Read Sembeleke 2 Kotindi 8 Bible Online

2 Kotindi 8 - Sembeleke bible

2 Kotindi 8

¹Nika꞉ kame tonuo nika꞉ honema꞉ta꞉ mo Koda꞉na꞉ a꞉ta꞉ma꞉ homa tamba꞉ mina꞉la꞉ ekita꞉ mo Ma꞉sedonia siosimanu pa꞉ta꞉ hala꞉la꞉eki ikana꞉ma꞉ hone uemena꞉ hone pa꞉la꞉me.

²Mo wanda꞉halita꞉ ika꞉ mutia peme ka꞉nda꞉ manuma꞉ta꞉ ota꞉ hoke tupa꞉ la handea꞉pate ika꞉ ta꞉na꞉ma꞉ homeme ekita꞉ ota꞉ tieke aneke yaeyeke handaa ikita꞉ natehali wanda꞉hali hata꞉ kone ika꞉ alemanu pa haleme ekita꞉ ota꞉ ankulake hau pimime.

³I̱ma꞉ iki pa꞉ta꞉ ota꞉ pi alo ekita꞉ ika꞉ haleme ekita꞉ ota꞉ hala꞉peke ya꞉la꞉ tupa꞉ make ota꞉ haka꞉ta꞉pake tupa꞉ make halememe. Ika꞉ hone lombei peake tupa꞉ta꞉

⁴mo Diudia da kenke pa꞉ta꞉ haleme Koda꞉na꞉ wanda꞉hali tamba꞉ mina꞉la꞉eki pa꞉ta꞉ ikana꞉ma꞉ make tamba꞉ mina꞉la꞉eki pa peomonope laa niki pa꞉ta꞉ honke tieke lememe.

⁵Kutu pimi hauma꞉ta꞉ nikana꞉ma꞉ pina꞉ lawee laa hone uma꞉ ekita꞉ ota꞉ ankulao pimime. Titina꞉ta꞉ iki kone Koda꞉ pa꞉ta꞉ halememe. Kutupata꞉ Koda꞉na꞉ hone pa꞉la꞉eki pa꞉ta꞉ yama꞉ta꞉ ikita꞉ niki pa꞉ta꞉ make kimime.

⁶Koto ekina꞉ nikana꞉ma꞉ do e kini pia꞉ some Taitasi pa꞉ta꞉ do ta꞉ta꞉ ma꞉nda꞉ piki pukima꞉ homa꞉la꞉ e ikana꞉ma꞉ paeyamena꞉yeke tamba꞉ mu hapeke laa honke loma꞉me.

⁷Ikita꞉ ika꞉ wia halemeeki paeyao pa꞉ta꞉ta꞉ hamoko halememe. Ika꞉ hone tulaasemeeki pa꞉ta꞉ make pi aleme pa꞉ta꞉ make hone witelemeeki pa꞉ta꞉ make ika꞉ a̱i̱ koto kone tamba꞉ muluekema꞉ hone witeleme pa꞉ta꞉ make kutupa niki pa꞉ta꞉ pukima꞉ homeleme ekima꞉ make loa꞉me. Koto ekina꞉ta꞉ nika꞉ hone pa꞉la꞉ ekita꞉ ikana꞉ma꞉ do pukima꞉ homa꞉la꞉ ekina꞉ e poka꞉la꞉ pa꞉ta꞉ ta꞉na꞉ma꞉ homolo hata꞉ haka꞉ta꞉pao mandaneeki pa haloemena꞉yeke loa꞉me

⁸I̱ma꞉ta꞉ mana꞉ pimanu ma꞉nda꞉ na lo witolome. Pate mo mandane wanda꞉halima꞉ a̱i̱ tamba꞉ muluekema꞉ hone witelemeeki waloloeki pa꞉ta꞉ yama꞉ I̱ma꞉ ika꞉ pukima꞉ homeleme ekita꞉ ekipape la handuluekema꞉ pitolome.

⁹Ikana꞉ma꞉ta꞉ nika꞉ Tekehali Yesu Ketisona꞉ a꞉ta꞉ma꞉ homa tamba꞉ mina꞉la꞉ ekita꞉ hone wilimime. Ipikita꞉ hamoko tieke hayekepate iki tamba꞉ muluekema꞉ yeke ipikita꞉ nate hali au leekeme. Kotota꞉ ipika꞉ natehali au leeke ekima꞉ iki hamoko hawaluekema꞉ pa꞉la꞉me.

¹⁰Ya honema꞉ta꞉ mo hande paeya꞉ bapina꞉ kini pimi ekita꞉ ame do paeyaasota꞉ a꞉pa꞉la꞉me hone witolome. Tamba꞉ muluekema꞉ homeke dia꞉ya꞉la꞉pate pa puluekema꞉ hone witelemeeki make ikita꞉ titina꞉ amba꞉la꞉e.

¹¹Koto ekina꞉ta꞉ ame tiao ika꞉ kini pimieki a̱i̱ paeyaapee. Mo ta꞉na꞉ma꞉ homolo hata꞉ dupa pulumeke laa la꞉ wimi tupa꞉ kone paeyaaluekema꞉ make a̱i̱ paeyaalumeke laa hone wipee. Kutupa make ame do wia halemeeki pita꞉ pipee.

¹²Ikita꞉ ta꞉na꞉ma꞉ homolo a̱i̱ haluekema꞉ hone wimika꞉na꞉ta꞉ kota꞉ Koda꞉ma꞉ta꞉ mo ika꞉ pa haluekema꞉ wia haleme aleta꞉ milieke. Pate mo na wia haleme alena꞉ dia꞉me.

¹³Mandane wanda꞉hali ika꞉ ka꞉nda꞉manu yapa꞉ peaaso hata꞉ ikita꞉ ka꞉nda꞉ma꞉ homaasome laa na loa꞉pate pa ameta꞉ ikita꞉ ala꞉ta꞉ ala꞉ta꞉ wopu wia halemeke handaa mo dia꞉ya꞉la꞉ wanda꞉hali tamba꞉ mimika꞉na꞉ta꞉ ota꞉ ana꞉ pa꞉la꞉me. Kutupa nate ma꞉nda꞉ a꞉nda꞉ iki dia꞉ya꞉ka꞉na꞉ta꞉ mo wanda꞉halima꞉ta꞉ ika꞉ anekema꞉ wia haemeka꞉na꞉ta꞉ iki make tamba꞉ milieke. Dupita꞉la꞉ ekima꞉ta꞉ telipuna꞉ta꞉ ana꞉ sikina꞉ tamba꞉ mina꞉la꞉me.

¹⁵Koto ekina꞉ mo Baiboloma꞉ alota꞉ Mo aneke hapu mombelea꞉ someta꞉ lombeipiki tupa꞉ na wia haya꞉me. Kutupa mo hosiki siki mombelea꞉ someta꞉ ota꞉ dia꞉ya꞉la꞉ tupa꞉ na wia haya꞉me la꞉la꞉me. Taitasi pita꞉ ipika꞉ yankeke tonu

¹⁶Nikana꞉ma꞉ iki tamba꞉ muluekema꞉ hone wopu uluma꞉ tupa꞉ Koda꞉ma꞉ Taitasi mea hone wopu utiala꞉ ekina꞉ Koda꞉ pa꞉ta꞉ keiyae aloma꞉me.

¹⁷Nikana꞉ma꞉ ipiki pa꞉ta꞉ nikana꞉ma꞉ polena꞉e loma꞉ ekita꞉ opua ta꞉na꞉ma꞉ homea꞉me. Koto loma꞉ ekima꞉ homeke dia꞉ya꞉la꞉pate ipika꞉ honema꞉ kone iki pa꞉ta꞉ tamba꞉ mulua꞉ ipulueke hone wia꞉ ekina꞉ loma꞉me.

¹⁸Ipiki yaapota꞉ mo kame ma꞉nda꞉ ipikita꞉ siosi paeyao pa꞉ta꞉ ipika꞉ mo pi seliapo wala꞉la꞉ ekina꞉ ota꞉ epeke halie lo haleme kame tapaasoma꞉me.

¹⁹Kutupa make ipikita꞉ nikana꞉ma꞉ do pukima꞉ homa꞉la꞉ ekina꞉ e pokotia pominoloma꞉ ale pa꞉ta꞉ mandakena꞉ pomiomono yeke mo siosi manuma꞉ ma̱leke lila꞉me. Do e pokoloma꞉ ekina꞉ teketa꞉ mo Tekehalina꞉ pa̱a̱na꞉ make mo nikita꞉ tamba꞉ muluekema꞉ hone wopu witoloma꞉me laa waluekema꞉ pitoloma꞉me.

²⁰Nikita꞉ do epeke pa kita꞉la꞉eki mea pominoloma꞉ pa꞉ta꞉ mandane wanda꞉halima꞉ hambilikima꞉ hambilikima꞉ pea la la peaama꞉na꞉yeke leke wia hata꞉ pitoloma꞉me.

²¹Nika꞉ hone homeke homeketa꞉ ota꞉ tikitiki hau homeke puluekema꞉ hone witoloma꞉me. Ota꞉ Koda꞉na꞉ leke popelekena꞉ homeke dia꞉ya꞉la꞉pate pa kenke wanda꞉halina꞉ leke popelekena꞉ make loa꞉me.

²²Koto ekina꞉ta꞉ mo haliweki ame̱le̱ nika꞉ kame taa tapaasoma꞉ handa꞉e. Nikana꞉ma꞉ta꞉ hoto paeyao ipiki la handoma꞉me. Pate ipikita꞉ hoto paeyao tamba꞉ muluekema꞉ hone wopu ula꞉eki handa꞉ uluma꞉me. Ipikana꞉ma꞉ amba꞉ta꞉ iki tamba꞉ muluekema꞉ hone wia꞉pate pa ameta꞉ iki pa꞉ta꞉ hone tulaala꞉ ekima꞉ a̱i̱ tamba꞉ muluekema꞉ hone wopu wia hala꞉me.

²³Taitasita꞉ ipikita꞉ yaka ta꞉ma꞉ni hata꞉ iki tamba꞉ muluekema꞉ I̱ yaapo e poko hala꞉me. Kutupa mo ipiki ame̱le̱ pula꞉ mandane kame tonuta꞉ do siosi manuna꞉ bikina꞉ ipula꞉ hata꞉ta꞉ Ketisona꞉ biki daeyaena꞉ la꞉la꞉ tapakee.

²⁴Ika꞉ pukima꞉ homa꞉la꞉ ekita꞉ mo tapake pa꞉ta꞉ wala꞉pa꞉peke. Pa ekipeke mo siosi manuma꞉ hone witolota꞉ mo nikana꞉ma꞉ ika꞉ pi laoma꞉ ekita꞉ ota꞉ ya꞉ka꞉ta꞉me laa hone wina꞉ loa꞉me.