Read Sembeleke 1 Kotindi 2 Bible Online

1 Kotindi 2 - Sembeleke bible

1 Kotindi 2

¹Ya kametitio. Iki pa꞉ta꞉ mo Koda꞉na꞉ a꞉mbao ula꞉ ota꞉ pi waluekema꞉ epoa꞉ dina꞉ta꞉ mo yaka waloa꞉ pi make yaka hone witoloeki make mo wanda꞉halima꞉ pa ana꞉na꞉ opua꞉peke ya꞉la꞉ pi kone waloa꞉me.

²Kutupa iki ame̱le̱ hata꞉ hone dupa ua꞉me. Mo ala꞉ta꞉ ala꞉ta꞉ paeyao hone yonka꞉laaso hata꞉ pa mo Yesu Ketiso pita꞉ mo hande ipiki a꞉ka꞉tei wape piki tina꞉ endiaemekeeki yaapo homeke waluekema꞉ hone witolo hata꞉ haowa꞉me.

³Kutupa make iki pa꞉ta꞉ epoa꞉ dina꞉ta꞉ damako pupa wia paala꞉ma꞉ homolo hata꞉ puki la꞉ma꞉ la꞉ma꞉ tonka꞉na꞉ pia꞉me.

⁴Kutupa I̱ma꞉ta꞉ pi walolo hata꞉ mo hone wopu witeme kenke haliwekima꞉ aleme tupa꞉ pi hokulu hokulu na loa꞉pate pa mo Koda꞉na꞉ Sipitidima꞉ mo ipika꞉ wele wopupiki honkopu peneme yaena꞉yeke waloa꞉me.

⁵Koto ekina꞉ ika꞉ hone tulaaleme ekita꞉ pa mo kenke halina꞉ hone wotu witemeeki opitolo hata꞉ na tulaalemepate pa mo Koda꞉na꞉ wele pita꞉la꞉ ekina꞉ kone hone tulaalememe. Koda꞉na꞉ hone wotu wita꞉la꞉eki

⁶Koto pa꞉la꞉pate pa mo Koda꞉na꞉ pina꞉ keileke haleme wanda꞉hali pa꞉ta꞉ I̱ma꞉ta꞉ hone wotu witolo hata꞉ pi walo halopate pa do kenkena꞉ hone wotu wita꞉la꞉ ekimanu na lo halome. Do kenkena꞉ kilu tombuao haleme haliwekina꞉eki pa꞉ta꞉ make loa꞉me. Koto haliwekina꞉ kilu tombuaasa꞉ ekina꞉ natemanu paelieke.

⁷Kutu pilia꞉pate I̱ma꞉ hande hone wotu witolo hata꞉ lo halo ekita꞉ mo Koda꞉na꞉ hone wotu wita꞉la꞉eki kone alopate pa do kenkena꞉ wanda꞉hali pa꞉ta꞉ta꞉ pa panka꞉ ala꞉ ekie. Amba꞉ do kenke ala꞉ta꞉ ala꞉ta꞉ paeyao a̱i̱ na wepiki hata꞉ kone Koda꞉ma꞉ mo ipika꞉ pa̱a̱ pa꞉la꞉ ekita꞉ niki handa꞉ mea poluekema꞉ do hande hone wotu wita꞉la꞉ ekita꞉ ipikana꞉ma꞉ amba꞉ hone wiekeme.

⁸Do kenke kilu tombuao haleme haliwekima꞉ta꞉ do hone wotu wita꞉la꞉ ekita꞉ na handemekeme. Handemeka꞉na꞉ yoluta꞉ hande pa̱a̱ piki Tekehalita꞉ mo a꞉ka꞉tei wape piki tina꞉ na endiaalo pimime.

⁹Koto pa꞉la꞉pate hande Baibolo bukana꞉ wape pa꞉la꞉ tupa꞉ta꞉Wanda꞉hali homeke a꞉nda꞉ma꞉ na handeekeeki make na opiekeeki make honema꞉ na niminaeyekeeki make kotoeki kone Koda꞉ma꞉ mo ipiki pa꞉ta꞉ pukima꞉ homa꞉la꞉ wanda꞉hali pa꞉ta꞉ peaeyekeme laa wape pa꞉la꞉me.

¹⁰Koto ekina꞉ koto ekimanu kone Koda꞉ma꞉ta꞉ niki pa꞉ta꞉ ipika꞉ Sipitidima꞉ peneme yaena꞉ la꞉la꞉me. Mo Sipitidima꞉ ala꞉ta꞉ ala꞉ta꞉ paeyao akolopa mu tia pominolo hata꞉ Koda꞉na꞉ ka꞉na꞉ honema꞉ a꞉mbao ula꞉ ekimanu kone handa꞉ wita꞉la꞉me.

¹¹Hali homekema꞉ hali ma꞉nda꞉na꞉ wita꞉la꞉ hone na handa꞉la꞉pate pa mo somena꞉ hone teke pa꞉ta꞉ wita꞉la꞉ hone manuta꞉ ipika꞉ temoko homekema꞉ kone hando hala꞉me. Koto tupa꞉ kone Koda꞉na꞉ Sipitidima꞉ta꞉ mo Koda꞉na꞉ pita꞉la꞉eki paeyao hando hala꞉me.

¹²Koda꞉ma꞉ta꞉ do kenkena꞉ hau pita꞉la꞉eki handomono na la꞉la꞉pate ipikana꞉ma꞉ amba꞉ ka꞉la꞉ alemanu paeyao handomonoyeke ipika꞉ Sipitidi kone amba꞉ ka꞉la꞉me.

¹³Koto ekina꞉ hande Sipitidi meleme wanda꞉hali pa꞉ta꞉ Koda꞉na꞉ ota꞉ pimanu walolo hata꞉ nikana꞉ma꞉ do kenkena꞉ hone wotu wiki haliwekima꞉ wala꞉la꞉eki na waloma꞉pate pa mo Sipitidima꞉ wala꞉la꞉eki wala꞉tiki pu haloma꞉me.

¹⁴Koto poloma꞉pate hande Sipitidi na ma꞉la꞉ some epita꞉ mo hande Koda꞉na꞉ Sipitidima꞉ pa kita꞉la꞉ alemanu na mia꞉peke ya꞉la꞉me. Kutupiki someta꞉ hande Koda꞉na꞉ Sipitidima꞉ pa kita꞉la꞉ alemanu na minolo hata꞉ yalo Pa ekie laa hone na u hala꞉me.

¹⁵Mo Koda꞉na꞉ Sipitidi ma꞉la꞉ someta꞉ mo piteme hau paeyao hando ka꞉pa꞉la꞉peke ya꞉la꞉pate pa ma꞉nda꞉ma꞉ ipika꞉ pita꞉la꞉ ekita꞉ hando ka꞉pa꞉la꞉peke na ya꞉la꞉me.

¹⁶Hande Baibolo bukana꞉ wape pa꞉la꞉ ekita꞉ dupaTekehalina꞉ hone wita꞉la꞉eki hali epima꞉ handa꞉la꞉pe. Hali epima꞉ ipiki pa꞉ta꞉ Doeki pie laa lapeke ya꞉la꞉pe laa wape pa꞉la꞉me. Koto pa꞉la꞉pate nikana꞉ma꞉ witoloma꞉ honeta꞉ Ketisoma꞉ wita꞉la꞉ tupa꞉ kone witoloma꞉me.