Read Sembeleke Epesese 1 Bible Online

Epesese 1 - Sembeleke bible

Epesese 1

¹I̱ Polota꞉ Koda꞉ ipika꞉ hone pa꞉la꞉ ekina꞉ Yesu Ketiso ipika꞉ aposolo hali halome. I̱ma꞉ do wape pitolo ekita꞉ ikita꞉ Koda꞉ ipika꞉ wanda꞉hali pa꞉ta꞉ pitolome. Ikita꞉ Yesu Ketiso pa꞉ta꞉ hone tulao hata꞉ Epesese da pa꞉ta꞉ halememe.

²Koda꞉ nika꞉ Apa꞉ma꞉ make Yesu Ketiso nika꞉ Tekehalima꞉ make ipilikana꞉ma꞉ iki pa꞉ta꞉ pa hameke a꞉ta꞉ma꞉ homolo hata꞉ ika꞉ puki lopa꞉niaepeka꞉na꞉ta꞉ epelieke. Koda꞉ma꞉ Ketiso pa꞉ta꞉ yama꞉ niki epeaala꞉eki

³Tekehali Yesu Ketiso ipika꞉ Apa꞉ Koda꞉na꞉ pi nikana꞉ma꞉ laamana꞉e. Nikita꞉ Ketiso yaapo hamonota꞉ Koda꞉ma꞉ niki ota꞉ epeaala꞉ ekina꞉ loa꞉me. Hepeni nane hala꞉ ekimanu paeyaota꞉ nika꞉ temoko tamba꞉ mina꞉yeke amba꞉ ka꞉la꞉me.

⁴Koda꞉ma꞉ do kenke na wepia wina꞉ leeke natena꞉ta꞉ nikita꞉ Ketiso yaapo hata꞉ ipika꞉eki hamono niki amba꞉ talopu ma꞉la꞉me. Nikita꞉ ipika꞉ leke popeleke nane hata꞉ta꞉ yako pea hata꞉ ekia꞉nda꞉ na piki wanda꞉hali hamonoyeke ma꞉la꞉me.

⁵Koda꞉ma꞉ pukima꞉ homolo hata꞉ta꞉ Yesu Ketisoma꞉ nikita꞉ Koda꞉ ipika꞉ eiyekemanu hamono ipiki pa꞉ta꞉ hatuku epena꞉yeke hone amba꞉ wiekeme. Koto ekita꞉ Koda꞉ma꞉ hone pieke ekina꞉ hone wiekeme.

⁶Koda꞉ma꞉ niki pa꞉ta꞉ pa hameke a꞉ta꞉ma꞉ wotu homa꞉la꞉ ekina꞉ make ipika꞉ hone pieke Eiyeke niki kitolo pa hameke kita꞉la꞉ ale tonka꞉na꞉ ka꞉la꞉ ekina꞉ make Koda꞉na꞉ pi laamana꞉e.

⁷Ketiso homeeke ekima꞉ nikita꞉ ka꞉la꞉pa꞉ tapao hamono laata꞉ nika꞉ hoke hau poloma꞉ ekimanu ipika꞉ wema꞉ pa paeyaala꞉me. Koda꞉ ipika꞉ pa hameke a꞉ta꞉ma꞉ homa꞉la꞉ ekita꞉ ota꞉ wopue.

⁸Ipikana꞉ma꞉ niki pa꞉ta꞉ aneke hapu wopu ka꞉la꞉me. Koda꞉ma꞉ta꞉ pita꞉la꞉ ekimanu handa ipikana꞉ma꞉ hone wopu wiata꞉

⁹amba꞉ ipikana꞉ma꞉ do hau pulueke hone wiekeeki pa꞉la꞉me. Kutupata꞉ hande amba꞉ ipika꞉ a꞉mbao wieke honeta꞉ Ketisoma꞉ yaena꞉yeke koto make ame niki pa꞉ta꞉ peneme yaala꞉me.

¹⁰Koda꞉ma꞉ ipika꞉ hone u hala꞉ ekita꞉ dupae. Kenke ya yaapo nane ula꞉ ale hala꞉ ekimanu paeyaota꞉ hande Koda꞉ma꞉ wepia haena꞉ la꞉la꞉ ekimanu paeyao ipikana꞉ma꞉ mea momba꞉laota꞉ kutupa Ketisota꞉ you haena꞉ lelieke. Ipika꞉ di tunkulia꞉ka꞉na꞉ta꞉ Koda꞉ma꞉ koto hau pu paeyaalieke.

¹¹Hau paeyao pita꞉la꞉ ekita꞉ Koda꞉ ipika꞉ hone wia leeke ekina꞉ kone pita꞉la꞉me. Amba꞉ titi panake pa꞉ta꞉ kone Koda꞉ma꞉ hone wieke handata꞉ ipika꞉ hone wiekeeki pitolo hata꞉ niki talopu meata꞉ Ketiso yaapo ta꞉ma꞉ni pea hata꞉ ota꞉ ipika꞉ wanda꞉hali hamono la꞉la꞉me.

¹²Koto pa꞉la꞉ ekina꞉ titina꞉ Ketiso pa꞉ta꞉ hone tulaaloma꞉ wanda꞉hali nikana꞉ma꞉ amba꞉la꞉ hande pa̱a̱ pa꞉la꞉ Koda꞉ ipika꞉ pi laamana꞉e.

¹³Koto ekita꞉ iki pa꞉ta꞉ make pa꞉la꞉me. Ikana꞉ma꞉ta꞉ hande iki mea da꞉taalo pieke Pi Seliapo opuata꞉ Ketiso pa꞉ta꞉ hone tulaememe. Kutu pimiki handata꞉ Koda꞉ma꞉ ipika꞉ la꞉ wieke Holi Sipitidi iki kitolo hata꞉ta꞉ ikita꞉ ipika꞉ekie laa ti wia꞉me.

¹⁴Holi Sipitidi ka꞉la꞉ ekita꞉ kota꞉ Koda꞉ma꞉ ipika꞉ wanda꞉hali pa꞉ta꞉ la꞉ wiekeeki ota꞉ yaalo pa꞉la꞉ ekina꞉ ti witolo pa꞉la꞉me. Dupa make Koda꞉ma꞉ ipika꞉ wanda꞉halita꞉ ota꞉ ka꞉la꞉pe tapao hao hamono la꞉la꞉eki wopu wala꞉la꞉me. Hande pa̱a̱ pa꞉la꞉ Koda꞉ ipika꞉ pi laamana꞉e. Poloma꞉ Epesese wanda꞉hali pa꞉ta꞉ yeni peaeyekeeki

¹⁵Ikana꞉ma꞉ Tekehali Yesu pa꞉ta꞉ hone tulaalemeeki make Koda꞉na꞉ wanda꞉hali paeyao pa꞉ta꞉ pukima꞉ homelemeeki make I̱ma꞉ opu haota꞉

¹⁶iki pa꞉ta꞉ hone witolo hata꞉ Koda꞉ pa꞉ta꞉ keiyae pi alo ekita꞉ I̱ma꞉ na mina꞉pa꞉laake la꞉tiki pu halome. I̱ma꞉ iki pa꞉ta꞉ hone witolo hata꞉ yeni pu halo ekita꞉ dupa pu halome.

¹⁷Hande nika꞉ Tekehali Yesu Ketiso ipika꞉ Koda꞉ta꞉ hande pa̱a̱ pa꞉la꞉ Atekema꞉ Sipitidi iki kina꞉yeke pu halome. Kutupa koto Sipitidima꞉ epeke hone wita꞉la꞉eki iki kiaata꞉ Koda꞉ hala꞉eki wopu handoemena꞉yeke Sipitidima꞉ la kina꞉yeke yeni pu halome.

¹⁸I̱ma꞉ yeni pu halo ekita꞉ ika꞉ hone lumbu wia ipika꞉ pa̱a̱ pa꞉la꞉eki handoemena꞉yeke pu halome. Kotoeki handemeka꞉na꞉ta꞉ Koda꞉ma꞉ ipika꞉ pi la꞉ witolo hata꞉ ipika꞉ wanda꞉hali wotu epeaalo pa꞉la꞉ ekimanu ota꞉ seliapo pikieki hone wilimikie.

¹⁹Kutupa make niki hone tulao haloma꞉ wanda꞉hali niki tukiki pa꞉ta꞉ pita꞉ ipika꞉ wele pita꞉la꞉eki daeyaatiki pua꞉pekeeki hone wilimikie. Do hande niki tukiki pa꞉ta꞉ pila꞉ wele pita꞉la꞉ ekita꞉

²⁰hande Koda꞉ma꞉ wele wotu pitolo hata꞉ Ketisota꞉ homa wieke lapa꞉ pa꞉ta꞉ kone mea tiaota꞉ oli hepeni nane ipika꞉ popeke kiki nane mea pitaeyekeeki kotoeki kone niki tukiki pa꞉ta꞉ pila꞉me.

²¹Ketisoma꞉ta꞉ oli hepeni kilu tumbuao hata꞉ koto nane haleme you haliweki make biki ula꞉ haliweki make wele pita꞉la꞉ ekimanu make teke haliweki make paeyao ipikana꞉ma꞉ lu tombuao pila꞉me. Do kenke ya yaapo pa꞉ta꞉ biki tieke ula꞉ haliweki paeyao mandata꞉ ame make wetepena꞉ make Ketiso homeke pila꞉me.

²²Koda꞉ma꞉ ala꞉ta꞉ ala꞉ta꞉ paeyao Ketisona꞉ anke oto pa꞉ta꞉ mea wiaata꞉ Ketisota꞉ ala꞉ta꞉ ala꞉ta꞉ paeyao manda Tumiki Tekehali haena꞉ laata꞉ ipikita꞉ siosi wanda꞉hali pa꞉ta꞉ ka꞉la꞉me.

²³Hande siosita꞉ Ketiso ipika꞉ loke haloma꞉me. Ketisoma꞉ta꞉ ala꞉ta꞉ ala꞉ta꞉ paeyao tukiki pa꞉ta꞉ pita꞉ tumba ula꞉me. Kutupa siosi wanda꞉hali tukiki pa꞉ta꞉ pita꞉ta꞉ tumba pila꞉me.