Read Sembeleke 2 Kotindi 7 Bible Online

2 Kotindi 7 - Sembeleke bible

2 Kotindi 7

¹Yaka pukipiki yankeke tonuo do la꞉ ula꞉ pi manuta꞉ niki pa꞉ta꞉ la꞉la꞉me. Koto ekina꞉ta꞉ mo nika꞉ loke puki yaapo ha̱i̱ peaapeke ekimanu pa꞉ta꞉ta꞉ yako pea hamana꞉e. Kutupa nika꞉ Koda꞉ pa꞉ta꞉ paala꞉ma꞉ homa꞉la꞉ hauma꞉ ota꞉ niki yako pea hamana꞉e. Polona꞉ ta꞉na꞉ pa꞉la꞉eki

²Ika꞉ puki pa꞉ta꞉manu nika꞉ da panda꞉ wepiapee. Nikana꞉ma꞉ta꞉ ma꞉nda꞉ pa꞉ta꞉ hoke hau na poloma꞉me. Nikana꞉ma꞉ta꞉ ma꞉nda꞉ tekipuleke na laoma꞉me. Kutupa ma꞉nda꞉ pa꞉ta꞉ imeke peaake pimanu laa ipika꞉ alemanu muluekema꞉ na taapoma꞉me.

³I̱ma꞉ doeki alo ekita꞉ ikana꞉ma꞉ hoke hau pelememe laa ma̱leke litolo na loa꞉me. I̱ma꞉ amba꞉ titina꞉ loa꞉ tupa꞉ ikita꞉ niki pa꞉ta꞉ yole pelemeeki yalota꞉ nika꞉ temokota꞉ hoto paeyao iki ame̱le̱ mandakena꞉ haloma꞉me. Niki pa haloma꞉ dina꞉ make homoloma꞉ dina꞉ make loa꞉me.

⁴I̱ma꞉ta꞉ ikita꞉ ana꞉ pa꞉la꞉me hone ulume. I̱ma꞉ta꞉ ika꞉ piteleme hauna꞉ ta꞉na꞉ma꞉ homa꞉la꞉eki minolome. Nika꞉ ka꞉nda꞉ma꞉ homoloma꞉ ekimanu pa꞉ta꞉ta꞉ I̱ta꞉ hali au la hata꞉ honkopu haasa꞉ ekima꞉ tumbu hala꞉me. I̱ta꞉ ta꞉na꞉ pa꞉la꞉ ekima꞉ tumbaa ankou ala꞉me.

⁵Mo Ma꞉sedonia opolo poma꞉ dina꞉ maketa꞉ nikita꞉ hoto ota꞉ na pituma꞉me. Ka꞉nda꞉ paeyao manuta꞉ tumbulu baeyekeme. Ma꞉nda꞉ ame̱le̱ ape ala꞉eki make nika꞉ pukimanu pa꞉ta꞉ta꞉ paala꞉ pa꞉la꞉ ekimanu make pitia꞉me.

⁶Pate mo puki hoela꞉ wanda꞉hali honkopu hawao hala꞉ Koda꞉ma꞉ta꞉ mo Taitasi epolo pia꞉ ekima꞉ niki honkopu hawaya꞉me.

⁷Mo ipiki epolo pia꞉ ekima꞉ homeke niki ta꞉na꞉ma꞉ na homa꞉ tiaya꞉pate pa mo ikana꞉ma꞉ ipiki honkopu hawaemeeki a꞉pa la kia꞉ ekima꞉ make niki ta꞉na꞉ma꞉ homa꞉ tiaya꞉me. Ipikana꞉ma꞉ta꞉ ikana꞉ma꞉ I̱ handawee laa we pambelememe laata꞉ ikana꞉ma꞉ ota꞉ hokeeki puma꞉me laa kelepeleme ekina꞉ make mo I̱na꞉ ta̱luekema꞉ tikitiki yao halemeeki make paeyao a꞉pa la kia꞉me. Koto ekina꞉ ameta꞉ I̱ta꞉ ta꞉na꞉ tieke ota꞉ wopu pa꞉la꞉me.

⁸Mo yaka tapaowa꞉ tameiya꞉ma꞉ iki ka꞉nda꞉ma꞉ homaeya꞉ka꞉na꞉ta꞉ I̱ma꞉ laawa꞉me laa a꞉ta꞉e pi na alome. Mo tameiya꞉ma꞉ iki nate ma꞉nda꞉ nina꞉ ka꞉nda꞉ma꞉ homawa꞉eki handoa꞉ dina꞉ta꞉ I̱ma꞉ a꞉ta꞉ma꞉ homolo pua꞉me.

⁹Pate ameta꞉ I̱ta꞉ ta꞉na꞉ma꞉ homolome. Iki a꞉ta꞉ma꞉ homa꞉ tiawa꞉ ekina꞉ dia꞉ya꞉la꞉pate pa mo ika꞉ homeme ka꞉nda꞉ma꞉ta꞉ ika꞉ haumanu topo peaya꞉ ekina꞉ loa꞉me. Koto ka꞉nda꞉ma꞉ homa꞉la꞉ ekita꞉ Koda꞉ma꞉ peaya꞉eki yalo nikana꞉ma꞉ iki na hoeyaoma꞉me.

¹⁰Pa ekipeke mo Koda꞉ma꞉ homo tiaasa꞉ ka꞉nda꞉ma꞉ta꞉ puki topo peaasa꞉eki mea ipulu hata꞉ da꞉ta꞉monoyeke pa꞉ta꞉la꞉la꞉eki pa꞉ta꞉ hatuku pula꞉mee. Koto ekina꞉ta꞉ ma꞉nda꞉ma꞉ koto pa꞉ta꞉ta꞉ I̱ hoeyaasa꞉ ekie pi ma꞉nda꞉ lapeke na ya꞉la꞉me. Pate do kenkena꞉ hau pa꞉ta꞉ ipula꞉ ka꞉nda꞉ma꞉ta꞉ homa꞉la꞉eki handa꞉ u hala꞉me.

¹¹Koda꞉ma꞉ do ika꞉ ka꞉nda꞉ma꞉ homemeeki pa꞉ta꞉ yama꞉ pa꞉la꞉eki handa꞉pe. Titina꞉ta꞉ ika꞉ bu alo hata꞉ a̱i̱ koto kone ika꞉ peleme hoke haumanu tikitiki yamena꞉ la꞉la꞉me. Kutaata꞉ ika꞉ pimi hoke hau manuta꞉ ameta꞉ ota꞉ mina꞉pa꞉laloma꞉me laa waluekema꞉ hone wopu witeleme ekina꞉ make iki epeaala꞉ma꞉ handa꞉pe. A꞉pa꞉e. Ameta꞉ topo wopu pea pimika꞉ta꞉me. Ikana꞉ma꞉ta꞉ mo ata꞉ka꞉ peaaseke mineke panka꞉la꞉ hau make puki yoka꞉ miniki hasa꞉ hau make pea pimika꞉ta꞉me. Ota꞉ aloma꞉ epeke honemanu witolo hata꞉ puki wopu wia pimika꞉ta꞉me. Kutupata꞉ hoke hau a̱i̱ koto kone panisi pealuekema꞉ tikitiki yao hata꞉ pimika꞉ta꞉me. Koto peleme ekita꞉ mo amba꞉ putia epoloma꞉ hau paeyao pa꞉ta꞉ta꞉ ikita꞉ ata꞉ka꞉ na piki wanda꞉halie laa wala꞉la꞉eki handolome.

¹²Koto ekina꞉ta꞉ I̱ma꞉ mo tameiya꞉ laowa꞉ ekita꞉ mo hoke hau pia꞉ somena꞉ o hoke hau pa꞉la꞉ma꞉ lea꞉ somena꞉ na laawa꞉me. Kotoeki na pikita꞉ Koda꞉na꞉ leke popelekena꞉ mo ikana꞉ma꞉ niki pa꞉ta꞉ pukima꞉ homelemeeki iki pa꞉ta꞉ kone peneme yaaluekema꞉ pua꞉me.

¹³Koto ekina꞉ yeketa꞉ nikita꞉ honkopu hawaememe. Kotoeki homeke dia꞉ya꞉la꞉pate pa ikana꞉ma꞉ Taitasi ta꞉na꞉ma꞉ homo tiaemeke handaa ipikana꞉ma꞉ iki pa꞉ta꞉ ta꞉na꞉ wopu homea꞉me. Nikana꞉ma꞉ kutu pia꞉eki handolo hata꞉ niki make ta꞉na꞉ tieke wopu pia꞉me.

¹⁴I̱ma꞉ta꞉ ipiki pa꞉ta꞉ ika꞉ pi lawaowa꞉me. Kutupa ikana꞉ma꞉ta꞉ I̱ta꞉ na olopuniano lememe. Nikana꞉ma꞉ta꞉ iki pa꞉ta꞉ta꞉ ota꞉ pi homeke homeke laa kuma꞉me. Koto tupa꞉ koneta꞉ nikana꞉ma꞉ Taitasi pa꞉ta꞉ ika꞉ pi lawaoma꞉ ekita꞉ ota꞉ekie laa handa꞉ ula꞉me.

¹⁵Koto ekina꞉ta꞉ ipikana꞉ma꞉ iki pa꞉ta꞉ pukima꞉ homa꞉la꞉ ekita꞉ honkopu hao daeyatia pula꞉me. Mo ikana꞉ma꞉ ipika꞉ walea꞉ ekimanu koto kone opua pimime. Kutupa make ikana꞉ma꞉ ipiki paala꞉ma꞉ make pututuma꞉ make homolo hata꞉ handa꞉ mimi ekina꞉ make loa꞉me.

¹⁶I̱ta꞉ ika꞉na꞉ ti laapeke ya꞉ka꞉ta꞉me hone witolo hata꞉ ta꞉na꞉ tieke wopu pa꞉la꞉me.