Read Sembeleke Peneme Yaeyekeeki 15 Bible Online

Peneme Yaeyekeeki 15 - Sembeleke bible

Peneme Yaeyekeeki 15

¹Kutupa oli yana꞉ ta꞉ta꞉ ma꞉nda꞉ piki hone mateke pututu au tieke handoa꞉me. Watake hata꞉ enisolo manuma꞉ paeyaaso ane mone ke handaasa꞉ ipula꞉ watake hata꞉ haumanu miniki haememe. Kotota꞉ Koda꞉ ipika꞉ paeyaaso mineke panka꞉la꞉eki walo paeyaasa꞉eki yekeme.

²Kutupa mo kalasima꞉ handeke hama꞉ ma꞉nda꞉ ti uleke apa꞉taakeeki handoa꞉me. Koto pa꞉ta꞉ make mo hande sayale hombeleke make koto ale manda꞉ meao wepimiki sayale make mo alena꞉ bikina꞉ taapa꞉ wiao la꞉la꞉ namba make bepolao haleme wanda꞉hali handoa꞉me. Ikita꞉ mo kalasi hama꞉ tea꞉na꞉ tilao hata꞉ Koda꞉ma꞉ hala꞉la꞉ kidama꞉ handeke alemanu miniki hata꞉

³mo Koda꞉na꞉ e pokeeke hali Mosesina꞉ emeli make mo Sipisipi Ma꞉na꞉ Ikikina꞉ emeli make lememe. Ikana꞉ma꞉ alota꞉Aneke Tekehali Koda꞉o.Naka꞉ pita꞉la꞉eki manuta꞉ ta꞉ta꞉ ma꞉nda꞉ peao make yole make pa꞉la꞉me.Tapake paeyaona꞉ kinio.Naka꞉ pitele haumanu paeyaota꞉ tikitiki pea ota꞉ hau manue.

⁴Tekehali neketa꞉ epima꞉ paala꞉ma꞉ na homilia꞉pe.Naka꞉ hau tieke laaluekema꞉ta꞉ epima꞉ kiaalia꞉pe.Neke homeke homeke yako peleme.Wanda꞉hali paeyaota꞉ neke pa꞉ta꞉ a꞉pa panda꞉ puniao yeiya꞉ laaso hata꞉ yeni pilimikie.Pa ekipeke naka꞉ yakopiki hau manuta꞉ paeyaoma꞉ amba꞉ handelememe lememe.

⁵Koto hoki naneta꞉ oli hepeni nane mo tembolo da pota꞉ lumba wiekeeki handoa꞉me. Kutupa mo da tukikina꞉ta꞉ amba꞉ hande Koda꞉ ipika꞉ wanda꞉hali ame̱le̱ pi lo hayeke palai da handoa꞉me.

⁶Mo watake hata꞉ enisolo manuta꞉ mo watake hata꞉ ke handa꞉peke ekimanu miniki hata꞉ tembolo pa꞉ta꞉ hao epememe. Ikita꞉ hake piki leke yale yale piki dau yama koloma꞉ wepiki beleke ika꞉ hakokona꞉ yamemekeme.

⁷Kutupa mo hande deto hala꞉ tonkopu ale homekema꞉ mo watake hata꞉ enisolomanu pa꞉ta꞉ mo hoto paeyao pa hao halo pa꞉la꞉ Koda꞉na꞉ mineke panka꞉la꞉ ekima꞉ tumbiki watake hata꞉ kawasomanu halea꞉me.

⁸Mo Koda꞉na꞉ wele pita꞉ pa̱a̱ yaapo pa꞉ta꞉ yama꞉ epea꞉ lumuma꞉ta꞉ mo tembolo tumbulu baeya꞉me. Kutupa mo tembolo pa꞉ta꞉ta꞉ ma꞉nda꞉ pua꞉peke na ya꞉pate pa mo watake hata꞉ enisolo manuma꞉ mo watake hata꞉ ke handaasa꞉eki mea ipu paeya꞉ka꞉na꞉ta꞉ wetepena꞉ pua꞉peke ya꞉me.