Read Sembeleke Hibulu 13 Bible Online

Hibulu 13 - Sembeleke bible

Hibulu 13

¹Ketiso tapakema꞉ ika꞉ Ketiso yankeke tonu ame̱le̱ pukima꞉ homa꞉ alualu pu hapa꞉peke.

²Hande leke mineke na handeke wanda꞉hali kone ika꞉ da pa꞉ta꞉ epena꞉ ala꞉ hauta꞉ hone na yonka꞉lapa꞉peke. Kutu pitolo haena꞉ta꞉ pa mandane wanda꞉halima꞉ enisolo halie hone na wiki handa꞉ mea pitao tapaeyekeme.

³Mo dipula haena꞉ la꞉la꞉ wanda꞉halina꞉ ka꞉nda꞉ta꞉ nika꞉eki kone hone witolo hata꞉ iki hone na yonka꞉lapa꞉peke. Koto tupa꞉ kone mo mandane tanda no haleme wanda꞉hali make hone na yonka꞉lapa꞉peke.

⁴Wanda꞉ hapua mina꞉la꞉ hauta꞉ ota꞉ a꞉pa꞉la꞉ hauma꞉ pa꞉la꞉ma꞉ hone wopu wia handeteke hapa꞉peke. Tooli haepeka꞉na꞉ta꞉ kota꞉ ipilika꞉ loke homeke hone ualu pea hapa꞉peke. Mo suseke haasa꞉ hau pu make tooli hoeyaaso pake nala꞉ hau pu haleme wanda꞉halita꞉ Koda꞉ma꞉ pi yokaalu pilieke.

⁵Mani pa꞉ta꞉ pukima꞉ homa꞉la꞉ hauma꞉ ika꞉ puki na handeteke haena꞉ lapa꞉peke. Koto hau na pikita꞉ pa mo ika꞉ wia halemeeki manuta꞉ ana꞉ pa꞉la꞉me hone wia꞉pa꞉peke. Kutu pulu poloma꞉ ekina꞉ Koda꞉ma꞉ alota꞉I̱ma꞉ iki hoki na walo make ota꞉ na mina꞉pa꞉lalueke la꞉la꞉me.

⁶Koto ekina꞉ nikana꞉ma꞉ aela꞉ baaso hata꞉ dupa lomana꞉eMo Tekehalita꞉ I̱ tamba꞉ mina꞉la꞉ hali haleke handaa I̱ma꞉ta꞉ paala꞉ma꞉ na homulueke. Hali ma꞉nda꞉ma꞉ I̱ta꞉ ekipa hoeyaapeke yelia꞉pe aloma꞉me.

⁷Amba꞉ mo iki pa꞉ta꞉ Koda꞉na꞉ pi walao haeme siosi you haliweki hone na yonka꞉lapa꞉peke. Ika꞉ pu haeme haumanu make hone na yonka꞉lake niminatiki pitolo hata꞉ ika꞉ hone tulaeme hau honda꞉ mea pu hapa꞉peke.

⁸Yesu Ketisota꞉ amba꞉ make ame make belia make hoto paeyao tapao topo na piki pa homeke hau kone pa꞉la꞉me.

⁹Amba꞉ na opimi pa ta꞉ta꞉ ta꞉ta꞉ piki pi walimieki manuma꞉ mo ika꞉ epeke pota꞉na꞉ pulimieki na yola꞉ mea pa꞉na꞉ lapa꞉peke. Koda꞉na꞉ a꞉ta꞉ma꞉ homa tamba꞉ mina꞉la꞉eki homekema꞉ ika꞉ puki hana꞉ noka꞉paena꞉ lemeka꞉na꞉ta꞉ a꞉pa꞉la꞉pate paa mo ne na nape laa pi ula꞉ hau manuma꞉ dia꞉me. Koto hau tolu haleme wanda꞉halita꞉ mo hauma꞉ iki na tamba꞉ mu hala꞉me.

¹⁰Mo Diu wanda꞉halina꞉ palai da pa꞉ta꞉ e poko haleme haliwekita꞉ nika꞉ oloda pa꞉ta꞉ ula꞉ ne manuta꞉ napeke na ya꞉la꞉me.

¹¹Ika꞉ Yeni Peao Hala꞉ You Halima꞉ wanda꞉halina꞉ hoke hau a꞉mbaena꞉ mo hoteke we mea mo Ota꞉ Yako Piki Da Panda꞉ pa꞉ta꞉ mea pua halo haemekeme. Pate mo hoteke mindiki manuta꞉ mo ika꞉ da hama꞉ nane tokulu haena꞉ yanka꞉ baemekeme.

¹²Koto tupa꞉ kone Yesu make ipika꞉ wema꞉ mo wanda꞉halina꞉ hoke haumanu paeyaaluekema꞉ mo pape tikene homeekeme.

¹³Niki make mandake tupa꞉ kone mo tikene pua mo ipikana꞉ma꞉ mieke yaala꞉ apa꞉tao mumana꞉e.

¹⁴Pa ekipeke do kenkena꞉ta꞉ nika꞉ ota꞉ pa hao hapeke ya꞉la꞉ daoni ma꞉nda꞉ dia꞉ ya꞉leke handaa mo wetepe opolo epolo pa꞉la꞉ daoni weitoloma꞉me.

¹⁵Nikana꞉ma꞉ Koda꞉na꞉ biki yeiya꞉ laasoma꞉ ekita꞉ nika꞉ ipiki pa꞉ta꞉ pa hameke hala꞉la꞉ ale tupa꞉ Yesu pa꞉ta꞉ yama꞉ halo hamana꞉e. Mo Tekehalina꞉ biki peneme yao laasa꞉ ekita꞉ kota꞉ nika꞉ kakena꞉ kiliki ipiki pa꞉ta꞉ pa hameke haloloma꞉me.

¹⁶Epeke hau pualu pu make tamba꞉ mualu pu pita꞉la꞉ hau yaapota꞉ hone na yonka꞉lapa꞉peke. Pa ekipeke. Do hau yaapoma꞉ta꞉ Koda꞉ ta꞉na꞉ma꞉ homaena꞉ pa hameke hala꞉la꞉ haue.

¹⁷Mo ika꞉ siosi you haliweki pa꞉ta꞉ homu pea hata꞉ ika꞉ kakena꞉ homo hapa꞉peke. Ikana꞉ma꞉ ika꞉ siosi wanda꞉hali tukiki pa꞉ta꞉ e poka꞉la꞉eki paeyao Koda꞉ma꞉ handena꞉ ipiki pa꞉ta꞉ peneme yao waluekema꞉ta꞉ timba꞉ nate yaapona꞉ u na peliki hata꞉ mo siosi wanda꞉hali ika꞉ temokomanu wopu handeteke hao halememe. Ika꞉ kakena꞉ homa telia pu haemeka꞉na꞉ta꞉ kota꞉ ta꞉na꞉ lulu hata꞉ ika꞉ e epeke tupa꞉ pokolo pelemepate pa ikana꞉ma꞉ ika꞉ kakena꞉ na homemeka꞉na꞉ta꞉ kota꞉ ika꞉ e poka꞉la꞉eki ka꞉nda꞉ pealieke. Ikana꞉ma꞉ ka꞉nda꞉ma꞉ homemeka꞉na꞉ta꞉ kota꞉ koto ka꞉nda꞉ peaasa꞉ ekima꞉ mo siosi wanda꞉hali iki na tamba꞉ milieke.

¹⁸Koda꞉ma꞉ niki tamba꞉ mina꞉ yeni na mina꞉pa꞉lake wopu peao hapa꞉peke. Nikana꞉ma꞉ hoto paeyao ota꞉ tikitiki piki hau puluekema꞉ taapo haloma꞉me. Koto ekina꞉ nika꞉ hone teketa꞉ Koda꞉na꞉ leke popelekena꞉ ota꞉ tikitiki pa꞉la꞉me hone witoloma꞉me.

¹⁹Koda꞉ma꞉ iki pa꞉ta꞉ I̱ pa a̱i̱ tapaena꞉ ikana꞉ma꞉ yeni peamena꞉ yeke I̱ma꞉ meme pitolo hata꞉ iki honke alome.

²⁰Mo sipisipi ma꞉na꞉ handeteke hala꞉ hali tieke Yesu mo lapa꞉ pa꞉ta꞉ mea tiaeya꞉ Koda꞉ma꞉ kone mo na paelo pa꞉la꞉ la꞉ wieke we pa꞉ta꞉ yama꞉ ikana꞉ma꞉ ipika꞉ hone pa꞉la꞉ e epeke tupa꞉ pokawamena꞉ yeke epeao wina꞉e alome. Kutupa make mo puki lopawaasa꞉ Koda꞉ma꞉ Yesu Ketiso pa꞉ta꞉ yama꞉ niki tukiki pa꞉ta꞉ ipiki ta꞉na꞉ma꞉ homa꞉ tialo poloma꞉eki pina꞉ lomana꞉e alome. Ketisona꞉ bikima꞉ na paelo pa꞉la꞉ yeiya꞉ laasa꞉eki tieke mina꞉e. Kutu pina꞉e.

²²Ya kame tonuo. I̱ma꞉ ika꞉ hone u tialuekema꞉ wape polo pimanu yopu opua꞉pa꞉peke laa honke alome. Pa ekipeke. Do I̱ma꞉ wape polo ekita꞉ ota꞉ hokulu na wape polome.

²³Hande nika꞉ kame Timodi mo dipula pita opulu bao hala꞉eki ikana꞉ma꞉ opuemena꞉ do la kitolo handa꞉pe. Do I̱ halo pa꞉ta꞉ a̱i̱ opolo epea꞉ka꞉na꞉ta꞉ kota꞉ iki handolo ipulu mandake ipulupekee.

²⁴Nika꞉ a꞉taloe pi manuta꞉ ika꞉ you haliweki paeyao pa꞉ta꞉ make mo Koda꞉na꞉ wanda꞉hali paeyao pa꞉ta꞉ make la halawapa꞉peke. Do Ideli haleme Ketiso yankeke tonuma꞉ ika꞉ a꞉talo pi iki pa꞉ta꞉ tapaasememe.

²⁵Koda꞉na꞉ a꞉ta꞉ma꞉ homa tamba꞉ mina꞉la꞉eki iki ame̱le̱ hao haena꞉e.