Read Sembeleke Ka꞉leisia 1 Bible Online

Ka꞉leisia 1 - Sembeleke bible

Ka꞉leisia 1

¹I̱ Polo I̱ma꞉ aposolo hano wi la꞉la꞉ ekita꞉ halima꞉ o hali pa꞉ta꞉ yama꞉ wi na lea꞉pate mo Yesu Ketisoma꞉ make mo naku pa꞉ta꞉ ipiki mea da꞉taeyeke Apa꞉ Koda꞉ma꞉ make ipiliki telipina꞉ma꞉ I̱ wi la꞉la꞉me.

²Do mandake haloma꞉ kame tonuma꞉ I̱ ame̱le̱ apa꞉tao mo iki Ka꞉leisia kenke pa꞉ta꞉ haleme siosimanu pa꞉ta꞉ nika꞉ a꞉ta꞉pa꞉la꞉ pi la꞉neaasoma꞉me.

³Apa꞉ Koda꞉ make Tekehali Yesu Ketiso ipilikana꞉ma꞉ a꞉ta꞉ma꞉ homolo tamba꞉ mina꞉la꞉eki make puki lopa꞉niaasa꞉eki make iki pa꞉ta꞉ kina꞉e.

⁴Ketisoma꞉ nika꞉ Apa꞉ Koda꞉na꞉ hone pa꞉la꞉ ekina꞉ ipika꞉ kakena꞉ homolo hata꞉ nika꞉ hoke hauna꞉ yenkita꞉ ipika꞉ lokema꞉ mina꞉ homeekeme. Kutu pieke ekita꞉ do hoke natena꞉ haloma꞉eki pa꞉ta꞉ niki peteluekema꞉ piekeme.

⁵Koto ekina꞉ta꞉ Koda꞉ ipika꞉ biki tieke wina꞉ yeiya꞉ latiki latiki pu hamana꞉e. Kutu pina꞉e. Pi seliapota꞉ homeke homeke ula꞉eki

⁶A꞉pei. Ikana꞉ma꞉ pitelememe ala꞉eki opitolo I̱ma꞉ tola꞉tia pominolome. Ikita꞉ nate aneke hapu a꞉nda꞉ dia꞉ya꞉pate mo hande Ketisona꞉ a꞉ta꞉ma꞉ homa꞉la꞉eki pa꞉ta꞉ yama꞉ iki wi lea꞉ Koda꞉ta꞉ koto kone mina꞉pa꞉laaso hata꞉ pi seliapo ma꞉nda꞉ taa miniki haemeka꞉ta꞉me.

⁷Koto pimika꞉ta꞉ pateta꞉ I̱ma꞉ta꞉ pi seliapota꞉ ma꞉nda꞉ ota꞉ dia꞉me hone witolome. Koto alo ekita꞉ mandane wanda꞉halima꞉ mo Ketisona꞉ ota꞉ pi seliapo topo topo puluekema꞉ taapelememe.

⁸Kota꞉ nikana꞉ma꞉ kone make o mo hepeni nane a꞉pa꞉la꞉ enisoloma꞉ make amba꞉ mo nikana꞉ma꞉ iki pa꞉ta꞉ waloma꞉ pi seliapoma꞉ na handeke ata꞉ka꞉piki pi seliapo ma꞉nda꞉ iki pa꞉ta꞉ walea꞉ka꞉na꞉ta꞉ kutu piki hau pita꞉la꞉ someta꞉ ota꞉ hoke ti to hala꞉ pa꞉ta꞉ mea lopaapeke alee.

⁹Amba꞉ hande loma꞉pate ame I̱ma꞉ paa alome. Ma꞉nda꞉ epima꞉ mo ikana꞉ma꞉ amba꞉ miniki haeme pi seliapoma꞉ na handeke ta꞉ta꞉ piki pi a꞉nda꞉ iki pa꞉ta꞉ walea꞉ka꞉na꞉ta꞉ kota꞉ kutupiki hau pita꞉la꞉ someta꞉ ota꞉ hoke ti to hala꞉ pa꞉ta꞉ mea lopaapeke alee.

¹⁰Do alo pima꞉ta꞉ mo wanda꞉hali ta꞉na꞉ma꞉ homa꞉ tiaaluekema꞉ alope. Dia꞉me. Ota꞉ dia꞉me. I̱ma꞉ta꞉ Koda꞉ma꞉ ta꞉na꞉ma꞉ homolo pa꞉la꞉eki weitolome. I̱ma꞉ta꞉ wanda꞉halima꞉ ya biki daeyaena꞉ taapolope. Dia꞉me. Koto hau puluekema꞉ taapoa꞉ka꞉na꞉ta꞉ kota꞉ I̱ta꞉ Ketisona꞉ e pokaaso hali na hapeke ya꞉la꞉me. Polo aposolo hali hayeke ekina꞉ pi

¹¹Ya kametonuo. I̱ma꞉ iki pa꞉ta꞉ lakionoe. Kota꞉ mo I̱ma꞉ walo halo Pi Seliapota꞉ kenke haliweki pa꞉ta꞉ pa꞉la꞉ pi dia꞉me.

¹²Kuta make hali ma꞉nda꞉ma꞉ I̱ pa꞉ta꞉ na laku make na walo pia꞉me. Ota꞉ Yesu Ketisoma꞉ I̱ pa꞉ta꞉ peneme yao walea꞉me.

¹³I̱ma꞉ mo hande Diu tapakena꞉ hau miniki haowa꞉ tomona꞉ pea꞉tiki pua꞉ hau manuna꞉ pita꞉ amba꞉ opu haememe. Kuta I̱ma꞉ mo hande Koda꞉na꞉ siosi wanda꞉hali pa꞉ta꞉ a꞉ta꞉ma꞉ na homeke tanda halolo hata꞉ ota꞉ hoeyaaluekema꞉ taapo haowa꞉me.

¹⁴I̱ma꞉ mo hande Diu wanda꞉halina꞉ haumanu muluekema꞉ta꞉ ya mandake daeyoma꞉ Diu wekitonu bepolao lombei pitolo hata꞉ nika꞉ atekena꞉ atekena꞉ mana꞉ pimanu hone ota꞉ wopu ua꞉me.

¹⁵Kutu pua꞉pate Koda꞉ma꞉ a꞉ta꞉ma꞉ homa tamba꞉ mina꞉la꞉ hali hata꞉ I̱ma꞉ ipika꞉ e pokaano ya ama꞉na꞉ weleke pa꞉ta꞉ pitono kone I̱ ma̱leke liekeme. Kutupa wetepena꞉ I̱ma꞉ Yesuna꞉ Pi Seliapota꞉ mo Diu tapake na hake ta꞉ta꞉piki tapakemanu pa꞉ta꞉ walalo ponoyeke Koda꞉ ipika꞉ eiyeke I̱ handono waluekema꞉ hone pieke di opolo epeeketa꞉ I̱ta꞉ ma꞉nda꞉ yaapo pi hotuluekema꞉ na pu make

¹⁷mo Diutuseleme nane haemeke titina꞉ aposolo haliweki handolo make na peke pa tikitiki mo A꞉teibia kenke pa꞉ta꞉ pua wetepeta꞉ mo Damasikasi da nane paa la꞉ka꞉la epoa꞉me.

¹⁸Mo Koda꞉na꞉ eiyeke I̱ pa꞉ta꞉ peneme yaeya꞉ hoki nane bapi tepo hao Diutuseleme da nane pua Pida yaapo pi pi loluekema꞉ pula yaapona꞉ ipika꞉ da pa꞉ta꞉ mandake haopa꞉me.

¹⁹Koto hata꞉ta꞉ I̱ma꞉ aposolo hali ma꞉nda꞉ na handoa꞉pate pa mo Tekehalina꞉ hameke Dia꞉mesi homeke handoa꞉me.

²⁰Do wape pitolo pita꞉ ota꞉ pi alome. Ota꞉ diki honumakesiki I̱ma꞉ yapi alo na loa꞉me. Ota꞉ Koda꞉ma꞉ handa꞉la꞉me.

²¹Wetepena꞉ta꞉ Sitia Silisia kenke yaapo pa꞉ta꞉ hayeke damanu pa꞉ta꞉ poa꞉me.

²²Koto pita꞉ma꞉ta꞉ mo Diudia kenke pa꞉ta꞉ haemeke siosi wanda꞉halima꞉ ya leke popeleketa꞉ na handemekepate

²³pa mandane wanda꞉halima꞉ mo hande niki pa꞉ta꞉ tanda ku haya꞉ somema꞉ta꞉ ipika꞉ hande hoeyaaluekema꞉ taapea꞉ hauna꞉ pi kone ameta꞉ pa wala꞉tiki pu hala꞉me lemeke pi opuata꞉

²⁴kota꞉ koto ekina꞉ta꞉ ikana꞉ma꞉ Koda꞉na꞉ biki yeiya꞉ laemekeme.