Read Sembeleke 2 Kotindi 11 Bible Online

2 Kotindi 11 - Sembeleke bible

2 Kotindi 11

¹Ikana꞉ma꞉ I̱ta꞉ hosiki hone wopu na wiki hake nono pimanu lono a̱i̱ na kiake waleke siki kipe laa honke alome.

²Koda꞉ma꞉ iki pa꞉ta꞉ hone wopu witolo leke wia hala꞉ tupa꞉ I̱ma꞉ make iki pa꞉ta꞉ homeke hone wopu witolo hata꞉ leke wia halome. Ikita꞉ mo hande ma꞉nda꞉ma꞉ hakopu na tunkuliki pa hala꞉ moputali wandikima꞉ handelememe. Kutupa I̱ma꞉ koto wandikita꞉ ota꞉ hali homeke Ketisoma꞉ kone mina꞉ laa amba꞉ la꞉ ua꞉me.

³Ika꞉ hone manuta꞉ hoeyaasa꞉eki manuma꞉ mea bepolao ika꞉ ota꞉ Ketiso pa꞉ta꞉ homeke ala꞉ta꞉ ma꞉nda꞉ na ta̱leke pukima꞉ homelemeeki hoki walimikie laata꞉ I̱ta꞉ paala꞉ pa꞉la꞉me. Mo hande ketona꞉ hone wopu lenkene piki yayapiki pima꞉ hande Ipa꞉ makeaeyeke tupa꞉ kone pilieke laa loa꞉me.

⁴Pa ekipeke ikana꞉ma꞉ta꞉ iki pa꞉ta꞉ ma꞉nda꞉ epima꞉ a꞉pa mo Yesu ma꞉nda꞉na꞉ wala꞉la꞉ pita꞉ pa ta꞉na꞉ma꞉ homaa opu halememe. Mo nikana꞉ma꞉ waloma꞉ Yesuna꞉ dia꞉me. Ikana꞉ma꞉ mimi sipitidi pita꞉ pi seliapo yaapota꞉ ota꞉ ta꞉ta꞉ pa꞉la꞉me. Mo hande nikana꞉ma꞉ mea epoma꞉ Sipitidi pita꞉ Pi Seliapo yaapo ota꞉ dia꞉me.

⁵I̱ma꞉ta꞉ I̱ta꞉ koto ika꞉ mea a꞉meiyaaseme aposolo aleme haliweki ota꞉ hosiki siki make oto pa꞉ta꞉ halome hone na ulume.

⁶I̱ta꞉ ma꞉nda꞉ta꞉ yaka pi alo pa꞉ta꞉ta꞉ me̱i̱me̱i̱ lialopate pa mo hone witoloeki pa꞉ta꞉ta꞉ ota꞉ dia꞉me hone witolome. Nikana꞉ma꞉ta꞉ hau paeyao pa꞉ta꞉ta꞉ koto ekita꞉ peneme yatiki pu haloma꞉me.

⁷I̱ma꞉ta꞉ iki pa꞉ta꞉ mo hande Koda꞉na꞉ Pi Seliapo waloa꞉ dina꞉ta꞉ ikita꞉ ota꞉ ala꞉ta꞉ ma꞉nda꞉siki make yenki kipe pi na loa꞉me. Iki ota꞉ aneke wanda꞉hali au laluekema꞉ yeke I̱ma꞉ta꞉ ya kone homu pea lu mina꞉niaowa꞉me. Kotota꞉ ata꞉ka꞉ piki hau pua꞉pe.

⁸I̱ma꞉ iki tukiki pa꞉ta꞉ e pokoa꞉ dina꞉ta꞉ mandane siosi manuma꞉ I̱ta꞉ yenki kimime. I̱ma꞉ta꞉ iki tamba꞉ muluekema꞉yeke mo wanda꞉halina꞉ mani pake neke nono pua꞉me.

⁹Kutupa iki ame̱le̱ haowa꞉ natena꞉ta꞉ I̱ mani dia꞉yeketa꞉ I̱ tamba꞉ mipe laa iki pa꞉ta꞉ ka꞉nda꞉ peaapeke honke na loa꞉me. Pa ekipeke mo Ma꞉sedonia nanema꞉ epeme kame tonuma꞉ I̱ dia꞉ya꞉la꞉ ale paeyao aneke mea a꞉paememe. Amba꞉ pua꞉ tupa꞉ wetepe nina꞉ make I̱ta꞉ iki ka꞉nda꞉ homaaluekema꞉ na taapulueke.

¹⁰Ketisona꞉ ota꞉ pi I̱ pa꞉ta꞉ pila꞉eki yalota꞉ I̱ma꞉ do yaka hakoko litolo pita꞉ ota꞉ koto Akaya kenke paeyao pa꞉ta꞉ta꞉ na palueke laa pi la꞉ witolome.

¹¹I̱ma꞉ do alo ekita꞉ iki pukima꞉ na homolome laa alope. Dia꞉me. I̱ma꞉ iki pa꞉ta꞉ pukima꞉ homolo ekita꞉ ota꞉ Koda꞉ma꞉ hone ula꞉me.

¹²I̱ma꞉ta꞉ ame do pitolo ekita꞉ ota꞉ pa pitolo ombu halueke. Pa ekipeke mo koto mandane aposoloe lo haleme haliwekima꞉ hakoko litolo hata꞉ alota꞉ Nikana꞉ma꞉ta꞉ ikana꞉ma꞉ pokeme tupa꞉ kone pokoloma꞉me alemeeki sa꞉sa꞉ puluekema꞉ loa꞉me.

¹³Koto haliwekita꞉ ota꞉ aposolo haliweki dia꞉me. Ikita꞉ makeaaso aposolo haliweki hata꞉ ika꞉ pokeleme ena꞉ yayapiki pi laata꞉ ikita꞉ Ketisona꞉ ota꞉ aposolo haliweki leke au lo halememe.

¹⁴Kota꞉ a꞉pa꞉la꞉ma꞉ hone wopu wia꞉peke na ya꞉la꞉me. Pa ekipeke Sadanima꞉ kone ipikita꞉ mo pa̱a̱piki enisoloma꞉ handeke nono pu hapeke ya꞉la꞉me.

¹⁵Koto ekina꞉ta꞉ ipika꞉ pa hameke e pokaasa꞉ haliwekima꞉ iki make ota꞉ tikitiki piki hauna꞉ e pokaasa꞉ haliweki hata꞉ au lemeka꞉na꞉ta꞉ kota꞉ kotoeki hau tieke dia꞉me. Paetolo nate nina꞉ta꞉ ika꞉ pimi hauma꞉ wala꞉la꞉ yenki kone milimikie. Polota꞉ aposolo hata꞉ mieke tandamanu

¹⁶I̱ma꞉ pa yaapo peao dupa alome. Ma꞉nda꞉ma꞉ I̱ta꞉ hone na wiki halie hone wia꞉peke na ya꞉la꞉me. Pate ikana꞉ma꞉ koto hone wimika꞉na꞉ta꞉ kota꞉ a꞉pa꞉la꞉me. I̱ma꞉ta꞉ hosiki siki hauna꞉ hakoko liono I̱ta꞉ hone na wiki hali leke handa꞉ mipee.

¹⁷Kota꞉ ame I̱ma꞉ do alo ekita꞉ Koda꞉ma꞉ I̱ma꞉ lono lolo pi dia꞉me. Dupiki hakoko litolo ekita꞉ ota꞉e mo hone na wiki somema꞉ ala꞉ tupa꞉ alome.

¹⁸Kutu pa꞉la꞉pate kenke hauna꞉ hakoko liteleme wanda꞉hali wopu halemeeki yalota꞉ I̱ma꞉ make homeke hau pulueke.

¹⁹Ikita꞉ lombei peao hone wopu wilimieki yalota꞉ mo hone na wiki haliwekita꞉ ta꞉na꞉ma꞉ homa handa꞉ mu halememe.

²⁰Ikana꞉ma꞉ta꞉ mo iki dupi dupi lo haleme haliweki make o iki teke puleke lao haleme haliweki make o iki hona꞉ma̱o̱ haleme o iki handa꞉niao haleme o iki kadapo ku haleme haliweki paeyao pa꞉ta꞉ ta꞉na꞉ma꞉ homolo hata꞉ ika꞉ pi opu halememe.

²¹Nikana꞉ma꞉ta꞉ kutupiki haumanu puluekema꞉ doda꞉pikina꞉ na puma꞉ta꞉ laa loluekema꞉ I̱ma꞉ yaala꞉ pa꞉la꞉me. Pate ma꞉nda꞉ epima꞉ ala꞉ta꞉ ma꞉nda꞉na꞉ honkopu hao hakoko lulueke hone wia꞉ka꞉na꞉ta꞉ kota꞉ I̱ma꞉ make hone na wiki some leke mandake tupa꞉ loluekema꞉ ana꞉na꞉ honkopu hao pea꞉peke ya꞉lieke.

²²Ikita꞉ Hibulu ya꞉ka꞉ta꞉pe kota꞉ I̱ make lataa. Ikita꞉ Isulai ya꞉ka꞉ta꞉pe kota꞉ I̱ make lataa. Ikita꞉ Eipoloha꞉ma꞉na꞉ tapake ya꞉ka꞉ta꞉pe kota꞉ I̱ make lataa.

²³Ikita꞉ Ketisona꞉ e pokaaseme haliweki ya꞉ka꞉ta꞉pe kota꞉ I̱ta꞉ you hoke halima꞉ leke nono pitolopate I̱ta꞉ e pokaaso hali hata꞉ iki lombei peaalome. I̱ma꞉ta꞉ lombei peaaso hata꞉ oto honkopu hao e wopu pokolome. I̱ta꞉ dipula da pa꞉ta꞉manu ota꞉ lombei piki hoto eleke eleke mea pitaalememe. I̱ta꞉ ota꞉ lombei peake tupa꞉ dopitama꞉ yombelememe. Kutupa I̱ta꞉ homa꞉la꞉eki tombona꞉ teke pa꞉ta꞉ ota꞉ lombei piki natemanu mea꞉tiki polome.

²⁴Mo Diu tapakema꞉ I̱ta꞉ hoto yunki hata꞉na꞉ minaata꞉ puma꞉ hoto 39 peao I̱ yombimime.

²⁵Kutupa hoto tepota꞉ mo Loma꞉ haliwekima꞉ dopitama꞉ I̱ yombimime. Kutupa hoto homeketa꞉ toopima꞉ I̱ limime. I̱ta꞉ hoto tepota꞉ mo sisima kawasota꞉ toopina꞉ tulaaso yambolo hoeya꞉tiki pua꞉me. Kutupa hoto ma꞉nda꞉ta꞉ ota꞉ nate homekena꞉ ma꞉nda꞉ma꞉ I̱ petelena꞉ oni ikali manda pomua꞉me.

²⁶Yaka wopu pomua꞉tiki pu haowa꞉ pa꞉ta꞉ manuta꞉ I̱ lia homaaluekema꞉ mo ikali tieke tea꞉ ekima꞉ teke pa꞉ta꞉ epea꞉ make mo pake nala꞉ haliwekima꞉ make teke pa꞉ta꞉ haememe. Mo Diu yankeke tonu pita꞉ Diendaili tapake yaapoma꞉ta꞉ I̱ hoeyaaluekema꞉ hone wimime. Mo daonimanu pa꞉ta꞉ make hapu hayeke alemanu pa꞉ta꞉ make dawala tieke manuna꞉ make makeaaso yankeke tonu pa꞉ta꞉ make ota꞉ I̱ hoeyaapeke alemanu teke pa꞉ta꞉ hatiki pu haowa꞉me.

²⁷Kutupa nate mandaneeki manuna꞉ta꞉ honkopu paena꞉ kone e wopu pokoa꞉me. Hoto eleke eleke timba꞉ naneta꞉ e pokaaluekema꞉ u na polua꞉me. Nate ma꞉nda꞉ nina꞉ta꞉ I̱ta꞉ tea꞉ma꞉ make ikali na꞉na꞉ma꞉ make homoa꞉me. I̱ta꞉ nate ma꞉nda꞉ nina꞉ta꞉ ne da dau wopu dia꞉yalo hata꞉ pa haowa꞉me.

²⁸Kutupa mandane haumanu wina꞉ koneta꞉ I̱ta꞉ hoto paeyaota꞉ mo siosi paeyao pa꞉ta꞉ hone uluekema꞉ I̱ ota꞉ tumbaala꞉me.

²⁹Ma꞉nda꞉ a꞉nda꞉ damako pia꞉ka꞉na꞉ta꞉ I̱ make homeke tupa꞉ damako pu halome. Ma꞉nda꞉ a꞉nda꞉ hoke hau pa꞉ta꞉ mea lopaeya꞉ka꞉na꞉ta꞉ kota꞉ I̱ta꞉ ya puki pa꞉ta꞉ ka꞉nda꞉ma꞉ homolome.

³⁰I̱ma꞉ hakoko lia꞉peke ya꞉ka꞉na꞉ta꞉ kota꞉ I̱ma꞉ mo I̱ damako pitoloeki wala꞉la꞉ ale manuna꞉ hakoko lionoe.

³¹Koda꞉ mo Tekehali Yesu Ketisona꞉ Atekema꞉ta꞉ I̱ma꞉ta꞉ yayapiki pi na alome laa hone wita꞉la꞉me. Ipika꞉ bikita꞉ hoto paeyao mea a꞉meiyamana꞉e.

³²I̱ta꞉ mo Damasikasi daoni pa꞉ta꞉ haowa꞉ dina꞉ta꞉ mo kini Aletasi oto pa꞉ta꞉ haya꞉ kapomani halima꞉ta꞉ I̱ minina꞉ alo hata꞉ mo daoni pota꞉ pa꞉ta꞉manu haliweki handeteke hao yapena꞉ lea꞉me.

³³Pate I̱ta꞉ mo daoni pape tea꞉na꞉ lombaemeke seto ka꞉ka꞉na꞉ windo pa꞉ta꞉ yama꞉ basekede nuna꞉ pita꞉paleke lopaniao ipika꞉ kiki pa꞉ta꞉ ka꞉la꞉pa꞉ta꞉ pao pindipa poa꞉me.