Read Sembeleke Peneme Yaeyekeeki 19 Bible Online

Peneme Yaeyekeeki 19 - Sembeleke bible

Peneme Yaeyekeeki 19

¹Doeki hoki naneta꞉ oli hepeni nane wanda꞉hali tiekema꞉ leke nono pea alota꞉ Haleluya. (Nika꞉ pima꞉ta꞉ Koda꞉na꞉ biki miniliamana꞉e) Da꞉ta꞉mono yeke pa꞉ta꞉la꞉la꞉eki make pa̱a̱ peaasa꞉eki make wele tieke make nika꞉ Koda꞉ pa꞉ta꞉ ula꞉me.

²Ipika꞉ pi yokaalu pita꞉la꞉eki manuta꞉ ota꞉eki make tikitiki pikieki makee. Ipikana꞉ma꞉ta꞉ mo hande hali yolo haya꞉ wanda꞉ ipika꞉ loke hoeyaasa꞉ hauma꞉ kenke paeyao hoeyaeyeke handaa ketete peleme laa ma̱leke liaata꞉ ipikita꞉ panisi peala꞉me. Pa ekipeke mo wanda꞉ma꞉ Koda꞉na꞉ e pokaeya꞉ wanda꞉hali lu homaeyeke handaa loa꞉me laa lememe.

³Paa e̱ wi alo alota꞉ Haleluya. Mo hande aneke daoni mea neliaya꞉ lumuta꞉ honiki na wiki hoto paeyao pa a꞉meiyu hala꞉me lememe.

⁴Mo hali tieke homekena꞉ tonkopu you haliweki make mo deto haleme tonkopu ale manuma꞉ make panda꞉puniao lopa mo kini seana꞉ pitia꞉ Koda꞉ pa꞉ta꞉ yeiya꞉ laaso hata꞉ yeni pimime. Ikana꞉ma꞉ alota꞉ Kutu pina꞉e. Haleluya lememe.

⁵Kutupa mo kini sea pa꞉ta꞉ yama꞉ pi ho̱la̱꞉makema꞉ alota꞉ Koda꞉na꞉ e pokaaseme tapake make ipiki yeiya꞉ laaseme wanda꞉hali make iki paeyaoma꞉ nika꞉ Koda꞉na꞉ biki miniliapee. Mo aneke wanda꞉hali pa꞉ta꞉ make natehali wanda꞉halisunu pa꞉ta꞉ make loa꞉me lea꞉me. Mo Sipisipi Ma꞉na꞉ Ikikina꞉ ne pamba꞉la꞉eki

⁶Kutupa e̱ ala꞉eki ma꞉nda꞉ta꞉ mo wanda꞉hali hombuta꞉ hombeleke hata꞉ make ikali dou lopolo make tutu tieke litolo make leke nono pia꞉eki dupa opua꞉me. Haleluya. Mo Tekehali nika꞉ Aneke Koda꞉ta꞉ kini hala꞉me.

⁷Koto ekina꞉ niki paeyao ta꞉na꞉ma꞉ homomana꞉e. Ipika꞉ tieke hala꞉ ekina꞉ biki mea miniliamana꞉e. Pa ekipeke mo hande Sipisipi Ma꞉na꞉ Ikikina꞉ wanda꞉ mulu pa꞉la꞉ nateta꞉ opolo a꞉pa꞉la꞉me. Ipika꞉ panake wanda꞉ta꞉ mo ekina꞉ amba꞉ tikitiki yao hala꞉me.

⁸Mo wanda꞉ta꞉ hake pea leke yale yale piki dau yamena꞉ hala꞉la꞉me laa lememe. Koto dauta꞉ Koda꞉na꞉ wanda꞉halina꞉ epeke hau piteleme ekie.

⁹Kutupa mo enisoloma꞉ I̱ pa꞉ta꞉ alota꞉ Doeki laaniae. Mo Sipisipi Ma꞉na꞉ Ikikina꞉ wanda꞉ mina꞉la꞉ ekina꞉ ne pamba꞉la꞉ pa꞉ta꞉ epoa꞉ la꞉la꞉ wanda꞉halita꞉ ta꞉na꞉ma꞉ homa꞉pee. Kutupa mo enisoloma꞉ apa꞉taaso alota꞉ Dota꞉ Koda꞉na꞉ ota꞉ pimanue lea꞉me.

¹⁰I̱ta꞉ ipiki yeiya꞉ lao yeni puluku alo ipika꞉ anke teke pa꞉ta꞉ panda꞉puniao lopoa꞉ pa꞉ta꞉ ipikana꞉ma꞉ I̱ pa꞉ta꞉ alota꞉ Ei I̱ pa꞉ta꞉ kotoeki na pia꞉pema. I̱ta꞉ e pokaaso naka꞉ yankekee. Kutupa make naka꞉ kamemanu mo Yesuma꞉ peneme yaeya꞉ ota꞉ pimanu miniki haleme wanda꞉halina꞉ yankeke halome. Koda꞉ pa꞉ta꞉ homeke yeiya꞉ laaso hata꞉ yeni pu hapeke laa lea꞉me. Pa ekipeke mo Yesuma꞉ peneme yaeya꞉ ota꞉ ekita꞉ mo potopede haliwekima꞉ alemeeki hone u tiaasa꞉ekie. Mo hakepiki hosi ma꞉na꞉na꞉ hokina꞉ pila꞉ hali

¹¹Kutupa oli hepeni lumba꞉pa wia mo hakepiki hosi ma꞉na꞉ handoa꞉me. Mo hosi hokina꞉ pitia꞉ halina꞉ bikita꞉ Kima꞉ na homeke hone tu laala꞉eki pita꞉ Ota꞉eki yaapoe lea꞉me. Ipikana꞉ma꞉ tikitiki piki hauma꞉ pi yokaalu pea make ipika꞉ a꞉nda꞉ ipula꞉eki a꞉nda꞉ pu hala꞉me.

¹²Ipika꞉ leketa꞉ titipu pupapeke ti haleke ekima꞉ handaa ipika꞉ ambokena꞉ta꞉ kini you aka꞉ eleke eleke pambaeya꞉me. Biki ma꞉nda꞉ta꞉ mo somena꞉ laeya꞉pate koto bikita꞉ ma꞉nda꞉ma꞉ hone na ula꞉pate ipika꞉ homeke hone ula꞉me.

¹³Ipika꞉ pambaeyeke aka꞉ hokuluta꞉ wema꞉ tote pia꞉me. Ipika꞉ bikita꞉ Koda꞉na꞉ Pie.

¹⁴Mo hepenina꞉ ami manuma꞉ta꞉ ipiki telia꞉ mea pememe. Ikana꞉ma꞉ hakepiki hosi manda pita꞉ hakepiki aka꞉ yamememe.

¹⁵Ipika꞉ kake pa꞉ta꞉ta꞉ do kenkena꞉ kapomani paeyaoma꞉ handeteke hala꞉ tapake lu bepolaena꞉ ne wopu hake bainasi opolu baeya꞉me. Ipikana꞉ma꞉ta꞉ mo ayeni dopitama꞉ iki handeteke hata꞉ mo Aneke Koda꞉ paala꞉ piki mineke panka꞉la꞉ waini dekepo hala꞉ pa꞉ta꞉ pa ula꞉ waini da꞉ka꞉pa꞉ tumba bepilieke.

¹⁶Ipika꞉ aka꞉ hokuluna꞉ make ipika꞉ palekena꞉ maketa꞉ biki dupa laeya꞉me. Kini paeyaona꞉ kinie laa Tekehali paeyaona꞉ Tekehalie.

¹⁷Kutupa mo natena꞉ tiao haya꞉ enisolo ma꞉nda꞉ handoa꞉me. Ipikana꞉ma꞉ mo ya tukikina꞉ a̱e̱ya̱ pomimi bamanu pa꞉ta꞉ anekema꞉ wi la꞉moneaaso alota꞉ Koda꞉na꞉ aneke yawe lita꞉la꞉eki pa꞉ta꞉ a꞉pa momba꞉la꞉pee laata꞉

¹⁸A꞉pa mo kini manuna꞉ make ami you haliwekina꞉ make ami titina꞉ loke make paeyao a꞉pa napee. Kutupa hosi ma꞉na꞉ manuna꞉ loke make hosi mea pomu haleme haliwekina꞉ loke make wanda꞉hali paeyao pa hameke e poka꞉la꞉ wanda꞉halina꞉ loke make pa haleme wanda꞉halina꞉ loke make natehali wanda꞉halina꞉ loke make aneke wanda꞉halina꞉ loke paeyao a꞉pa napee lea꞉me.

¹⁹Kutupa mo hande sayale tieke hombeleke make do kenkena꞉ kinimanu make ika꞉ ami paeyaoma꞉ mo hande hosi hokina꞉ pitia꞉ hali pita꞉ ipika꞉ ami ame̱le̱ a꞉nda꞉ puluekema꞉ mombelememe.

²⁰Mo sayale make mo sayalena꞉ leke popelekena꞉ na handeke haumanu pia꞉ makeaaso potopede hali make dipula minimime. Koto pia꞉ na handeke hau manuma꞉ta꞉ ipikana꞉ma꞉ mo sayalena꞉ tombo ika꞉ wenokona꞉ wimi wanda꞉hali make mo manda꞉ meao wepimi sayale pa꞉ta꞉ yeiya꞉ laaso hata꞉ yeni pimi wanda꞉hali make makeaeya꞉me. Mo sayale tieke hombeleke pita꞉ mo makeaaso potopede hali yaapo pa pitiki oni titipupiki lanka꞉ ma꞉nda꞉ solopa tala꞉ ti uleke kiake pa꞉ta꞉ lopaememe.

²¹Ika꞉ ami titita꞉ mo hosi ma꞉na꞉ hokina꞉ pitia꞉ halina꞉ kake pa꞉ta꞉ yama꞉ epea꞉ bainasima꞉ lu petepete pia꞉me. Kutupa mo ba manuma꞉ mo tokomanu naaka꞉na꞉ ika꞉ weleke ana꞉ pia꞉ka꞉na꞉ta꞉ mina꞉pa꞉lalimikie.