Read Sembeleke 1 Kotindi 11 Bible Online

1 Kotindi 11 - Sembeleke bible

1 Kotindi 11

¹Koto ekina꞉ I̱ma꞉ Ketisona꞉ hau moka꞉la hando halo tupa꞉ ikana꞉ma꞉ make I̱ma꞉ pitoloeki kone moka꞉la hando hapa꞉peke. You a꞉mbao pita꞉ yeni pita꞉la꞉eki

²Ikana꞉ma꞉ hoto paeyao I̱ pa꞉ta꞉ hone wiata꞉ I̱ma꞉ iki pa꞉ta꞉ walolo ekimanu pu haleme ekina꞉ta꞉ I̱ma꞉ iki pi laasome.

³Koto pa꞉la꞉pate do alo pita꞉ wotu opua꞉pa꞉peke. Haliweki paeyao pa꞉ta꞉ Ketisota꞉ you hala꞉me. Kutupa ipika꞉ wanda꞉na꞉ youta꞉ haliki hala꞉me. Kutupa Ketisona꞉ youta꞉ Koda꞉ hala꞉me.

⁴Koto ekina꞉ hali homeke a꞉nda꞉ma꞉ta꞉ wanda꞉hali ame̱le̱ hata꞉ ipika꞉ you aka꞉ pambao pi wala o yeni pia꞉ka꞉na꞉ta꞉ kota꞉ Ketiso pa꞉ta꞉ yaala꞉ma꞉ homaasa꞉me.

⁵Kutupa make wanda꞉ homeke a꞉nda꞉ma꞉ wanda꞉hali ame̱le̱ hata꞉ ipika꞉ you aka꞉ na dopuaake pi wala o yeni pia꞉ka꞉na꞉ta꞉ kota꞉ ipika꞉ haliki pa꞉ta꞉ yaala꞉ma꞉ homaasa꞉me. Kutu piki wanda꞉ta꞉ mo you itiki makole mea bao hala꞉ wanda꞉ma꞉ handa꞉la꞉me.

⁶Dupiki wanda꞉ma꞉ta꞉ ipika꞉ you aka꞉ na dopua꞉ka꞉na꞉ta꞉ kota꞉ ipika꞉ itiki paeyao makole mea baapeke alee. Kutupa wanda꞉ma꞉ta꞉ you itiki makole mea baasa꞉ ekima꞉ make itiki tunkula꞉la꞉ ekima꞉ make yaala꞉ma꞉ homa꞉la꞉ hau ya꞉leka꞉na꞉ta꞉ kota꞉ aka꞉ dopua hapeke alee.

⁷Halima꞉ta꞉ you aka꞉ na pambao halieke. Pa ekipeke ipikita꞉ Koda꞉na꞉ biki ula꞉ ekina꞉ pita꞉ wele pikieki yaapona꞉ su̱a̱su̱a̱ wala꞉la꞉me. Koto pa꞉la꞉pate wanda꞉ma꞉ta꞉ ipika꞉ halina꞉ biki ula꞉ ekina꞉ pita꞉ wele pikieki yaapona꞉ su̱a̱su̱a̱ wala꞉la꞉me.

⁸Do ekina꞉yeke loa꞉me. Koda꞉ma꞉ hali wepitolota꞉ wanda꞉na꞉ loke pa꞉ta꞉ mea na wepia haena꞉ leekepate pa wanda꞉ta꞉ halina꞉ loke pa꞉ta꞉ mea wepia haena꞉ leekeme.

⁹Kutupa make Koda꞉ma꞉ta꞉ wanda꞉ hone witolo hata꞉ halima꞉ tamba꞉ mina꞉yeke na wepia haena꞉ leekepate pa mo hali hone witolo hata꞉ wanda꞉ma꞉ tamba꞉ mina꞉yeke wepia haena꞉ leekeme.

¹⁰Koto ekina꞉ta꞉ mo enisolo tonuma꞉ hala꞉ ekina꞉ wanda꞉ma꞉ta꞉ ipika꞉ haliki pa꞉ta꞉ homu pea hala꞉ ekina꞉ tombo walolo ipika꞉ you aka꞉ dopua꞉peke ya꞉la꞉me.

¹¹Do pimanu alopate pa ameta꞉ niki paeyao Tekehali ame̱le̱ ta꞉ma꞉ni pea hata꞉ta꞉ wanda꞉ hali yaapoma꞉ tamba꞉ mu alualu pitolo hata꞉ hapeke ya꞉la꞉me.

¹²Pa ekipeke wanda꞉ta꞉ halina꞉ loke pa꞉ta꞉ mea wepia haena꞉ leekepate ameta꞉ halita꞉ wanda꞉na꞉ loke pa꞉ta꞉ kini pea ipula꞉me. Kutupa ala꞉ta꞉ ala꞉ta꞉ paeyaona꞉ hala꞉ ekina꞉ teketa꞉ Koda꞉ hala꞉me.

¹³Ikana꞉ma꞉ kone hone wia꞉pa꞉peke. Wanda꞉ homeke a꞉nda꞉ma꞉ pa wanda꞉hali paeyao ame̱le̱ hata꞉ you aka꞉ na dopiki pa yeni pia꞉ka꞉na꞉ta꞉ kota꞉ koto hauta꞉ ti pa꞉la꞉pe.

¹⁴Mo nika꞉ kenkena꞉ haloma꞉ hauma꞉ kone niki manda꞉ meaasa꞉eki dupa. Haliwekima꞉ta꞉ hokulupeke itiki haena꞉ lea꞉ka꞉na꞉ta꞉ kota꞉ kotota꞉ yaala꞉piki haue.

¹⁵Pate mo wanda꞉na꞉ hokulupeke itikita꞉ ipika꞉ au la꞉la꞉ ekie. Ipika꞉ itiki hokulupeke ekima꞉ta꞉ ipika꞉ you a꞉mbaasa꞉ ekina꞉yeke loa꞉me.

¹⁶Koto pa꞉la꞉pate pa hali ma꞉nda꞉ma꞉ do aloeki manuna꞉ ape loluekema꞉ hone wia꞉ka꞉na꞉ta꞉ kota꞉ I̱ma꞉ta꞉ dupiki pi homeke lolueke. Nikana꞉ma꞉ make mo Koda꞉na꞉ siosi tapake paeyao make hau ma꞉nda꞉ na handeke pa I̱ma꞉ do aloeki homeke pu haloma꞉me. Mo hande Tekehalina꞉ ne nala꞉eki

¹⁷Mo mana꞉ pimanu ame do lolo polo ekina꞉ta꞉ ika꞉ pu haleme ekina꞉ ika꞉ pi na laalueke. Ikana꞉ma꞉ yeni puluekema꞉ mo ika꞉ momba꞉la꞉eki manuma꞉ta꞉ iki na epeaasa꞉pate pa hokeeki kone ipula꞉ ekina꞉ loa꞉me.

¹⁸I̱ma꞉ mandane opitoloeki dupa. Ikana꞉ma꞉ yeni puluekema꞉ momba꞉la hata꞉ kone tekilipa ta꞉ta꞉ ta꞉ta꞉ pea halememe laa alemeeki opitolo hata꞉ mandaneeki ota꞉ ekie hone witolome.

¹⁹Kutupa make mo mandane tekilipa ta꞉ta꞉ ta꞉ta꞉ pea halemeeki manuta꞉ ota꞉ hau piteleme wanda꞉hali peneme yaluekema꞉ pea꞉peke ya꞉la꞉ haue laa loa꞉me.

²⁰Kutu piteleme hauma꞉ta꞉ ikana꞉ma꞉ homeke pa꞉ta꞉ momba꞉la hata꞉ mo Tekehalina꞉ ne nala꞉ ekita꞉ ota꞉ na nalememe.

²¹Do ekina꞉yeke loa꞉me. Iki homeke homeke loma꞉ ika꞉ ne kone a̱i̱ nolueke laa pitolo hamina꞉ kone mo some homeke ma꞉nda꞉ tea꞉ma꞉ homa haena꞉ laata꞉ ma꞉nda꞉ma꞉ta꞉ hoke ikali naa keaasa꞉me.

²²Ika꞉ da pa꞉ta꞉manu pita꞉ kone ika꞉ ne ikali napeke na ya꞉la꞉pe. Kutupa Koda꞉na꞉ siosita꞉ Pa ekie laata꞉ mo natehali wanda꞉hali make yaala꞉ma꞉ homaaluekema꞉ pitelemepe. Iki pa꞉ta꞉ eki pi lonope. Kutu piteleme ekina꞉ta꞉ ika꞉ pi laanope. Dia꞉me ika꞉ pi laapeke na ya꞉la꞉me.

²³I̱ma꞉ hande waloa꞉ ekita꞉ mo Tekehalima꞉ I̱ pa꞉ta꞉ la kia꞉me dupa. Tekehali Yesuma꞉ta꞉ hande timba ipiki pa꞉ta꞉ a꞉nda꞉ lombeeke natena꞉ta꞉ hande palaowa mea mina hata꞉

²⁴Koda꞉ pa꞉ta꞉ keiyae pi laata꞉ pindi pindi pea alota꞉ Dota꞉ I̱ma꞉ iki pa꞉ta꞉ kitolo ya loke mindikie laata꞉ I̱ pa꞉ta꞉ hone witolo hata꞉ do hau pea꞉tiki pu hapa꞉peke leekeme.

²⁵Koto tupa꞉ make ne naa paeyeketa꞉ hande kapo mea mina hata꞉ alota꞉ Do kapota꞉ Koda꞉ma꞉ ipika꞉ panake pi la꞉ uluekema꞉ yaka wema꞉ wiaasa꞉me laata꞉ Nemeka꞉na꞉ta꞉ I̱ pa꞉ta꞉ hone witolo hata꞉ pu hapa꞉peke laa leekeme.

²⁶Do palaowa make do kapona꞉ make nalo hata꞉ Tekehali epena꞉yeke ipika꞉ homeekeeki walo halimikie.

²⁷Koto ekina꞉ hali o wanda꞉ epima꞉ Tekehalina꞉ palaowa make ipika꞉ kapona꞉ make hoke tupa꞉ hata꞉ nea꞉ka꞉na꞉ta꞉ Tekehalina꞉ we loke mindiki pa꞉ta꞉ ketete pita꞉la꞉me.

²⁸Koto ekina꞉ wanda꞉hali paeyaoma꞉ ika꞉ piteleme hau amba꞉la wotu handaata꞉ hande palaowa kapona꞉ make napa꞉peke alee.

²⁹Hali epima꞉ hande palaowa kapona꞉ make nalo hata꞉ Tekehalina꞉ loke mindiki pa꞉ta꞉ hone na wiki nea꞉ka꞉na꞉ta꞉ kota꞉ koto nalo hata꞉ta꞉ ipiki pa꞉ta꞉ kone hoke hau wina꞉ ala꞉me.

³⁰Koto piteleme ekina꞉ iki pa꞉ta꞉ haleme wanda꞉hali woputa꞉ yeni haa pitao loke damako pu pitao kutupa mandane wanda꞉halita꞉ amba꞉ homelememe.

³¹Nika꞉ pitoloma꞉ haumanu amba꞉la talo pea bao handoma꞉ka꞉na꞉ yoluta꞉ Koda꞉ma꞉ ka꞉nda꞉ peaasa꞉eki niki pa꞉ta꞉ na epena꞉ lolo pia꞉me.

³²Koto pa꞉la꞉pate Koda꞉ma꞉ nika꞉ hao hoeyaasoma꞉eki handaata꞉ ka꞉nda꞉ miomono lea꞉ka꞉na꞉ta꞉ kota꞉ mo kenke wanda꞉hali ame̱le̱ apa꞉tao hoke yenki meaama꞉na꞉yeke pita꞉la꞉me.

³³Kutupa ya kametitio. Iki momba꞉la pita꞉ Tekehalina꞉ ne noluekema꞉ paeyao epena꞉ laa yuwia pita꞉pa꞉peke.

³⁴Kutupa ika꞉ momba꞉la pita꞉ pu hoeyaasemeeki Koda꞉ma꞉ handaa iki pa꞉ta꞉ eki a꞉nda꞉ peaama꞉na꞉ mo tea꞉ma꞉ homa꞉la꞉ halima꞉ta꞉ ipika꞉ da pa꞉ta꞉ pita꞉ kone ne napeke alee. Kutupa mo hande mandane pea꞉pekeeki manuta꞉ I̱ a꞉pa hata꞉ tikitiki yalueke.