Read Sembeleke 2 Kotindi 3 Bible Online

2 Kotindi 3 - Sembeleke bible

2 Kotindi 3

¹Do alo ekita꞉ nikana꞉ma꞉ nika꞉ kone biki pa mina꞉liake nono pa꞉la꞉pe. O mandane wanda꞉halima꞉ piteleme tupa꞉ mo biki epeaasa꞉ tameiya꞉manu iki pa꞉ta꞉ kiomonope o iki pa꞉ta꞉ yama꞉ miomonope.

²Dia꞉me iki kone nika꞉ wape pea ula꞉ tameiya꞉e. Paeyaoma꞉ yata꞉pa hone wina꞉yeke ikita꞉ nika꞉ pukina꞉ wape pea ula꞉me.

³Ketiso ipika꞉ kone do tameiya꞉ lao niki pa꞉ta꞉ tapaala꞉ ekita꞉ penemena꞉ ula꞉me. Do tameiya꞉ta꞉ halina꞉ kikima꞉ na laala꞉pate mo deto hala꞉ Koda꞉na꞉ Sipitidima꞉ laala꞉me. Ipikana꞉ma꞉ta꞉ mo toopi sasakena꞉ na laala꞉pate wanda꞉halina꞉ puki manuna꞉ laala꞉me.

⁴Nikana꞉ma꞉ doeki alome ekita꞉ Yesu pa꞉ta꞉ yama꞉ Koda꞉ pa꞉ta꞉ amba꞉ hone baaloma꞉me.

⁵Nikana꞉ma꞉ ana꞉na꞉ kone do eta꞉ pokaalumeke pi lapeketa꞉ ota꞉ waleke ma꞉nda꞉ na ula꞉me. Nikana꞉ma꞉ pea꞉peke honkoputa꞉ Koda꞉ pa꞉ta꞉ yama꞉ ipula꞉me.

⁶Ipikana꞉ma꞉ta꞉ nikana꞉ma꞉ do panake la꞉ ula꞉ pi pa꞉ta꞉ e pokomono niki wele peaasa꞉me. Do panake la꞉ ula꞉ pita꞉ mo wape pea ula꞉ Lo Pi dia꞉ya꞉la꞉pate pa mo Sipitidima꞉ peaasa꞉ekie. Mo wape pea ula꞉ Lo pima꞉ta꞉ homa꞉la꞉eki mea ipula꞉pate pa mo Sipitidima꞉ta꞉ da꞉ta꞉la꞉eki kita꞉la꞉me.

⁷Mo Mosesina꞉ Lo Pita꞉ toopi sasakena꞉ wape pea lao halea꞉ dina꞉ta꞉ Koda꞉na꞉ pa̱a̱ opolo epeekeme. Kutupa koto Mosesina꞉ leke popelekena꞉ pia꞉ pa̱a̱ta꞉ paa alu putia pea꞉pate kone honkopu wopu pia꞉ ekima꞉ mo Isulai wanda꞉halima꞉ta꞉ ipiki na handaake wimikime. Mo homa꞉la꞉eki mea ipula꞉ Lo Pita꞉ ipika꞉ e poka꞉la꞉ dina꞉ dupiki pa̱a̱ pa꞉la꞉eki mea a꞉pa꞉peke ya꞉la꞉me hone uma꞉ka꞉na꞉ta꞉

⁸kota꞉ mo Sipitidina꞉ pita꞉la꞉ haumanu pa꞉ta꞉ ipula꞉ pa̱a̱ta꞉ ekipiki pa̱a̱ tieke pa꞉la꞉pe hone umana꞉e.

⁹Mo hoke yenki mea ipula꞉ Lo Pina꞉ hauta꞉ ota꞉ yole pia꞉pate pa mo da꞉taapeke pa꞉ta꞉la꞉la꞉eki mea a꞉pa꞉la꞉ ekita꞉ ota꞉ lombei pikieki yole pa꞉la꞉me.

¹⁰Nikana꞉ma꞉ dupa lapeke ya꞉la꞉me. Ame do ota꞉ lombei piki pa̱a̱ wopu pa꞉la꞉ ekima꞉ta꞉ mo amba꞉ hande pa̱a̱ wopu pieke ekita꞉ alu pa꞉la꞉me lapeke ya꞉la꞉me.

¹¹Kutupa mo amba꞉ hande nate leke hosiki hokuluna꞉ pa wieke ekina꞉ta꞉ pa̱a̱ piekeme loma꞉ka꞉na꞉ta꞉ kota꞉ mo ame do honiki na wiki ota꞉ hao hala꞉ ekina꞉ pa̱a̱ta꞉ ota꞉ lombei peaake pa̱a̱ pa꞉la꞉me laa hone umana꞉e.

¹²Nikita꞉ do hone tulao handeteke haloma꞉eki wia haloma꞉ ekima꞉ta꞉ nikita꞉ honkopu wopu haloma꞉me.

¹³Nikita꞉ mo hande Mosesi tupa꞉ dia꞉me. Ipikana꞉ma꞉ta꞉ mo Isulai wanda꞉halima꞉ ipika꞉ leke popelekena꞉ pa̱a̱ tieke pia꞉eki alu paeya꞉eki handaama꞉na꞉ yeke ipika꞉ leke popeleketa꞉ dau sinkipiki ma꞉nda꞉ma꞉ a꞉mbeeke tupa꞉ dia꞉me.

¹⁴Ika꞉ hone manuta꞉ ota꞉ a꞉mbao pambeekeme. Kutupa a꞉pa ota꞉ ame do natena꞉ make mo hande amba꞉ Lo pi lao wieke bukamanu yata꞉pelemeketa꞉ ika꞉ hone manuta꞉ mo hande dau sinkipiki ma꞉nda꞉ma꞉ a꞉mbaala꞉me. Ma꞉nda꞉ epima꞉ Ketiso pa꞉ta꞉ tunaeya꞉ka꞉na꞉ homeketa꞉ kota꞉ mo leke popeleke a꞉mbaala꞉ dau sinkipiki ma꞉nda꞉ mea baapeke ya꞉la꞉me.

¹⁵Ota꞉ ame do make mo Mosesina꞉ Lo Pi yata꞉pelemeketa꞉ mo dau sinkipikima꞉ta꞉ ika꞉ hone manuta꞉ paa a꞉mbao hala꞉me.

¹⁶Pate ana꞉na꞉ mea baapeke ya꞉la꞉me. Pa ekipeke mo Baiboloma꞉ Mosesi hotiolo hata꞉ alota꞉ Ipika꞉ leke popeleke a꞉mbaala꞉ dau sinkipiki mea bake hauta꞉ ipiki Tekehali pa꞉ta꞉ la꞉ka꞉la pea꞉ dina꞉ pia꞉me la꞉la꞉ tupa꞉ loa꞉me.

¹⁷Koto Tekehali pa꞉ta꞉e la꞉la꞉ ekita꞉ mo Sipitidi pa꞉ta꞉ konee la꞉la꞉me. Kutupa mo Tekehalina꞉ Sipitidi hala꞉ ale pa꞉ta꞉ta꞉ kota꞉ ka꞉la꞉pa꞉ tapaasa꞉ hau ula꞉me.

¹⁸Kota꞉ niki paeyaota꞉ mo Tekehalina꞉ pa̱a̱ta꞉ na a꞉mbake nika꞉ leke popelekema꞉ta꞉ ipika꞉ pa̱a̱na꞉ su̱a̱ su̱a̱ waloma꞉me. Kutupa koto homeke pa̱a̱ma꞉ kone Tekehali hande Sipitidi pa꞉ta꞉ yama꞉ ipula꞉ ekima꞉ta꞉ nikita꞉ mo hoto paeyao pa daeya꞉tiki pu hala꞉ pa̱a̱ tieke pa꞉ta꞉ ipikima꞉ handomono topo peao hala꞉me.