Read Sembeleke Dia꞉mesi 1 Bible Online

Dia꞉mesi 1 - Sembeleke bible

Dia꞉mesi 1

¹I̱ta꞉ Dia꞉mesi Koda꞉ make Tekehali Yesu Ketiso yaapona꞉ e pokaaso hali halome. Do wape pitolo ekita꞉ hande ika꞉ kenke nane mina꞉pa꞉lao pemeke Isulai 12 tapake ika꞉ wanda꞉hali pa꞉ta꞉ tapaasome. Iki pa꞉ta꞉ keiyae pi alome. Hone tulaasa꞉eki pita꞉ hone epeke u tiaasa꞉eki yaapo

²Ya kametitio. Iki pa꞉ta꞉ la handa꞉la꞉eki ta꞉ta꞉ ta꞉ta꞉ pieke ekimanu epemeka꞉na꞉ta꞉ ta꞉na꞉ma꞉ homolo hata꞉ mea꞉pa꞉peke.

³Do ekina꞉yeke loa꞉me. Ika꞉ Koda꞉ pa꞉ta꞉ hone tulaaleme ekina꞉ la handa꞉la꞉eki epea꞉ka꞉na꞉ta꞉ iki taka꞉lawaluekema꞉ pita꞉la꞉me.

⁴Kutupa taka꞉lapa pua haemeka꞉na꞉ta꞉ hau ma꞉nda꞉siki na mina꞉pa꞉lake ota꞉ ana꞉na꞉ kone halimikie.

⁵Iki pa꞉ta꞉ hali homekema꞉ epeke hone wita꞉la꞉eki yonka꞉laeya꞉ka꞉na꞉ta꞉ kota꞉ Koda꞉ pa꞉ta꞉ honke lea꞉ka꞉na꞉ta꞉ epelieke. Koda꞉ma꞉ta꞉ haliweki paeyao pa꞉ta꞉ ipika꞉ kiki tindipao hata꞉ haka꞉ta꞉pao halo hala꞉me. Kutupa mo hali pa꞉ta꞉ halieke.

⁶Ipikana꞉ma꞉ haliepateta꞉ mo halima꞉ hone ti na yokeke hone tulao hata꞉ honke lea꞉ka꞉na꞉ta꞉ epelieke. Hali epima꞉ hone ti yokea꞉ka꞉na꞉ta꞉ ipikita꞉ mo poma꞉ dawala ikali ho a꞉meiyao lopatiki pita꞉la꞉ ekima꞉ handa꞉la꞉me.

⁷Kutu piki halita꞉ hone ti yokolo hata꞉ da̱o̱la na hake Tekehali pa꞉ta꞉ honke lea꞉ka꞉na꞉ta꞉ aleta꞉ ma꞉nda꞉ mea꞉peke na yelieke. Natehali hasa꞉eki pita꞉ hamoko hasa꞉eki yaapo

⁹Mo natehali kamema꞉ Koda꞉ma꞉ ipiki mea a꞉meiyaasa꞉ ekina꞉ ta꞉na꞉ma꞉ homa꞉peke ya꞉la꞉me.

¹⁰Kutupa make mo hamoko kamema꞉ Koda꞉ma꞉ ipiki mininiaasa꞉ ekina꞉ ta꞉na꞉ma꞉ homa꞉peke ya꞉la꞉me. Mo hande ambu palapalamanu paeyo hala꞉ tupa꞉ mo halita꞉ paelieke laa loa꞉me.

¹¹Oli natema꞉ta꞉ titipu wopu pitolo hata꞉ opa꞉liao yopulu hata꞉ hande ambumanu hapuao hala꞉me. Kutupa mo palapala manuna꞉ kiliki lia ta wilie ekita꞉ dutu pa pa pu lopaata꞉ ipika꞉ au la꞉la꞉ ekita꞉ hoeyaalieke. Koto tupa꞉ mo hamoko halima꞉ ipika꞉ bisinisi pitolo hata꞉ homilieke. La handa꞉la꞉eki pita꞉ hone pula꞉eki yaapo

¹²Hali epima꞉ mo la handa꞉la꞉ ekimanu epena꞉ kone da̱o̱la haya꞉ka꞉na꞉ta꞉ ta꞉na꞉ma꞉ homilieke. Do ekina꞉yeke loa꞉me. Mo halima꞉ta꞉ mo la handa꞉la꞉ ekimanu paeyao bepolaeya꞉ka꞉na꞉ta꞉ Koda꞉ma꞉ ipiki pa꞉ta꞉ yenki halolo hata꞉ta꞉ deto hala꞉eki kone halieke. Koto yenkita꞉ Koda꞉ma꞉ amba꞉ pi la꞉ witolo hata꞉ I̱ pa꞉ta꞉ pukima꞉ homa꞉la꞉ wanda꞉hali pa꞉ta꞉ deto hala꞉eki halueke laa pi la꞉ ula꞉me.

¹³Hali epima꞉ mo la handa꞉la꞉ ekimanu ipulu haena꞉ hoke hone mea u tiaasa꞉eki taapuna꞉ epea꞉ka꞉na꞉ta꞉ ipikana꞉ma꞉ta꞉ do tupa꞉ lapeke na ya꞉la꞉me. Do hoke hone mea u tiaasa꞉ ekita꞉ Koda꞉ma꞉ epena꞉ la pia꞉ka꞉ta꞉ma꞉ pi lapeke na ya꞉la꞉me. Do ekina꞉yeke loa꞉me. Hoke ekima꞉ta꞉ Koda꞉ pa꞉ta꞉ hoke hone u tiaapeke na ya꞉la꞉me. Kutupa Koda꞉ma꞉ta꞉ homeke a꞉nda꞉ hoke hone u tiaapeke na ya꞉la꞉me.

¹⁴Mo halita꞉ ipika꞉ hoke hone pa꞉la꞉ ekima꞉ kone hona꞉maasa꞉ tupa꞉ hoke hone u tiaasa꞉me.

¹⁵Pa wanda꞉wekina꞉ weleke pa꞉ta꞉ weki pitao mendia꞉la꞉ tupa꞉ hande ipika꞉ hoke hone pa꞉la꞉eki pia꞉ka꞉na꞉ta꞉ kota꞉ hoke hau pita꞉la꞉me. Kutupa mo weki daeta꞉la꞉ tupa꞉ mo hoke hau pita꞉la꞉eki daeyatia puaata꞉ hande some ota꞉ homaalieke.

¹⁶Ota꞉ ya kametitio. Yayapikieki na opua꞉pa꞉peke.

¹⁷Mo epeke tupa꞉ kita꞉la꞉ ekimanu paeyao make mo epeke alemanu kita꞉la꞉eki paeyao make oli hepeni nanema꞉ ipulu hata꞉ pita꞉la꞉me. Hande ya nane haleme pa̱a̱ piki ale manuna꞉ Ateke pa꞉ta꞉ hola꞉pa꞉niao ipulu hata꞉ pita꞉la꞉me. Ipikana꞉ma꞉ hau ta꞉ta꞉ ta꞉ta꞉ pikieki topo na pealieke. Kutupa paa la꞉ka꞉lea꞉ka꞉na꞉ta꞉ tu na pilieke.

¹⁸Ipika꞉ wa꞉pa꞉la꞉ ekimanu paeyao pa꞉ta꞉ nikita꞉ titina꞉ hamonoyeke ipika꞉ hande ota꞉ pi manuna꞉ ipika꞉ hone pa꞉la꞉eki pitolo hata꞉ niki mea hamono la꞉la꞉me. Opua pia꞉peke ya꞉la꞉eki

¹⁹Ota꞉ ya kametitio. Do pimanu hone wipe. Iki paeyao pi opuluekema꞉ tikitiki yao hapeke ya꞉la꞉pate pa pi pi a̱i̱ na leke make mineke a̱i̱ na panka꞉pa꞉peke. Do alo pi manuta꞉ do ekina꞉yeke loa꞉me.

²⁰Wanda꞉halina꞉ mineke pankeleme ekima꞉ Koda꞉na꞉ tikitikipiki haumanu na peaasememe.

²¹Koto ekina꞉ keke loluekema꞉ hoke hone wita꞉la꞉ haumanu paeyao make daeyatia pulu hata꞉ hoke hau pita꞉la꞉ ekimanu paeyao make ota꞉ mina꞉pa꞉laota꞉ kutupa Koda꞉ pa꞉ta꞉ homu pea hata꞉ neke mea da꞉taapeke ya꞉la꞉ pi alemanu ipikana꞉ma꞉ ika꞉ puki pa꞉ta꞉ noka꞉paeya꞉ka꞉na꞉ta꞉ ota꞉ mea mendia꞉pa꞉peke.

²²Hande pi ale manuta꞉ pa katakema꞉ homeke opitolo hata꞉ ika꞉ kone makeaasememe. Kotoeki na pikita꞉ pi opuata꞉ ota꞉ pea꞉pa꞉peke.

²³Do ekina꞉yeke loa꞉me. Hande pi alemanu pa opua kone na pita꞉la꞉ halita꞉ mo su̱a̱na꞉ leke popeleke handa꞉la꞉ halima꞉ handa꞉la꞉me.

²⁴Kutu pita꞉la꞉ halita꞉ ipika꞉ leke popeleke handa꞉la꞉pate la꞉ka꞉la pulu hata꞉ta꞉ ipika꞉ handea꞉ ekita꞉ kutaa kone hone yonka꞉laota꞉ hone paa nimina wia꞉peke na ya꞉la꞉me.

²⁵Kutu pita꞉la꞉pate hali epima꞉ mo hande seliapopiki pi ula꞉ ekimanu hande wanda꞉hali ka꞉la꞉pao hala꞉ pi ula꞉ ekimanu pa꞉ta꞉ loa꞉me. Hali epima꞉ kotoeki manuna꞉ hando haota꞉ pa katakema꞉ homeke na opiki opua ota꞉ pia꞉ka꞉na꞉ta꞉ koto halita꞉ pitolo haena꞉ kone Koda꞉ma꞉ epeaalieke.

²⁶Kutupa hali epima꞉ I̱ta꞉ ota꞉ Ketiso halie la ala꞉pate ipika꞉ kekeke na handeteke haya꞉ka꞉na꞉ta꞉ kota꞉ koto halita꞉ ipika꞉ kone makeao hao ipika꞉ Ketiso hala꞉ ekita꞉ ota꞉eki dia꞉me paekie.

²⁷Hoe ma꞉nda꞉ na piki ota꞉ Ketiso tikitiki hauta꞉ nika꞉ Apa꞉ Koda꞉ma꞉ta꞉ dupae ala꞉me. Pa haleme weki wandiki make kineke wanda꞉sunu make ika꞉ ka꞉nda꞉ma꞉ homelemeeki handaata꞉ tamba꞉ mina꞉la꞉eki mea꞉peke ya꞉la꞉me. Kutupa make mo kenke hauma꞉ na hoeyaena꞉ aloma꞉ ekina꞉ ala꞉me.