Read cisena Kutoma 11 Bible Online

Kutoma 11 - cisena bible

Kutoma 11

¹Pakutoma anthu onsene a padziko yapansi akhali na chilongero chibodzi, pontho akhaphatisa basa mafala abodzi ene.

²Pikhafuluka iwo kwendera kumabulukiro dzuwa a dziko yapansi, adafika pambuto inango yaphedi mu Shinari mbakhazikika kweneko.

³Tenepo iwo adalonga kuna unango na mwanzache mbati, “Tendeni tiumbe njerwa kwache tizipise mwadidi mwene.” Natenepo adaumba njerwa zakumangira nazo, pontho akhali na upula wakuphatisira nawo njerwazo.

⁴Tenepo iwo adalonga mbati, “Tendeni timange mzinda wakukhala na nsanja yakulapha yakufikiratu kudzulu, towera tipichitise tekha ene kukhala akuveka, pontho kuti tileke balalika padziko yonsene yapansi.”

⁵Tenepo MBUYA adatchitha dzaona mzinda na nsanja idamanga anthu ile,

⁶mbalonga mbati, “Ngayang'anani, onsenewa mbanthu abodzi, pontho akulonga chilongero chibodzi; yeneyi ndi nthomatoma ya pinthu pinafuna kuchita iwo m'tsogolo muno. Apo iwo anakwanisa kuchita pinthu pyonsene pinafuna iwo.

⁷Tendeni titchithe pontho tikavunganize chilongero chawo, towera aleke vana unango na mwanzache.”

⁸Natenepo MBUYA adaabalalisa padziko yonsene yapansi. Iwo adaleka kumanga mzindawo.

⁹Mzindawo udathulwa Babele,[27] thangwi penepo MBUYA adavunganiza chilongero cha anthu onsene, pontho kubulukira penepo adabalalisa anthu padziko yonsene yapansi.

¹⁰Ipi mphidzukulu pya Semu. Pidagwanda pyaka piwiri kumala kwa madzi makulu, pontho pikhali Semu pyaka dzana pyakubalwa, iye adabala mwana wamamuna dzinache Aripakisadi.

¹¹Kubuluka penepo adakhala pontho pyaka madzana mashanu mbabala pontho ana anango.

¹²Pikhali Aripakisadi pyaka makumatatu na pishanu pyakubalwa, adabala mwana wamamuna dzinache Shela;

¹³kubuluka penepo adakhala pontho na moyo pyaka pinango madzana manayi na pitatu mbabala pontho ana anango.

¹⁴Pikhali Shela pyaka makumatatu pyakubalwa, adabala mwana wamamuna dzinache Eberi;

¹⁵kubuluka penepo adakhala pontho na moyo pyaka pinango madzana manayi na pitatu mbabala pontho ana anango.

¹⁶Pikhali Eberi pyaka makumatatu na pinayi pyakubalwa, adabala mwana wamamuna dzinache Pelegi;

¹⁷kubuluka penepo adakhala pontho na moyo pyaka pinango madzana manayi na makumatatu mbabala pontho ana anango.

¹⁸Pikhali Pelegi pyaka makumatatu pyakubalwa, adabala mwana wamamuna dzinache Reu;

¹⁹kubuluka penepo adakhala pontho na moyo pyaka pinango madzana mawiri na pifemba mbabala pontho ana anango.

²⁰Pikhali Reu pyaka makumatatu na piwiri pyakubalwa, adabala wamwana mamuna dzinache Serugi;

²¹kubuluka penepo adakhala pontho na moyo pyaka pinango madzana mawiri na pinomwe mbabala pontho ana anango.

²²Pikhali Serugi pyaka makumatatu pyakubalwa, adabala mwana wamamuna dzinache Nahori;

²³kubuluka penepo adakhala pontho na moyo pyaka pinango madzana mawiri mbabala pontho ana anango.

²⁴Pikhali Nahori pyaka makumawiri na pifemba pyakubalwa, adabala mwana wamamuna dzinache Tera;

²⁵kubuluka penepo adakhala pontho na moyo pyaka pinango dzana na khumi na pifemba mbabala pontho ana anango.

²⁶Pikhali Tera pyaka makumanomwe pyakubalwa, adabala ana atatu achimuna, Abramu, Nahori, na Harani.

²⁷Ipi mphidzukulu pya Tera, ule adabala Abramu, Nahori na Harani. Harani adabala Loti,

²⁸tenepo Harani adafa m'mzinda wa Uri mu Akaladea, mudabalwa iye mule, mwenemo babache akali moyo.

²⁹Abramu adasemba Sarai. Nahori adasemba Milika, ule ndi mwana Harani, ule pontho akhali babache Isika.

³⁰Mbwenye Sarai akhali ngomwa.

³¹Tera adakwata mwanache Abramu, mdzukuluache Loti mwana Harani na mkwenyache Sarai, ule akhali mkazi Abramu, mbabuluka mumzinda wa Uri wa ku Kaladea mbaenda nawo kudziko ya Kanani. Iwo adenda mpakana kudziko ya Harani mbakhazikika kweneko.

³²Tera adafa kweneko ana pyaka madzana mawiri na pishanu.