Read Sembeleke Epesese 4 Bible Online

Epesese 4 - Sembeleke bible

Epesese 4

¹I̱ta꞉ Poloma꞉ Tekehalina꞉ e pokaaso ekita꞉ dipula pita꞉ kone iki pa꞉ta꞉ hone wotu witolo hata꞉ doeki alome. Koda꞉ma꞉ wi la꞉la꞉ ekina꞉ iki do tupa꞉ tikitiki yao hapa꞉peke.

²Homu pea yopu hata꞉ta꞉ hoto paeyao handeteke hatiki pea꞉pa꞉peke. Ika꞉ kone tamba꞉ mu alu alu pilimi ekima꞉ta꞉ ika꞉ pukima꞉ homelemeeki peneme yao wala꞉pa꞉peke.

³Mo hande Sipitidima꞉ homeke tupa꞉ halemeeki wala꞉la꞉ ekita꞉ hoeyaapa꞉na꞉ ika꞉ kone a꞉nda꞉ pelia hata꞉ handeteke hapa꞉peke.

⁴Loke homeke kone halememe. Kutupa Sipitidi make homeke hala꞉me. Koda꞉ma꞉ iki wi la꞉la꞉ ekina꞉ homeke kone handeteke halememe.

⁵Tekehali homeke make hone tulaasoma꞉eki homeke make bapitaisi pita꞉la꞉eki make homekee.

⁶Kutupa Koda꞉ make homeke hata꞉ niki paeyaona꞉ Apa꞉ Tekehali hata꞉ ala꞉ta꞉ ala꞉ta꞉ paeyao tukiki pa꞉ta꞉ hata꞉ hau paeyao pa꞉ta꞉ ipikana꞉ma꞉ peao hala꞉me.

⁷Ketisoma꞉ ula꞉ hone tupa꞉ niki paeyao pa꞉ta꞉ ta꞉ta꞉ ta꞉ta꞉ pikieki amba꞉ ka꞉la꞉me.

⁸Mo Baibolo bukama꞉ ala꞉ tupa꞉Ota꞉ oli manda a꞉meiya pulu hata꞉ ipiki ame̱le̱ dipula haliweki wopu hatuku puata꞉ wanda꞉hali pa꞉ta꞉ hala꞉la꞉ ekimanu haleekeme la꞉la꞉me.

⁹Kutupa hande ipikita꞉ manda a꞉meiya peeke ekita꞉ eki puluekema꞉ piekepe. Doeki pa꞉ta꞉ ala꞉me. Titina꞉ amba꞉la ipiki hola꞉pa꞉niao do kenke tukiki nane oto pa꞉ta꞉ leke hola꞉pa꞉niaeyekeme.

¹⁰Kutupa hande hola꞉pa꞉niaeyeke hali kone ota꞉ oli manda hepeni pa꞉ta꞉ a꞉meiya puata꞉ oli ya kenke yaapo ipika꞉ hala꞉ ekima꞉ tumbaaluekema꞉ peekeme.

¹¹Ipikana꞉ma꞉ kone wanda꞉hali pa꞉ta꞉ hala꞉la꞉ alemanu dupa haleekeme. Mandaneeki aposolo haliweki haena꞉ laata꞉ mandaneeki hande Pi Seliapo wala꞉la꞉ haliweki haena꞉ laata꞉ mandaneeki Koda꞉na꞉ pi la꞉ mea hala꞉la꞉ haliweki haena꞉ laata꞉ mandaneeki pasida haliweki make disa haliweki make haena꞉ la꞉la꞉me.

¹²Kutupieke ekima꞉ Koda꞉na꞉ wanda꞉hali paeyao ana꞉na꞉ kone hata꞉ ipika꞉ e pokaena꞉yeke piekeme. Kutu pita꞉la꞉ ekima꞉ Ketiso tapake wanda꞉halita꞉ daeya꞉ tia pena꞉yeke pa꞉la꞉me.

¹³Kutu pa꞉la꞉ ekima꞉ niki paeyao homeke tupa꞉ hata꞉ta꞉ hone tulaasoma꞉eki make homeke kone Koda꞉ ipika꞉ Eiyeke handoloma꞉eki make homekeeki kone handulumeke. Kutu puma꞉ka꞉na꞉ta꞉ nikita꞉ keileke haliweki hata꞉ Ketiso hala꞉ tupa꞉ kone halumeke.

¹⁴Koto tupa꞉ haoma꞉ka꞉na꞉ta꞉ nikita꞉ weki wandikisunu leke na halumeke. Hande poma꞉ dawala mea pominolo pita꞉la꞉ tupa꞉ mandane yayapiki pi aleme haliwekima꞉ ika꞉ ta꞉ta꞉ piki pi make ika꞉ hone wia makeaaseme ekimanu make wanda꞉hali walolo hata꞉ hao hoeyaena꞉ alememe.

¹⁵Koto ekita꞉ ana꞉ na pa꞉la꞉me. Nikana꞉ma꞉ta꞉ pukima꞉ homolo hata꞉ ota꞉ pimanu lomana꞉e. Kutu puma꞉ka꞉na꞉ta꞉ ota꞉ hau pitolo hata꞉ Yesu ame̱le̱ mandakena꞉ halumeke. Ipikita꞉ nika꞉ you hata꞉ tieke hala꞉me.

¹⁶Kutupa nika꞉ lokena꞉ kiki anke paeyao ipiki pa꞉ta꞉ tunaaloma꞉me. Mo lokena꞉ hala꞉ alemanu paeyao tuna tuna pea ika꞉ kaukata pea꞉peke ekimanu pitolo hata꞉ hande loke paeyao daeya tia pulu hata꞉ ipika꞉ kone pukima꞉ homolo epeke tupa꞉ daeta꞉la꞉me. Ketiso pa꞉ta꞉ panakeeki mina꞉la꞉eki

¹⁷Koto ekina꞉ Tekehalina꞉ bikina꞉ I̱ma꞉ iki pa꞉ta꞉ do pi tieke wotu alome. Hande pi na miki wanda꞉hali haleme tupa꞉ na hapa꞉peke.

¹⁸Mo wanda꞉halima꞉ta꞉ ika꞉ hone witeleme ekita꞉ timba꞉ la꞉pa pulu hata꞉ epeke hone ma꞉nda꞉ na witelememe. Ikita꞉ hone na wiki kiaaso hata꞉ na mineleme ekima꞉ Koda꞉na꞉ da꞉taasa꞉ ekita꞉ na handelememe.

¹⁹Kutu piteleme wanda꞉halima꞉ta꞉ yaala꞉ma꞉ na homeke hoke ekimanu puluekema꞉ taapolo hata꞉ pamba꞉ na piki haumanu pitolo hata꞉ paa putia pulimime.

²⁰Ikana꞉ma꞉ Ketiso hau sukulu pitolo hamina꞉ta꞉ koto hau manuta꞉ ma꞉nda꞉ma꞉ iki pa꞉ta꞉ na waleekeme.

²¹Yaka honema꞉ta꞉ do hande Yesuna꞉ hau ota꞉ ekimanu waleeke ekita꞉ amba꞉ opitolo pelememe.

²²Do ota꞉eki manuta꞉ dupae. Ika꞉ amba꞉ hata꞉ pimi hau teketa꞉ ota꞉ baapa꞉peke. Koto ekima꞉ta꞉ iki hao hoeyaaso hata꞉ mo hande amba꞉ hau teketa꞉ ipika꞉ makeaasa꞉ hone pa꞉la꞉ haumanu pu tiaaso hata꞉ ipiki kone hao hoeyaaso make iki make hao hoeyaatiki piekeme.

²³Koto ekina꞉ panake hone witolo hata꞉

²⁴hande panake hau teke mea꞉pa꞉peke. Koda꞉ma꞉ do hande panake hau teke wepa꞉leke handa do panake hau teketa꞉ Koda꞉na꞉ hau kone ana꞉ pa꞉la꞉me. Mo hande panake hau tekema꞉ hali ma꞉nda꞉ pa꞉ta꞉ pita꞉ mo halita꞉ tikitiki yao hata꞉ yakopiki hau piki hali haena꞉ lelieke.

²⁵Koto ekina꞉ yayapiki pi ala꞉eki paapa꞉peke. Nikita꞉ Ketiso ipika꞉ lokena꞉ tunao homekeeki yolo hata꞉ nika꞉ kame pa꞉ta꞉ ota꞉ pi la꞉tiki pulumeke.

²⁶Kutupa make mineke pankemeka꞉na꞉ta꞉ kota꞉ pa hoke hau pilimina꞉ yopu handeteke hapa꞉peke. Nate pambolo haena꞉ mineke panka꞉la꞉eki na pitina꞉ lapa꞉peke.

²⁷Sadanina꞉ pota꞉ ma꞉nda꞉ na pilaapa꞉peke.

²⁸Pake nala꞉ halima꞉ koto hau na piki pa e poka꞉peke ya꞉la꞉me. Ipika꞉ kikima꞉ e epeke tupa꞉ pokolo hata꞉ ala꞉ta꞉ ma꞉nda꞉ dia꞉ya꞉la꞉ wanda꞉hali pa꞉ta꞉ mandaneeki haluekema꞉ hone wina꞉yeke loa꞉me.

²⁹Hoke pi homeke a꞉nda꞉ ika꞉ kakema꞉ na leke wanda꞉hali epeaalo peleme pimanu lapa꞉peke. Kutupa ika꞉ pita꞉ wanda꞉halima꞉ opitolo hata꞉ Koda꞉ ipika꞉ pa a꞉ta꞉ma꞉ homa꞉la꞉eki mina꞉yeke loa꞉me.

³⁰Koda꞉ ipika꞉ Holi Sipitidi make ka꞉nda꞉ma꞉ na homaapa꞉peke. Do ekina꞉yeke loa꞉me. Koda꞉ma꞉ iki ota꞉ ka꞉la꞉pa꞉ tapaaluekema꞉ ipikana꞉ma꞉ mo Holi Sipitidi pitaala꞉ ekima꞉ tombo amba꞉ wiaala꞉me.

³¹Ikana꞉ma꞉ honema꞉ yawa꞉la꞉eki make titipu pikieki kuta kone a꞉mina꞉la꞉eki make mineke panka꞉la꞉eki make tandapiki pi alemeeki make pi la la pitelemeeki make do hande hoke hone witeleme ekimanu paeyo baota꞉

³²iki paeyao homu pea hata꞉ ika꞉ kone pukima꞉ homa꞉ alu alu peata꞉ Koda꞉ma꞉ta꞉ Ketisoma꞉ peaala꞉ ekina꞉ hone witolo hata꞉ ika꞉ hoke haumanu pa paeyaala꞉ ekina꞉ ikana꞉ma꞉ make ika꞉eki kone pa peaa alu alu pea꞉pa꞉peke.