Read Sembeleke Hibulu 4 Bible Online

Hibulu 4 - Sembeleke bible

Hibulu 4

¹Mo hande Koda꞉ma꞉ kulueke laa pi la꞉ wieke hoto pita꞉peke ekita꞉ ame make nikina꞉ pa u pelia hala꞉me. Koto ekina꞉ iki ma꞉nda꞉ma꞉ koto pi la꞉ wiekeeki wendiaama꞉na꞉ kimelema꞉ hao hapa꞉peke.

²Mo Pi Seliapota꞉ ikana꞉ma꞉ opimiki tupa꞉ nikana꞉ma꞉ make opu haoma꞉me. Ikana꞉ma꞉ epeke opimikipate kone hone tulao na miniki haemeke ekima꞉ mo pima꞉ta꞉ iki tamba꞉ mea꞉peke na yekeme.

³Kutu piekepate ame nikita꞉ hone tulao haloma꞉ wanda꞉halima꞉ mo hande Koda꞉ma꞉ la꞉ wiekeeki talo hata꞉ hoto pita꞉peke laa leeke ekina꞉ mu haloma꞉me. Amba꞉ hande Koda꞉na꞉ pima꞉ la꞉ wieke tupa꞉ kone alota꞉I̱ma꞉ iki pa꞉ta꞉ mineke tieke pankolo ota꞉ topo pia꞉peke na yeke pi tieke la꞉ witolo alota꞉Koto wanda꞉hali hoto pitina꞉ halueke laa pi la꞉ ulu kenke pa꞉ta꞉ta꞉ ota꞉ na pelimikie laa pi la꞉ uluma꞉ loa꞉me leekeme. Koto leekepate Koda꞉ma꞉ mo kenke wepia paeyao paeyeke hoki naneta꞉ ipika꞉ e ota꞉ paeyekeme.

⁴Mo Baibolo tukiki ma꞉nda꞉ pa꞉ta꞉ta꞉ mo watake hata꞉ natena꞉ pita꞉ dupa la꞉la꞉me.Mo watake hata꞉ nateta꞉ Koda꞉ma꞉ ipika꞉ e poko tunkula hoto pitiekeme la꞉la꞉me.

⁵Do hande hoto pitina꞉e laa wapena꞉ la꞉la꞉ pi kone paa yaapo peao dupa la꞉la꞉me.Koto wanda꞉hali hoto pitina꞉ halueke laa pi la꞉ ulu kenke pa꞉ta꞉ta꞉ ota꞉ na pelimikie laa pi la꞉ uluma꞉ loa꞉me la꞉la꞉me.

⁶Mo Pi Seliapo titina꞉ opimiki wanda꞉halima꞉ ika꞉ hone na tulaemeke ekima꞉ta꞉ mo hande hoto pita꞉pekeeki na mimikime. Kutu pimikita꞉ ameta꞉ pa mandane wanda꞉halima꞉ mo koto hoto pila꞉eki mia꞉peke ya꞉la꞉me.

⁷Koto mia꞉pekeeki ota꞉ peneme yaasa꞉ ekita꞉ Koda꞉ma꞉ pa nate ma꞉nda꞉ witolo alota꞉ Ame koto natee leekeme. Do wapena꞉ amba꞉ loa꞉ Baibolo pita꞉ bapi wopu paeyeke hoki nane Deipidima꞉ la꞉na꞉ ipiki pa꞉ta꞉ yama꞉ leeke ekita꞉ dupaeAme do natena꞉ Koda꞉na꞉ pi ho̱la̱꞉make opimika꞉na꞉ta꞉ puki taka꞉laaso hata꞉ ipika꞉ pi na opiki nono na pea꞉peke leekeme.

⁸Diosuama꞉ a꞉nda꞉ amba꞉ kone iki pa꞉ta꞉ Koda꞉ma꞉ la꞉ wieke hoto pila꞉ nate halea꞉ka꞉na꞉ yoluta꞉ kota꞉ Koda꞉ma꞉ paa nate ma꞉nda꞉ ulumee pi na lolo pia꞉me.

⁹Koto pa꞉la꞉ ekina꞉ta꞉ Koda꞉ma꞉ watake hata꞉ natena꞉ hoto pilieke tupa꞉ pa niki Koda꞉na꞉ wanda꞉halina꞉ hoto pita꞉peke nateta꞉ pa wia꞉ka꞉ta꞉me hone witoloma꞉me.

¹⁰Epi amedama꞉ Koda꞉ma꞉ halueke laa la꞉ wieke hoto pita꞉pekeeki a꞉nda꞉ mia꞉ka꞉na꞉ta꞉ kota꞉ Koda꞉ma꞉ ipika꞉ e poko tunkula hoto pitieke tupa꞉ koto halima꞉ make ipika꞉ e poko tunkula hoto pitilieke.

¹¹Mo hande amba꞉ haemeke wanda꞉halima꞉ hone wopu na tulaemeke ekima꞉ pu hoeyaemeke tupa꞉ niki make kutu paama꞉na꞉ma꞉ mo hoto pita꞉peke nate muluekema꞉ta꞉ hone wopu wia pumana꞉e.

¹²Koda꞉na꞉ pita꞉ da꞉taa hata꞉ e wopu poko hala꞉me. Mo pima꞉ta꞉ hande kake yaapo hake bainasi kone lombei pea ne ne wopu hala꞉me. Kutupa mo pima꞉ta꞉ wanda꞉hali ponda꞉pa꞉ awa ika꞉ temoko pita꞉ hone teke yaapo tukikina꞉ opolo pua tekili peao make ika꞉ lokena꞉ holiki kilikalu yaapo pa꞉nka꞉pa꞉ lia tekili pea alu make pea꞉peke ya꞉la꞉me. Wanda꞉halina꞉ honena꞉ hone pa꞉la꞉ ekimanu tikitiki yawao hala꞉me.

¹³Koda꞉ma꞉ na handena꞉ yeke ala꞉ta꞉ ma꞉nda꞉ a꞉mbao panka꞉ wia꞉peke na ya꞉la꞉me. Dia꞉me. Koda꞉ma꞉ handa꞉leketa꞉ ipika꞉ leke popelekena꞉ta꞉ mo wepia ula꞉ ala꞉ta꞉ ala꞉ta꞉ paeyao ota꞉ peneme yao lumbupa ula꞉me. Kutupa niki paeyaoma꞉ nika꞉ puma꞉ hau manuta꞉ ipiki pa꞉ta꞉ ota꞉ peneme yaalumeke. Yesuta꞉ nika꞉ yeni peao hala꞉ you hali tieke

¹⁴Koto pa꞉leke handaata꞉ mo nika꞉ Yeni peao hala꞉ You hali tieketa꞉ Koda꞉na꞉ eiyeke Yesuta꞉ mo hepeni da tukiki pa꞉ta꞉ ota꞉ honda꞉ pambeeke yeke handaata꞉ kota꞉ nikana꞉ma꞉ make mo nika꞉ hone tulaaloma꞉eki wopu handeteke hao hamana꞉e.

¹⁵Nika꞉ Yeni peao hala꞉ You halima꞉ta꞉ nika꞉ honkopu na hake dete piki haumanu handaa a꞉ta꞉ma꞉ na homolo pa꞉la꞉ hali dia꞉me. Kotoeki na pikita꞉ nika꞉ Yeni peao hala꞉ You halita꞉ mo niki la handa꞉peke ya꞉la꞉ ekimanu paeyaoma꞉ ipiki make la handetiki piekepate hoke hau homeke siki ma꞉nda꞉ a꞉nda꞉ ota꞉ na piekeme.

¹⁶Nika꞉ ka꞉nda꞉ma꞉ homa꞉la꞉ natemanu epea꞉ka꞉na꞉ ipika꞉ a꞉ta꞉ma꞉ homa tamba꞉ mina꞉la꞉eki kia꞉ka꞉na꞉ muluekema꞉ aela꞉ bao hata꞉ mo pa hameke a꞉ta꞉ma꞉ homo hala꞉ Koda꞉ teke pa꞉ta꞉ pomana꞉e.