Read Sembeleke Peneme Yaeyekeeki 16 Bible Online

Peneme Yaeyekeeki 16 - Sembeleke bible

Peneme Yaeyekeeki 16

¹Kutupa mo tembolo pa꞉ta꞉ yama꞉ pi ho̱la̱꞉make wopuma꞉ mo watake hata꞉ enisolo pa꞉ta꞉ alota꞉ Kenkena꞉ pua mo Koda꞉na꞉ mineke panka꞉la꞉eki pamba꞉la꞉ watake hata꞉ kawasomanu hola꞉pe lea꞉me.

²Koto ekina꞉ titina꞉ enisoloma꞉ ipika꞉ kawaso kenkena꞉ pua holaeya꞉me. Kutu pieke handaa ota꞉ hoke tanda tieke piki boleke manuta꞉ mo hande hoke sayalena꞉ maka talaeme tapake make mo ale manda꞉ meao wepimiki ale pa꞉ta꞉ panda꞉puniao yeni pu haeme wanda꞉hali pa꞉ta꞉ pua pitia꞉me.

³Kutupa yaapo peao enisoloma꞉ ipika꞉ kawaso mo dawala manda pua holaeya꞉me. Mo ikalita꞉ homeke halina꞉ wema꞉ handaata꞉ koto dawala pa꞉ta꞉ pitimi ale paeyao homememe.

⁴Kutupa tepo peao enisoloma꞉ ipika꞉ kawaso mea pua mo ikalimanu make opa꞉la꞉ ikali pa꞉ta꞉manu holaeya꞉ dina꞉ta꞉ we au lolo yapea꞉me.

⁵Kutupa mo ikalimanu handeteke haya꞉ enisoloma꞉ alota꞉ Naka꞉ panisi pealuekema꞉ ma̱leke liaasa꞉eki manuta꞉ ota꞉ ana꞉na꞉ kone wa꞉peleme. O ota꞉ yako piki someo. Neke ame hale make amba꞉ hae makee.

⁶Pa ekipeke ikana꞉ma꞉ta꞉ mo Koda꞉na꞉ wanda꞉halina꞉ we make mo potopede haliwekina꞉ we make holememe. Koto ekina꞉ ame nakana꞉ma꞉ta꞉ iki make we ikali nena꞉ haleleme. Ikana꞉ma꞉ta꞉ ika꞉ ekina꞉ yenki kone mina꞉lememe laa lea꞉me.

⁷Kutupa mo oloda pa꞉ta꞉ yama꞉ pi ho̱la̱꞉makema꞉ alota꞉ Wele wopupiki Tekehali Koda꞉o. Naka꞉ panisi pealuekema꞉ ma̱leke liaasa꞉eki manuta꞉ tikitiki pea make ota꞉ ana꞉na꞉ wepeleme lea꞉me.

⁸Koto hoki naneta꞉ mo tonko peao enisoloma꞉ ipika꞉ kawasota꞉ natena꞉ holaeya꞉me. Kutupa mo nate ipika꞉ wele wopu piki titipuma꞉ wanda꞉hali tena꞉ waleke halea꞉me.

⁹Mo wanda꞉halita꞉ do wele wopupiki titipuma꞉ to tokilieke handaata꞉ mo ke manuna꞉ handeteke haya꞉ Koda꞉na꞉ biki hoeyaememe. Kutu pimipate ika꞉ hoke hau manuta꞉ hoki na walaa ipika꞉ wele tiekena꞉ biki na mea mina꞉liaememe.

¹⁰Kutupa mo yunki peao enisoloma꞉ ipika꞉ kawasota꞉ mo hoke sayalena꞉ kini seana꞉ pua holaeya꞉me. Kutu pieke handaa timba꞉ ala꞉ ekima꞉ mo hande sayalena꞉ kilu tombuao hala꞉ alena꞉ tumbaeya꞉me. Kutupa wanda꞉halima꞉ tanda tieke nalo hata꞉ ika꞉ kekeke tankolo nememe.

¹¹Kutu pitolo hata꞉ ika꞉ tanda make tete manuna꞉ oli hepeni hala꞉ Koda꞉na꞉ biki hoeyaemepate ika꞉ hoke hau manuta꞉ hoki na walememe.

¹²Kutupa mo yunki mindiki peao enisoloma꞉ ipika꞉ kawasota꞉ mo ikali tieke biki Yupoteitisina꞉ holaeya꞉me. Kutupa mo nate opa꞉la꞉ nane haleme kini manuna꞉ pota꞉ wiaaso mo hande ikalita꞉ hapupa pea꞉me.

¹³Kutupa ki̱ma꞉ handeke ha̱i̱ pambeke temoko tepo handoa꞉me. Ikita꞉ mo popake itiki hake sina꞉ handeke alena꞉ kake pa꞉ta꞉ make mo hoke sayale hombelekena꞉ kake pa꞉ta꞉ make mo yayapiki potopedena꞉ kake pa꞉ta꞉ make pita꞉ opolu bao epememe.

¹⁴Ikita꞉ mo na handeke haumanu pu haleme hoke temokomanue. Mo hoke temoko tepoma꞉ta꞉ do kenke honiki paeyao pa꞉ta꞉ hala꞉ kinimanu pua hatuku mea a꞉pa mo Wele Wopupiki Koda꞉na꞉ Aneke natena꞉ a꞉nda꞉ pina꞉ yeke pimikime.

¹⁵Opie. I̱ta꞉ pake nala꞉ hali leke ipulueke. U̱ na peliki hata꞉ ipika꞉ aka꞉manu wopu handeteke hao hale someta꞉ ta꞉na꞉ma꞉ homilieke. Ipikita꞉ paa tia pominolo hata꞉ wanda꞉hali leke popelekena꞉ yaala꞉ meaapa꞉na꞉yeke pita꞉la꞉me.

¹⁶Kutupa mo hande temoko tepoma꞉ mo kinimanu hatuku a꞉pa mo Hibulu pima꞉ta꞉ Amakedoni la꞉la꞉ alena꞉ a꞉pa momba꞉laeya꞉me.

¹⁷Kutupa mo watake peao enisoloma꞉ ipika꞉ kawasota꞉ oli ya pa꞉ta꞉ holaeya꞉me. Oni mo tembolo pa꞉ta꞉ yama꞉ aneke pi ho̱la̱꞉make alota꞉ Ameta꞉ koto paela꞉ handa꞉e lea꞉me.

¹⁸Kutupa ti tekelemanu make a꞉ta꞉ a꞉ta꞉ piki tutumanu make tutu tiekemanu make ota꞉ hoke yu momeni make pia꞉me. Amba꞉ hali wepia kini pea a꞉pa ame do make kutupiki yu momeni na pa꞉la꞉pate do yu momeni homeketa꞉ paeyao ankulake ota꞉ hoke ta꞉ta꞉ ma꞉nda꞉ pikieki ya꞉mee.

¹⁹Mo aneke daonita꞉ tepo tekilipa mo kenke paeyaona꞉ daoni paeyaota꞉ ota꞉ hoeyaeya꞉me. Koda꞉ma꞉ta꞉ mo hande Ba꞉biloni tieketa꞉ pa niminaaso hata꞉ ipika꞉ wopu mineke panka꞉la꞉ waini ikali ipika꞉ kapona꞉ nena꞉ lea꞉me.

²⁰Mo dawalama꞉ dupala꞉ kenkemanu paeyaota꞉ alu pao mo potemanu paeyaota꞉ alupaeya꞉me.

²¹Leke opeke ya hapeke tieke tiekemanu ka꞉nda꞉ ota꞉ tieke hombeleke piki ekimanu oli ya nanema꞉ yama꞉ a꞉pa wanda꞉hali manda lopea꞉me. Koto wanda꞉halima꞉ta꞉ mo ke handaeya꞉ ya hapekena꞉ Koda꞉na꞉ biki hoeyaememe. Pa ekipeke do keta꞉ ota꞉ hokeeki ya꞉mee.