Read Sembeleke Peneme Yaeyekeeki 17 Bible Online

Peneme Yaeyekeeki 17 - Sembeleke bible

Peneme Yaeyekeeki 17

¹Kutupa mo hande watake hata꞉ kawaso miniki haeme watake hata꞉ enisolo homeke ma꞉nda꞉ma꞉ I̱ pa꞉ta꞉ a꞉pa alota꞉ Epoe. I̱ma꞉ mo hali yolo hala꞉ biki wiki wanda꞉ pa꞉ta꞉ halo pa꞉la꞉ panisi walueke. Mo ikalimanu tea꞉na꞉ a꞉ela꞉ aneke daoni hombelekema꞉ loa꞉me.

²Do kenkena꞉ hala꞉ kini manuma꞉ta꞉ mo wanda꞉ ame̱le̱ hoke loke hoeyaasa꞉ hau pu ombu haememe. Kutupa mo kenke wanda꞉halima꞉ta꞉ ipika꞉ loke hoeyaasa꞉ hau manuna꞉ waini ikali naa keaememe lea꞉me.

³Mo Sipitidima꞉ I̱ pa꞉ta꞉ e pokolo hata꞉ mo enisoloma꞉ I̱ta꞉ hapu hala꞉ alena꞉ mea tia pea꞉me. Koto pa꞉ta꞉ta꞉ wanda꞉ ma꞉nda꞉ma꞉ mo wepiki sayale ma꞉nda꞉na꞉ hoki manda pitia꞉eki handoa꞉me. Mo sayalena꞉ loke paeyao pa꞉ta꞉ta꞉ Koda꞉ kitaasa꞉ bikimanu lao kutupa ipikita꞉ watake hata꞉ amboke hao make kiki yaapo ekekemanu haya꞉me.

⁴Mo wanda꞉ ipika꞉ aka꞉ta꞉ we ta꞉ta꞉ ma꞉nda꞉ yaapo piki au lekeeki yamea꞉me. Kutupa mo aka꞉ta꞉ koloma꞉ wepiki beleke manuma꞉ make seliapo piki toopi manuma꞉ make sekete inkiki manuma꞉ make tumbulu baeya꞉me. Ipika꞉ kiki pa꞉ta꞉ta꞉ ipika꞉ loke hoeyaasa꞉ ekina꞉ yenkita꞉ ota꞉ yaala꞉piki ekimanu make ha̱i̱ pambeke alemanu make tumbulu baeyeke koloma꞉ wepiki kapo miniki haya꞉me.

⁵Mo ipika꞉ wenokona꞉ta꞉ hande a꞉mbaala꞉ ekina꞉ biki dupa wiekeme. Hali yola꞉la꞉ wanda꞉hali make kikana꞉ haumanu pu haleme wanda꞉hali make iki paeyaona꞉ inkiki Ba꞉biloni tieke laa wia꞉me.

⁶Kutupa mo wanda꞉ta꞉ Koda꞉na꞉ wanda꞉halina꞉ make Yesu pa꞉ta꞉ hone tulaa pelia haemeke handa limiki wanda꞉halina꞉ we na̱a̱ keaya꞉eki handoa꞉me. I̱ma꞉ moeki hando haota꞉ ota꞉ hoke tupa꞉ penkilipa꞉tia pomua꞉me.

⁷Mo enisoloma꞉ I̱ lota꞉ pitolo alota꞉ Neketa꞉ ekipeke penkilipa꞉tia pominelepe. I̱ma꞉ neke pa꞉ta꞉ mo wanda꞉na꞉ make mo wanda꞉ mea tia pomu hala꞉ sayalena꞉ a꞉mbao ula꞉ ekina꞉ teke la kionoe. Mo hande watake hata꞉ amboke hao make kiki yaapo ekeke hala꞉ sayalena꞉ loa꞉me.

⁸Koto sayaleta꞉ amba꞉ta꞉ da꞉ta haya꞉pate ameta꞉ na da꞉taa hala꞉me. Ipikita꞉ ame do siki mo honiki na wiki naku kiake pa꞉ta꞉ hama opolu bao ipiki hoeyaena꞉ pelieke. Do kenkena꞉ haleme wanda꞉hali ika꞉ biki manuta꞉ do kenke a̱i̱ na wepiki haena꞉ kone mo deto hala꞉ wanda꞉halina꞉ biki ula꞉ bukana꞉ ika꞉ biki na lake wanda꞉halita꞉ mo hande sayale handolo hata꞉ penkilipa꞉tia pomilimikie. Amba꞉ a꞉nda꞉ta꞉ da꞉ta haya꞉pate ameta꞉ na deteke hala꞉me. Pate paa opolo ipilieke.

⁹Doeki manuta꞉ hone u lenkene pita꞉la꞉eki pita꞉ hone wita꞉la꞉eki yaapoma꞉ handa꞉peke ya꞉la꞉ haue. Mo watake hata꞉ amboketa꞉ watake hata꞉ yueli manue. Kotota꞉ mo hande wanda꞉ pila꞉ alena꞉e. Kutupa make ikita꞉ watake hata꞉ kini manue.

¹⁰Yunki hata꞉ta꞉ lopelemepate homekema꞉ta꞉ ipika꞉ kilu tombuao hala꞉ ekina꞉ pa handeteke hala꞉me. Kutupa ma꞉nda꞉ta꞉ a̱i̱ na a꞉pa꞉la꞉me. Ipiki epea꞉ka꞉na꞉ta꞉ nate hosiki sikima꞉ homeke handeteke halieke.

¹¹Kutupa mo hande amba꞉ta꞉ da꞉ta haya꞉pate ame na da꞉ta hala꞉ sayaleta꞉ ipika꞉ kone ketepo peao kinie. Mo hande watake hata꞉ tapake konee. Ipikita꞉ hoeyaena꞉ pula꞉me.

¹²Mo hande kiki yaapo ekeke manuta꞉ kiki yaapo kini manue. Ikita꞉ a̱i̱ na kini pea handeteke halemepate pa aowa homeke homekena꞉ mo hoke sayale ame̱le̱ handeteke haena꞉ waleke halieke.

¹³Do kiki yaapo ale ikita꞉ teke homeke homeke wia halememe. Ika꞉ honkopu make ika꞉ handeteke haleme wele manuta꞉ mo sayale pa꞉ta꞉ halelememe.

¹⁴Ikana꞉ma꞉ta꞉ mo Sipisipi Ma꞉na꞉ Ikiki ame̱le̱ a꞉nda꞉ pilimikie. Pate mo Sipisipi Ma꞉na꞉ Ikikita꞉ ipika꞉ wi laa yata꞉pa꞉ ma꞉la꞉ hone tulao haleme hoki nane tolu haleme tapake ame̱le̱ hata꞉ mo tapake bepolalimikie. Pa ekipeke ipikita꞉ tekehali paeyaona꞉ Tekehali make kini paeyaona꞉ Kinie lea꞉me.

¹⁵Mo enisoloma꞉ I̱ pa꞉ta꞉ ombu alota꞉ Mo hande hande hali yolo hala꞉ wanda꞉ pitia꞉ ikali manuta꞉ kapomani ta꞉ta꞉ ta꞉ta꞉ma꞉ handeteke hala꞉ kenkemanu make mo ta꞉ta꞉ ta꞉ta꞉ piki wanda꞉hali paeyao make mo tutu ta꞉ta꞉manu make pi ta꞉ta꞉ ta꞉ta꞉ leke tapake manue.

¹⁶Mo hande hande kiki yaapo ekeke manuma꞉ make mo hande sayalema꞉ make ikana꞉ma꞉ mo wanda꞉ ota꞉ honditi pilimikie. Ikana꞉ma꞉ta꞉ mo wanda꞉ma꞉ pambala꞉ ala꞉ta꞉ ala꞉ta꞉ paeyao hola꞉ mea pa tia haena꞉ lelimikie. Mo wanda꞉na꞉ loke mindiki naa kutupa ti ulekema꞉ hoeyaalimikie.

¹⁷Pa ekipeke Koda꞉ma꞉ta꞉ ipika꞉ hone pa꞉la꞉eki peaena꞉ yeke ika꞉ puki pa꞉ta꞉manu ipika꞉ hone pa꞉la꞉eki wina꞉ leeke handaa ikana꞉ma꞉ ta꞉ma꞉ni pea homeke tupa꞉ hau pilimikie. Ika꞉ honkoputa꞉ mo sayale pa꞉ta꞉ halaata꞉ Koda꞉na꞉ pimanu ota꞉ peneme yaalo epena꞉ lelimikie.

¹⁸Mo hande wanda꞉ta꞉ mo aneke daoni hombelekee. Mo kenke honiki paeyaona꞉ kinimanu handeteke hala꞉ daonie laa lea꞉me.