Read Sembeleke Taitasi 3 Bible Online

Taitasi 3 - Sembeleke bible

Taitasi 3

¹Nakana꞉ma꞉ mo naka꞉ wanda꞉halina꞉ hone u tiatiki pika꞉na꞉ta꞉ ikana꞉ma꞉ mo ika꞉ kapomani haliweki oto nane make ikana꞉ma꞉ telipaala꞉ e handeteke haleme haliweki oto nane make hao hapa꞉peke lapeke. Mo haliwekina꞉ kakema꞉ homo hata꞉ hau paeyao epeke tupa꞉ puluekema꞉ tikitiki yao hapa꞉peke lapeke.

²Ikana꞉ma꞉ ma꞉nda꞉ pa꞉ta꞉ hoke pimanu na leketa꞉ a꞉nda꞉ pelia ta꞉ma꞉ni pea hata꞉ hoto paeyaota꞉ paeyao pa꞉ta꞉ yopu a꞉ta꞉ma꞉ homolo hata꞉ hapa꞉peke lapeke.

³Amba꞉ niki make hone wopu na wiki pi tunkulu make pu ata꞉ka꞉ peaoma꞉me. Nika꞉ lokena꞉ hone pa꞉la꞉ hau manuma꞉ make nika꞉ lokena꞉ ta꞉na꞉ma꞉ homaasa꞉ haumanu make koto hau paeyaoma꞉ nika꞉ hone handeteke haena꞉ loma꞉me. Kutupa nate paeyao mineke panka꞉ tiake pimanu lo make ma꞉nda꞉ma꞉ epeke ale pa꞉ta꞉ make leke polopao haoma꞉me. Mandane wanda꞉halima꞉ niki honditi pimikita꞉ iki make honditi pu haoma꞉me.

⁴Kutu puma꞉pate mo hande nika꞉ da꞉taasa꞉ Koda꞉na꞉ a꞉ta꞉ma꞉ homa꞉la꞉eki make pukima꞉ homa꞉la꞉eki make peneme yaalo epeke pita꞉ma꞉ta꞉

⁵ipikana꞉ma꞉ niki pa꞉ta꞉la tamba꞉ miekeme. Pa nikana꞉ma꞉ nika꞉ epeke hau pumeke handa na pieke yekepate pa mo ipika꞉ a꞉ta꞉ma꞉ homeeke ekina꞉ niki tamba꞉ miekeme. Kutu piekeeki manuta꞉ niki panake weki tupa꞉ da꞉ta hamono Koda꞉ma꞉ ipika꞉ Holi Sipitidi pa꞉ta꞉ yama꞉ tanda pa꞉la꞉me.

⁶Koda꞉ma꞉ nika꞉ Da꞉taasa꞉ Hali Yesu Ketiso pa꞉ta꞉ yama꞉ ipika꞉ Holi Sipitidi niki pa꞉ta꞉ anekema꞉ wopu tapaeyekeme.

⁷Kutu pieke ekima꞉ta꞉ mo Ketiso ipika꞉ a꞉ta꞉ma꞉ homeeke ekina꞉ niki Koda꞉na꞉ leke popelekena꞉ tikitiki pea make nika꞉ hone puaasoma꞉ deto hala꞉eki make miomono piekeme. Do ala꞉ pita꞉ ota꞉ pie.

⁸Koda꞉ pa꞉ta꞉ hone tulaaseme wanda꞉halima꞉ta꞉ mo ika꞉ epeke piteme hau manuma꞉ mo mandane wanda꞉hali tamba꞉ muluekema꞉ hone witolo hata꞉ waleke hala꞉tiki pina꞉ma꞉ nakana꞉ma꞉ do wapena꞉ alo pimanu iki pa꞉ta꞉ ota꞉ wopu la꞉ moneao hapeke.

⁹Kutu pulu pa꞉la꞉pate mo epe na piki ape apemanu make mo atekena꞉ ateke hatiki epeeke ekina꞉ biki eleke eleke moka꞉lao haleme ekimanu make mo pi yokaalu alu pita꞉la꞉ ekimanu make mo hande Diu wanda꞉halina꞉ lo pimanu wiekeeki dupa ula꞉me laa ape ape lo halemeeki make kota꞉ hau paeyao paka꞉lao pu hapeke. Kota꞉ hau manuma꞉ta꞉ niki epeaapeke ana꞉ na pa꞉la꞉me.

¹⁰Mo Ketiso tapake tekili paaluekema꞉ taapa꞉la꞉ somema꞉ hoto homeke o yaapo tekili peaapeke lea꞉ka꞉na꞉ta꞉ hoto yaapo sa꞉sa꞉ pilipipate pi na opiki pa tepo peao paa pia꞉ka꞉na꞉ta꞉ kota꞉ koto someta꞉ nika꞉ tapake some dia꞉me laa hoki wala꞉peke.

¹¹Naka꞉ handeleme. Kutu piki hau pita꞉la꞉ someta꞉ ipika꞉ hoke hau manuma꞉ kone mea hoeyao keaasa꞉me.

¹²I̱ma꞉ Atemasi o Tikikasi yaapo homeke a꞉nda꞉ neke pa꞉ta꞉ epena꞉ tapaowa꞉ka꞉na꞉ta꞉ kota꞉ neketa꞉ mo I̱ yopua halua꞉ Nikopolisi da nane pota꞉manu weiya a꞉pa꞉peke. I̱ma꞉ mo hande koa ki dina꞉ta꞉ koto Nikopolisi da pa꞉ta꞉ halueke loa꞉ ekita꞉ nakana꞉ma꞉ hone wilime.

¹³Mo Kapomanina꞉ pi ula꞉eki tikitiki yao hala꞉ hali Senasi make mo hande Apolosi kota꞉ hali yaapo ipilika꞉ pi walo polo pelepeeki kini pina꞉ nakana꞉ma꞉ epeke tamba꞉ muluekema꞉ taapa꞉peke. Ipilika꞉ mea polo pelepe ale manuta꞉ ana꞉na꞉ mea wilipipe laa handa꞉ handa꞉peke.

¹⁴Nika꞉ Ketiso tapakema꞉ a꞉pa꞉la꞉ haumanu puluekema꞉ ikana꞉ma꞉ mo ika꞉ nate leke epeke tupa꞉ handeteke hata꞉ pina꞉ moka꞉la꞉ tiatiki pea꞉pa꞉peke alee. Kutupa make mo wanda꞉halina꞉ ka꞉nda꞉ma꞉ homa꞉la꞉eki handa꞉ peteluekema꞉ ikana꞉ma꞉ mo napeke na pitiki epe na piki haumanu leke na pea꞉peke ya꞉la꞉me.

¹⁵Do I̱ ame̱le̱ mandake haloma꞉ tapakema꞉ neke pa꞉ta꞉ a꞉taloe pi la꞉neaasememe. Kutupa mo neke ame̱le̱ haleme Ketiso yankeketonu pa꞉ta꞉ tonka꞉na꞉ a꞉taloe pi aloma꞉me laa la hala꞉peke. Koda꞉na꞉ a꞉ta꞉ma꞉ homo tamba꞉ mina꞉la꞉ ekita꞉ iki taapuna꞉ hao haena꞉e.