Read Sembeleke 1 Desalonaika 5 Bible Online

1 Desalonaika 5 - Sembeleke bible

1 Desalonaika 5

¹Kametitio. Mo hande haumanu pulu pa꞉la꞉ hau manuna꞉ di o natemanu iki hone wilimi ekina꞉ I̱ma꞉ iki pa꞉ta꞉ wape pea la kia꞉peke na ya꞉la꞉me.

²Hande Tekehali ipika꞉ epolo pa꞉la꞉ Nateta꞉ pake nala꞉ hali timba ipu hala꞉ tupa꞉ opolo epolo pa꞉la꞉ ekita꞉ ika꞉ kone opua hone wopu witelememe.

³Wanda꞉halima꞉ alota꞉ Ameta꞉ ekia꞉nda꞉ pea꞉pekeeki niki dia꞉yalo hata꞉ homu pea haloma꞉me lemeka꞉na꞉ta꞉ kota꞉ mo hoeyaalo pa꞉la꞉ alemanu iki pa꞉ta꞉ ota꞉ koto kone ipilieke. Weki hoki nala꞉ wanda꞉ pa꞉ta꞉ ipula꞉ tanda leke iki pa꞉ta꞉ make epea꞉ka꞉na꞉ta꞉ wendia pua꞉peke na yelieke.

⁴Kametitio. Kutu piliepate ikita꞉ timba ala꞉eki pa꞉ta꞉ na haleme ekina꞉ mo hande Nate epolo pa꞉la꞉ ekita꞉ hande pake nala꞉ halima꞉ a꞉pa penkilipaasa꞉ tupa꞉ iki pa꞉ta꞉ na ipilieke.

⁵Iki paeyaota꞉ nate pa̱a̱ pa꞉la꞉ ekina꞉ wanda꞉hali halememe. Nikita꞉ timba꞉ pa꞉ta꞉ na haloma꞉me.

⁶Koto ekina꞉ta꞉ u̱ pelieleme wanda꞉hali leke na hake tialiao epeke hone wia hamana꞉ pea꞉pa꞉peke aleo.

⁷Timbata꞉ wanda꞉halina꞉ u̱ pelieleme die. Kutupa timba kone wanda꞉halima꞉ hoke ikali naa keaaseme die.

⁸Kutu pu halemepate nikita꞉ pa̱a̱ pita꞉la꞉ ekina꞉ wanda꞉hali haloma꞉me. Koto ekina꞉ta꞉ epeke hone wia hamana꞉ pea꞉pa꞉peke aleo. Nika꞉ hone tulaasoma꞉eki pita꞉ pukima꞉ homoloma꞉ ekita꞉ hakoko a꞉mbaasa꞉ hanka꞉ leke pambaota꞉ Koda꞉ma꞉ niki mea da꞉taalo pa꞉la꞉ ekina꞉ hone puaasoma꞉ ekita꞉ nika꞉ a꞉nda꞉ pita꞉la꞉ you aka꞉ leke pambamana꞉e.

⁹Koda꞉ma꞉ ipika꞉ mineke panka꞉la꞉eki niki pa꞉ta꞉ epena꞉yeke niki na talopu mea hamono lea꞉pate pa Tekehali Yesuma꞉ niki mea da꞉taowaena꞉ leekeme.

¹⁰Yesuma꞉ta꞉ ipiki ame̱le̱ hao hamonoyeke nika꞉eki peaaso homeekeme. Koto ekina꞉ Yesu paa epea꞉ka꞉na꞉ta꞉ amba꞉ homeme wanda꞉hali pita꞉ pa haloma꞉ wanda꞉hali make ala꞉ta꞉ ma꞉nda꞉ dia꞉ma꞉ pa ipiki ame̱le̱ da꞉taa halumeke.

¹¹Koto ekina꞉ta꞉ ame do piteleme tupa꞉ ika꞉ ika꞉ kone sa꞉tia alualu pea tamba꞉ mu alualu pitolo hapa꞉peke. Paeyaaso mana꞉ pi make pelia꞉pa꞉peke la꞉la꞉eki make

¹²Kametitio. Ika꞉ pota꞉manu tondepeao iki waleleme haliwekita꞉ Tekehalima꞉ mea haena꞉ leekeme. Iki ame̱le̱ hata꞉ pokeleme ekina꞉ ikana꞉ma꞉ iki pa꞉ta꞉ panda꞉pea hamina꞉yeke honke aloma꞉me.

¹³Koto e poko haleme ekina꞉ iki pa꞉ta꞉ pukima꞉ homa hata꞉ hone wopu u hapa꞉peke. Ika꞉ ika꞉ kone homu pea puki homeke wia hapa꞉peke.

¹⁴Kametitio. Iki sutiaasoma꞉me dupa. Pa pitu haleme wanda꞉halita꞉ mana꞉ laka꞉na꞉ mo pututuma꞉ homeleme wanda꞉hali sa꞉tiaaso hata꞉ mo damakopiki wanda꞉hali pa꞉ta꞉la꞉ mea꞉tiki pea iki paeyao wotu handeteke hatiki pea꞉pa꞉peke.

¹⁵Mandane wanda꞉halima꞉ iki pa꞉ta꞉ hoke hau pimika꞉na꞉ta꞉ ikana꞉ma꞉ paa na hombo peaapa꞉peke. Hoto paeyaota꞉ ika꞉ ika꞉ kone epea alualu pea hata꞉ wanda꞉hali paeyao make epeaaluekema꞉ hone wopu wia꞉pa꞉peke.

¹⁶Nate paeyao ta꞉na꞉ma꞉ homo hapa꞉peke.

¹⁷Hoto paeyao make yeni pu hapa꞉peke.

¹⁸Kutupa eki a꞉nda꞉ paeyaona꞉ make Koda꞉ pa꞉ta꞉ keiyae pi lo hapa꞉peke. Do haumanu ikana꞉ma꞉ Yesu Ketiso ame̱le̱ ta꞉ma꞉ni pea hata꞉ puemena꞉yeke Koda꞉ma꞉ hone pa꞉la꞉me.

¹⁹Hande Holi Sipitidina꞉ ti uleke na honiapa꞉peke.

²⁰Koda꞉na꞉ pi la꞉ mea hala꞉ halina꞉ wala꞉la꞉ pita꞉ ikana꞉ma꞉ hoki walo honditi na pea꞉pa꞉peke.

²¹Hau paeyao pea handaata꞉ mo a꞉pa꞉la꞉ haumanu miniki hata꞉

²²kutupa hokeeki paeyao handa paka꞉laapa꞉peke.

²³Nika꞉ puki lopawao hala꞉ Koda꞉ma꞉ ikita꞉ ika꞉ haumanu paeyao pa꞉ta꞉ yako pina꞉ lawaena꞉e alome. Kota꞉ nika꞉ Tekehali Yesu Ketisona꞉ epolo pa꞉la꞉ nateta꞉ ipula꞉me. Koto nate opolo epea꞉ka꞉na꞉ta꞉ ikita꞉ ata꞉ka꞉ na piki wanda꞉hali hamina꞉ Koda꞉ma꞉ ika꞉ temoko make a̱o̱a̱o̱ make loke make paeyaota꞉ ana꞉na꞉ handeteke hao haena꞉e alome.

²⁴Do ekina꞉ loa꞉me. Iki wi la꞉la꞉ halima꞉ ipika꞉ pulueke laa la꞉ ula꞉ ekita꞉ ota꞉ pealieke.

²⁵Kametitio. Niki pa꞉ta꞉ tonka꞉na꞉ yeni peao hapa꞉peke.

²⁶Hande Ketiso wanda꞉halima꞉ pu haloma꞉ tupa꞉ ika꞉ yankeketiti paeyao ame̱le̱ hopula alualu pea꞉pa꞉peke.

²⁷I̱ma꞉ mo Tekehalina꞉ bikina꞉ iki sutiaaso hata꞉ dupa alome. Ika꞉ yankeketiti paeyao pa꞉ta꞉ do wape yata꞉pa꞉peke.

²⁸Nika꞉ Tekehali Yesu Ketiso ipika꞉ pa hameke a꞉ta꞉ma꞉ homa꞉la꞉eki iki ame̱le̱ haena꞉e.