Read Sembeleke Peneme Yaeyekeeki 6 Bible Online

Peneme Yaeyekeeki 6 - Sembeleke bible

Peneme Yaeyekeeki 6

¹Kutupa mo Sipisipi Ma꞉na꞉ Ikikima꞉ mo titina꞉ watake hata꞉ tonkaake ale homeke ma꞉nda꞉ ka꞉la꞉peeke handoa꞉me. Kutupa mo deto hala꞉ tonkopu ale homeke ma꞉nda꞉na꞉ pi ho̱la̱꞉makema꞉ tutu liki nono pea alota꞉ Epoe leeki opua꞉me.

²I̱ma꞉ handoeketa꞉ handeta꞉ hakepiki hosi ma꞉na꞉ yekeme. Mo ma꞉na꞉ hokina꞉ pitieke halima꞉ta꞉ a꞉ndeli miniki pitia꞉me. Ipikita꞉ you aka꞉ halea꞉me. Kutu pieke ipikita꞉ a꞉nda꞉ bepolalo poluekema꞉ pula꞉ hali tupa꞉ mo ma꞉na꞉ hokina꞉ pita pea꞉me.

³Kutupa mo Sipisipi Ma꞉na꞉ Ikikima꞉ hande yaapo peao tonkaake ale ka꞉la꞉peaaso haena꞉ta꞉ mo deto hala꞉ ale yaapo peao ekima꞉ alota꞉ Epoe lea꞉me.

⁴Koto pa꞉ta꞉ wepiki hosi ma꞉na꞉ ma꞉nda꞉ opolo epea꞉me. Mo hosi ma꞉na꞉ hokina꞉ pitieke halita꞉ do kenkena꞉ hali yankeke ika꞉ ika꞉ kone lu alu alu pina꞉yeke a꞉nda꞉ pita꞉la꞉eki mea epena꞉yeke honkopu halea꞉me. Kutupa make bainasi tieke tonka꞉na꞉ halea꞉me.

⁵Kutupa mo Sipisipi Ma꞉na꞉ Ikikima꞉ mo tepo peao tonkaake ale ka꞉la꞉pea꞉ ale pa꞉ta꞉ta꞉ mo deto hala꞉ ale tepo peao ekima꞉ alota꞉ Epoe lea꞉me. I̱ma꞉ handoeketa꞉ handeta꞉ punupiki hosi ma꞉na꞉ yekeme. Koto hosi ma꞉na꞉na꞉ hoki manda pitieke halima꞉ta꞉ mo ka꞉nda꞉ tombo mu hala꞉ ale minia꞉me.

⁶Hande deto hala꞉ tonkopu alemanu haeme ale tukiki pa꞉ta꞉ pi ho̱la̱꞉makema꞉ leke nono pea alota꞉ Nate homekena꞉ e pokaa mina꞉la꞉ yenkima꞉ta꞉ widi putu piliki siki homeke hambena꞉ laa mo widima꞉ handeke ale balita꞉ tukikina꞉ putupaa homeke yenkima꞉ kone hambena꞉e. Koto pa꞉la꞉pate mo olipi timanu make waini emanu make na hoeyaapa꞉peke lea꞉me.

⁷Kutupa mo Sipisipi Ma꞉na꞉ Ikikima꞉ tonko peao tonkaake ale ka꞉la꞉pea꞉ ale pa꞉ta꞉ta꞉ mo tonko peao deto hala꞉ alema꞉ alota꞉ Epoe lea꞉me.

⁸Handoeketa꞉ handeta꞉ hamipiki hosi ma꞉na꞉ yekeme. Mo hosi ma꞉na꞉ manda pitieke halina꞉ bikita꞉ Homa꞉la꞉eki lea꞉me. Kutupa ipika꞉ hoki naneta꞉ mo homa꞉la꞉ wanda꞉halina꞉ temoko hala꞉ kenketa꞉ telia꞉ mea teke pa꞉ta꞉ ipulu haya꞉me. Ipilikita꞉ do kenke tonkopu tekilipa homeke homeke pa꞉ta꞉ta꞉ a꞉nda꞉ pita꞉la꞉eki make tea꞉ ki make yeni ki make hapekena꞉ hala꞉ yeti sayale manuma꞉ make paeyao lina꞉yeke honkopu halea꞉me.

⁹Kutupa mo Sipisipi Ma꞉na꞉ Ikikima꞉ yunki peao tonkaake ale ka꞉la꞉pea꞉ ale pa꞉ta꞉ta꞉ mo hande amba꞉ Koda꞉na꞉ pi walaaso hata꞉ kima꞉ na homeke walaemeke handa limiki haliwekina꞉ temokomanu mo oloda oto pa꞉ta꞉ wieke handoa꞉me.

¹⁰Koto temoko manuma꞉ anekema꞉ e̱ wi alota꞉ Yako pea ota꞉ hau pu hale wele wopu piki Tekehalio. Mo niki limi tapake panisi pealuekema꞉ do kenke wanda꞉hali pi yokaalu pulu pele nateta꞉ handima꞉pe lememe.

¹¹Mo haliweki homeke homeketa꞉ hake piki dau hale hale pea alota꞉ Mo iki litolo pia꞉ tupa꞉ ika꞉ e pokeleme yankeke titi paeyao ana꞉na꞉ lu paeyaena꞉ hosiki siki hoto pita꞉pee lea꞉me.

¹²Kutupa mo Sipisipi Ma꞉na꞉ Ikikima꞉ mo yunki mindiki hata꞉ tonkaake ale ka꞉la꞉peeke handoa꞉me. Koto dina꞉ta꞉ paala꞉ piki yu momeni tieke pea mo nateta꞉ da hokolo pupapeke aka꞉ hankolakema꞉ handaata꞉ mo kaisepota꞉ we au lolo yapea꞉me.

¹³Mo hombulanka꞉ manuta꞉ mo hande kankake nose kiliki po tilipu tiekema꞉ tandela꞉ lita꞉leke lopa꞉la꞉ tupa꞉ oni kenkena꞉ honda꞉pa lopea꞉me.

¹⁴Oli yata꞉ mo hande keda tako pu minolo pita꞉la꞉ tupa꞉ alupaeya꞉me. Kutupa pote paeyao make dawalama꞉ popei yaala꞉ kenkemanu paeyaota꞉ ika꞉ hao hala꞉ tupa꞉ na hake ane mone pimime.

¹⁵Kutupa do kenkena꞉ kinimanu make handeteke hala꞉ haliweki make amina꞉ you haliweki make hamoko haliweki make wele wopu piki haliweki make pa hameke e pokaaseme haliweki make pa haleme haliweki make paeyao siki oni apa꞉nda꞉ make pote pa꞉ta꞉manu ula꞉ toopi tieke tieke pa꞉ta꞉manu a꞉mbao pitulu endi pimime.

¹⁶Mo wanda꞉halima꞉ mo potemanu make toopimanu pa꞉ta꞉ wi la꞉ moneaaso alota꞉ Mo kini seana꞉ pila꞉ halina꞉ leke popelekena꞉ make mo Sipisipi Ma꞉na꞉ Ikikina꞉ mineke panka꞉la꞉eki a꞉mbao niki manda a꞉pa lopa꞉pee.

¹⁷Ipilika꞉ mineke panka꞉la꞉ ota꞉ hoke nateta꞉ doma꞉ ma꞉nda꞉ epima꞉ doeki mea baapeke ya꞉la꞉pe lememe.