima꞉ Na hando haloma꞉eki handoma꞉ka꞉na꞉ta꞉ kota꞉ opulumeke laa alememe. Kutupa hande Kitiki wanda꞉halima꞉ta꞉ hone wotu witemeeki weitelememe.

²³Kutu pelemepateta꞉ nikana꞉ma꞉ hande a꞉ka꞉tei wape piki tina꞉ Ketiso endiaemekeme laa pi walo haloma꞉me. Do waloma꞉ pina꞉ta꞉ mo Diu wanda꞉halima꞉ta꞉ ya handa꞉olu bepi pu halememe. Kutupa mo Kitiki wanda꞉halima꞉ta꞉ Pa ekie lo halememe.

²⁴Koto lo halemepate pa mo hande Koda꞉ma꞉ wi la ma꞉la꞉ Diu wanda꞉hali make Diendaili wanda꞉hali make koto wanda꞉halima꞉ do pina꞉ Ketisota꞉ Koda꞉na꞉ wele pita꞉la꞉eki pita꞉ hone wotu wita꞉la꞉eki yaapo hala꞉me lo haloma꞉me.

²⁵Koto ekina꞉ kenke haliwekima꞉ta꞉ Koda꞉na꞉ hone wotu wita꞉la꞉eki manuta꞉ Pa ekie alemepate pa Koda꞉ma꞉ ipika꞉ hone wita꞉la꞉ ekima꞉ta꞉ mo kenke haliwekina꞉eki lu ankulala꞉me. Kutupa make mo kenke haliwekima꞉ta꞉ Koda꞉na꞉ wele pita꞉la꞉ ekita꞉ damako pupa ula꞉ ekie alemepate pa mo Koda꞉na꞉ wele pita꞉la꞉ ekima꞉ta꞉ mo kenke haliwekina꞉eki lu ankulala꞉me.

²⁶Kametitio. Koda꞉ma꞉ iki wi lea꞉ dina꞉ta꞉ ika꞉ haeme ekita꞉ hone wia꞉pa꞉peke. Mo kenke haliwekima꞉ handeleme ekina꞉ta꞉ ikita꞉ pa peao paeyao hone wopu wiki haliweki na haememe.

²⁷Koda꞉ma꞉ mo hone wotu wiki haliweki yaala꞉ mea peaaluekema꞉ ika꞉ pa pi aleme ekimanu ipikana꞉ma꞉ ka꞉na꞉ hone wia miekeme. Kutupa make mo hamoko haliweki yaala꞉ mea peaaluekema꞉ mo ikana꞉ma꞉ damakopiki ekie alemeeki kone ipikana꞉ma꞉ ka꞉na꞉ hone wia miekeme.

²⁸Koda꞉ma꞉ta꞉ mo kenke wanda꞉halina꞉ tumiki haumanu hoeyaaluekema꞉ ikana꞉ma꞉ handa꞉niaasemeeki make pa alemanue laa hone witelemeeki make ipikana꞉ma꞉ ka꞉na꞉ hone wia miekeme.

²⁹Koto mo hali homeke a꞉nda꞉ma꞉ Koda꞉na꞉ leke popelekena꞉ hata꞉ ipika꞉ hakoko na lina꞉yeke Koda꞉ma꞉ kutu piekeme.

³⁰Koda꞉ma꞉ iki mea Yesu Ketiso yaapo ta꞉ma꞉ni peala꞉me. Kutupa ipikana꞉ma꞉ Ketisota꞉ nika꞉ hone wopu wita꞉la꞉eki haena꞉ la꞉la꞉me. Kutupa make Ketisoma꞉ nikita꞉ Koda꞉ yaapo tikitiki yao hamono laata꞉ nikita꞉ yakopiki wanda꞉hali hamono la꞉la꞉me. Kutupa ipikana꞉ma꞉ make niki pa ka꞉la꞉pa꞉ tapaala꞉me.

³¹Kutu pieke handaa mo Baibolo bukana꞉ wape pa꞉la꞉ pea꞉pekeeki ma꞉nda꞉ dupa Hali epima꞉ hakoko luekema꞉ hone wia꞉ka꞉na꞉ta꞉ Tekehalima꞉ peaala꞉ ekimanu hone witolo hata꞉ ipika꞉ hakoko lia꞉peke yelieke wape pa꞉la꞉me.