Read Sembeleke Hibulu 6 Bible Online

Hibulu 6 - Sembeleke bible

Hibulu 6

¹Mo hande titi panake pa꞉ta꞉ opuma꞉ Ketisona꞉ pi manuna꞉ homeke na ambula u hake pa wina꞉ ipika꞉ pi mandane ekimanu make handa꞉tia pomana꞉e. Da a꞉eyoma꞉ka꞉na꞉ta꞉ oni hande amba꞉ nokopoma꞉ da ka꞉ta꞉ta꞉ pa yoka noka꞉pa꞉tiki noka꞉pa꞉tiki pea꞉peke na ya꞉la꞉me. Koto tupa꞉ kone nikana꞉ma꞉ make mo Koda꞉ pa꞉ta꞉ hone tulaasa꞉ titina꞉ pimanu make mo teke na wiki hau pita꞉la꞉ ekimanu mina꞉pa꞉lao hone la꞉ka꞉la꞉la꞉ ekina꞉ pimanu make

²bapitaisi pita꞉la꞉ hau manuna꞉ pi wala꞉la꞉eki make youna꞉ kiki wia yeni pita꞉la꞉ haumanu make homa paa tiaasa꞉ hau make Koda꞉na꞉ pi yokaalu pea mo honiki na paeke homo hala꞉ alena꞉ tapaalo pa꞉la꞉ ekina꞉ wala꞉la꞉ pimanu make koto amba꞉ hande titina꞉ waloma꞉ pimanu na ambula u hake

³pa mandane ekimanu make handa꞉tia pomana꞉e. Kutu piomono Koda꞉ma꞉ niki pa꞉ta꞉ waleke kia꞉ka꞉na꞉ta꞉ kota꞉ ota꞉ putia polumeke.

⁴Mandane wanda꞉halima꞉ta꞉ mo hande amba꞉ ika꞉ hone tulaemekeeki mina꞉pa꞉laemeka꞉na꞉ta꞉ pa ekipa ika꞉ puki la꞉ka꞉la hone ma꞉nda꞉ tulaena꞉ handa꞉ mea epomana꞉pe. Ikita꞉ Koda꞉na꞉ pa̱a̱ pa꞉la꞉eki tukiki pa꞉ta꞉ amba꞉ haemeke handa make mo hepeni nanema꞉ pa hameke hala꞉la꞉ hau ikana꞉ma꞉ amba꞉ pea handemeke handa make mo Holi Sipitidima꞉ telipea yekeeki make mimiki handaata꞉

⁵Koda꞉na꞉ pi mea pea handa epekeeki yeke handaata꞉ a꞉pa꞉la꞉me hone make wimiki handaata꞉ Koda꞉na꞉ wetepe epolo pa꞉la꞉ natena꞉ wele tiekena꞉ wele wataa handemeke handaata꞉

⁶kota꞉ koto hau paeyao pea hoki naneta꞉ ika꞉ hone tulaemekeeki mina꞉pa꞉lao lopea꞉ka꞉na꞉ta꞉ kota꞉ iki paa la꞉ka꞉la a꞉pa hone tulaena꞉ ma꞉nda꞉ma꞉ ota꞉ paa hatuku a꞉pa꞉pa꞉peke na ya꞉la꞉me. Dia꞉me. Ika꞉ koto peleme ekima꞉ta꞉ mo Koda꞉na꞉ Eiyeketa꞉ mo wanda꞉halina꞉ leke popelekena꞉ yaala꞉ma꞉ homena꞉ mo a꞉ka꞉tei wape piki tina꞉ ipiki paa liki nono pitelememe.

⁷Kenke ma꞉nda꞉ma꞉ lako nalo hata꞉ mo e handeteke hala꞉ halina꞉ ne anekema꞉ opaeya꞉ka꞉na꞉ta꞉ kota꞉ koto kenketa꞉ Koda꞉ma꞉ wamo pita꞉la꞉ kenkee.

⁸Pate mo ka̱꞉la̱꞉ta꞉ o hoke ambu homeke opa꞉la꞉ kenketa꞉ ipika꞉ hoeyaalo pa꞉la꞉eki make teke pa꞉ta꞉ ulume. Koto hoke ambu opita꞉la꞉ kenketa꞉ tima꞉ yankilieke.

⁹Nika꞉ puki piki yankeke titio. Iki pa꞉ta꞉ dupiki pi tieke aloma꞉pate pa mo da꞉ta꞉la꞉ ekima꞉ mea a꞉pa꞉la꞉ wamo pita꞉la꞉ haumanu pu haleme ekina꞉ nikana꞉ma꞉ koto piteme wanda꞉hali iki pa꞉ta꞉ hone ma꞉nda꞉ na witoloma꞉me.

¹⁰Koda꞉ta꞉ homeke pa꞉ta꞉ homeke hone ula꞉ Koda꞉ dia꞉me. Ipikana꞉ma꞉ mo ika꞉ epeke e poka꞉lemekeeki make ika꞉ Ketiso kame tonu tamba꞉ mimieki make ame do pa tamba꞉ mu haleme ekima꞉ make koto hau pa꞉ta꞉ yama꞉ta꞉ ika꞉ Koda꞉ pa꞉ta꞉ pukima꞉ homelemeeki peneme yaasa꞉me. Koto piteme ekita꞉ Koda꞉ma꞉ hone na yonka꞉lapeke ya꞉la꞉me.

¹¹Koda꞉ma꞉ ota꞉ pina꞉e hone wilimieki iki pa꞉ta꞉ ota꞉ pina꞉ kima꞉ na homeke honkopu hao hata꞉ mo hande epeke haumanu pa pea꞉tiki pu hamena꞉ niki hone wopu pa꞉la꞉me.

¹²Ikana꞉ma꞉ soka꞉la꞉ homeleme wanda꞉hali hamena꞉ niki hone na pa꞉la꞉me. Kotoeki na pikita꞉ mo hande mandane wanda꞉hali ika꞉ hone tulaemeke hauma꞉ make ika꞉ epeke tupa꞉ yu wia haemeke hauma꞉ make koto hau yaapo pa꞉ta꞉ yama꞉ mo hande Koda꞉ma꞉ la꞉ ula꞉ ekimanu mu haemekeme. Koto wanda꞉halina꞉ hauta꞉ ikana꞉ma꞉ handa꞉ muemena꞉ hone witoloma꞉me. Koda꞉ma꞉ ota꞉ yaalo pieke pi la꞉ wiekeeki

¹³Mo hande Eipoloha꞉ma꞉ pa꞉ta꞉ pi la꞉ wieke dina꞉ hali ma꞉nda꞉ta꞉ ota꞉ manda hala꞉ hali ma꞉nda꞉ ota꞉ dia꞉ yeke handaata꞉ Koda꞉ma꞉ ipika꞉ biki kone laa ota꞉ pi alo loa꞉me laa pi la꞉ wiekeme.

¹⁴Ipikana꞉ma꞉ alota꞉ I̱ma꞉ neke epeaota꞉ naka꞉ hoki nane halo peleme tapaketa꞉ ota꞉ wopu haena꞉ lolueke pita꞉ I̱ma꞉ ota꞉ neke pa꞉ta꞉ la꞉ witolome leekeme.

¹⁵Eipoloha꞉ma꞉ mo pi la꞉ wieke ale muluekema꞉ yu wia hayeke handaata꞉ koto pi la꞉ wieke ekita꞉ ota꞉ miekeme.

¹⁶Hali homeke ma꞉nda꞉ma꞉ ota꞉ pi loluekema꞉ta꞉ kota꞉ ota꞉ mo paeyaona꞉ bikimanu tombuao ota꞉ manda hala꞉ biki ula꞉ halina꞉ biki laa la꞉ wita꞉la꞉ pi lea꞉ka꞉na꞉ta꞉ kota꞉ koto pima꞉ta꞉ mo pi yoka꞉ alualu piki pi aleme ekimanu pa tunkulalieke.

¹⁷Koda꞉ make mo hande pi la꞉ wiekeeki mulu peleme wanda꞉hali pa꞉ta꞉ ipika꞉ puluekee laa la꞉ wiekeeki ota꞉ topo na pea꞉peke ya꞉la꞉eki peneme yaaluekema꞉ ipikana꞉ma꞉ hali keke wita꞉la꞉ pima꞉ apa꞉tao la꞉ wiekeme.

¹⁸Koda꞉ma꞉ koto topo pea꞉peke na yo yayapiki pi na lo pea꞉peke yekeeki yaapo wina꞉ leekeme. Ipika꞉ oto nane tinki pa haloma꞉ wanda꞉hali nikita꞉ nika꞉ hone ti laloma꞉eki ota꞉ miniki hamono yeke do koto pi yaapoma꞉ta꞉ nika꞉ puki tieke wopu mea tiala꞉me.

¹⁹Do hone ti laloma꞉ ekina꞉ta꞉ nika꞉ temoko epeke tupa꞉ halo pa꞉la꞉ ekina꞉ da̱o̱la hasa꞉ ekina꞉ teke ula꞉me. Koto teketa꞉ mo hepeni nane yeni pu hala꞉ dana꞉ tupele dau tieke hoki nane ula꞉ yako piki da panda꞉ tukiki nane yopua ula꞉me.

²⁰Niki tamba꞉ muluekema꞉ta꞉ koto yako piki da panda꞉na꞉ pota꞉ pilaluekema꞉ Yesu amba꞉la amba꞉ yapeekeme. Ipikana꞉ma꞉ mo hande amba꞉ hayeke some Melekisedeke hayeke tupa꞉ ipika꞉ anke teke mea mo Yeni Peaasa꞉ You Hali na paeke hao hala꞉me.