Read Sembeleke 2 Kotindi 13 Bible Online

2 Kotindi 13 - Sembeleke bible

2 Kotindi 13

¹I̱ta꞉ hoto tepo peao iki handolo ipuluekema꞉ taapolome. Mo Baiboloma꞉ la꞉la꞉ tupa꞉ta꞉ Ma꞉nda꞉ma꞉ ketete pa꞉la꞉me lemeka꞉na꞉ta꞉ kota꞉ koto mo hali yaapo tepoma꞉ a꞉nda꞉ Ota꞉e Handoma꞉me pi alo wekitisi haemeka꞉na꞉ homeke ana꞉ pa꞉la꞉me la꞉la꞉me.

²Amba꞉ hande hoto yaapo peao epoa꞉ dina꞉ la kua꞉ ekita꞉ ame papate halo dina꞉ta꞉ paa lolueke. Iki ame̱le̱ amba꞉ hoke hau pimi wanda꞉hali make pa iki paeyao pa꞉ta꞉ make I̱ma꞉ alo pi dupa. I̱ paa ipulua꞉ dina꞉ta꞉ ma꞉nda꞉ epi a꞉nda꞉ ipika꞉ panisi mea꞉peke ekita꞉ ota꞉ paka꞉lao pua꞉peke na yelieke alome.

³Mo Ketisoma꞉ I̱ pa꞉ta꞉ yama꞉ lo hala꞉me ekina꞉ peneme yaasa꞉ ekita꞉ ikana꞉ma꞉ ota꞉ ana꞉na꞉ wia halimikie. Ipikana꞉ma꞉ iki pa꞉ta꞉ hau ma꞉nda꞉ pia꞉ka꞉na꞉ta꞉ ipikita꞉ damako na pa꞉la꞉me. Kotoeki na pikita꞉ ipikana꞉ma꞉ iki tukiki pa꞉ta꞉manu ipika꞉ honkopu walo hala꞉me.

⁴Mo damako peaaso haena꞉ kone ipikita꞉ mo kotosina꞉ lu homaeya꞉pate Koda꞉na꞉ honkopuma꞉ta꞉ ipikita꞉ da꞉taa hao hala꞉me. Kutupa make ipiki ame̱le̱ tunaaso hata꞉ niki make damako poloma꞉pate pa iki ame̱le̱ tukikina꞉ hata꞉ nikana꞉ma꞉ta꞉ Koda꞉ma꞉ Ketiso wele peaasa꞉eki ma꞉nda꞉ putupa꞉ meaata꞉ ika꞉ yankeke halumeke.

⁵Ika꞉ kone mo la handa꞉la꞉eki pa꞉ta꞉ u moneaaso hata꞉ ika꞉ kone pi yokaalu pea꞉pa꞉peke. Do hauta꞉ ika꞉ ota꞉ hone tulaasa꞉eki pa꞉ta꞉ halemeo laa handa꞉ uluekema꞉ pea꞉pa꞉peke. Iki amba꞉ a̱i̱ na lopemeketa꞉ kota꞉ Yesu Ketisota꞉ iki pa꞉ta꞉ hala꞉me hone u hapa꞉peke aleo.

⁶Ikana꞉ma꞉ nikita꞉ na lopo haloma꞉me laa hone uemena꞉ yeke I̱ma꞉ hone ti lao halome.

⁷Ikana꞉ma꞉ ata꞉ka꞉ pikieki ma꞉nda꞉ na puemena꞉ laa nikana꞉ma꞉ Koda꞉ pa꞉ta꞉ yeni pu haloma꞉me. Kota꞉ nikita꞉ mo la handa꞉la꞉eki lombei puma꞉me laa waluekema꞉ dia꞉ya꞉la꞉me. Pate nikita꞉ lopo hake nono piomono kone ikita꞉ mo ota꞉ tikitiki piki hau puemena꞉ yeke loma꞉me.

⁸Nikana꞉ma꞉ta꞉ mo ota꞉eki pa꞉ta꞉ a꞉nda꞉piki hau ma꞉nda꞉ homeke pea꞉peke na ya꞉la꞉pate pa ipika꞉eki homeke pumana꞉ loa꞉me.

⁹Niki damako poloma꞉ dina꞉ta꞉ iki honkopu hao haleme ekima꞉ nikita꞉ ta꞉na꞉ wopu pa꞉la꞉me. Koto ekina꞉ta꞉ iki ota꞉eki a꞉nda꞉ na piki wanda꞉hali hamena꞉ nikana꞉ma꞉ yeni pea꞉tiki pu haloma꞉me.

¹⁰Koto ekina꞉ yeketa꞉ I̱ma꞉ papate hata꞉ doeki laasome. Pa ekipeke I̱ opolo epoa꞉ka꞉na꞉ta꞉ mo Koda꞉ma꞉ I̱ ka꞉la꞉ honkopu pita꞉ hata꞉ iki tandapiki tupa꞉ na a꞉pa lolo polo tupa꞉ loa꞉me. Do honkoputa꞉ iki mea londa꞉laalo polo tupa꞉ dia꞉ya꞉la꞉pate iki mea daeyaluekema꞉ yeke loa꞉me. Paeyaaso a꞉talo pimanu

¹¹Koto ekina꞉ ameta꞉ yaka kame tonuo iki pa꞉ta꞉ a꞉taloe alome. Eki a꞉nda꞉ ota꞉ na piki wanda꞉hali hamena꞉ iki ota꞉ honkopu hao hapa꞉peke. Yaka loa꞉ honke pimanu opu hapa꞉peke. Ma꞉nda꞉ ma꞉nda꞉ ame̱le̱ homeke hone u alualu pea꞉pa꞉peke. Puki lopaniaasa꞉eki pa꞉ta꞉ hapa꞉peke. Kutupa mo pukima꞉ homa꞉la꞉eki make puki lopaniaasa꞉ ekina꞉ Koda꞉ta꞉ iki ame̱le̱ halieke.

¹²Yankeke tonu pa꞉ta꞉ ta꞉na꞉ma꞉ homolo hata꞉ kiki mina꞉ alualu pea꞉pa꞉peke. Do Koda꞉na꞉ wanda꞉hali paeyaoma꞉ iki pa꞉ta꞉ ika꞉ a꞉talo pimanu tapaasememe.

¹³Tekehali Yesu Ketisona꞉ a꞉ta꞉ma꞉ homa tamba꞉ mina꞉la꞉ ekima꞉ make Koda꞉na꞉ pukima꞉ homa꞉la꞉ ekima꞉ make Holi Sipitidina꞉ ta꞉ma꞉ni pita꞉la꞉eki paeyaoma꞉ta꞉ iki ame̱le̱ wina꞉e.