Read cisena Kutoma 12 Bible Online

Kutoma 12 - cisena bible

Kutoma 12

¹MBUYA adalonga kuna Abramu mbati, “Buluka m'dziko yako, mbusiye abale ako na pya m'nyumba ya babako mbuende kudziko inafuna ine kukuonesa.

²Ine ndinati ndikupase pidzukulu pizinji pontho iwo anakhala dzinza ikulu. Ine ndinati ndikutsanzayise mbandichitisa dzinako kukhala yakuveka, towera iwe ukhale mtsanzayiso kuna anango.

³Ine ndinati nditsanzayise anyakukutsanzayisa, Mbwenye ndinatemberera anyakukutemberera. Pontho kudzera muna iwe ndinatsanzayisa madzinza onsene.”[28]

⁴Natenepo Abramu adabuluka ninga mudampangira MBUYA mule, kwache Loti adenda naye pabodzi. Abramu akhali pyaka makumanomwe na pishanu pyakubalwa pikhabuluka iye m'mzinda wa Harani.

⁵Abramu adakwata Sarai mkazache, Loti mwana mbaleache na mfuma yonsene pontho na mabitchu ache onsene akhali na iye mu Harani, mbatoma ulendo wawo kwenda kudziko ya Kanani. Pidafika iwo mu Kanani,

⁶Abramu adafamba m'dzikomo mpakana adafika pamuti wakupambulika wamthundu wa ku More muluwani ya Shekemu. Pandzidzi wenewu Akanani akhali m'dzikomo.

⁷MBUYA adaonekera kuna Abramu mbampanga mbati, “Yeneyi ndiye dziko inafuna ine kupereka kuna pidzukulu pyako.” Tenepo Abramu adamanga guwa yakuperekerapo nsembe kuna MBUYA, akhadamuonekera ule.

⁸Kubuluka penepo iye adafedzera kumwera kudziko yamapiri kumabulukiro dzuwa a mzinda wa Betele mbamanga misasache pakati pa kumadokero dzuwa a Betele na kumabulukiro dzuwa a mzinda wa Ai. Penepo adamanga guwa yakuperekerapo nsembe mbapembedza MBUYA.

⁹Kubuluka penepo Abramu adenda mbuto na mbuto kufedzera kuthando yatchetcha ya Negebu.

¹⁰Mbwenye m'dziko ya Kanani mukhali njala ikulu mwakuti Abramu adathimiza kwenda kumwera mbafika mu Iguputo, towera akakhale kweneko ndzidzi pang'ono.

¹¹Pikhali iye chifupi kupita mu Iguputo, adalonga kuna Sarai mkazache mbati, “Iwe ndiwe mkazi wakubalika pyakwanga.

¹²Anthu a ku Iguputo angakuona anati akalonge kuti, ‘Weneyu ndi mkazache,’ natenepo iwo anandipha mbakuleka iwe na moyo.

¹³Tenepo uapange kuti iwe ndiwe nyamainganga; natenepo iwo anandileka kukhonda kundipha mbandiyang'anira mwadidi thangwi ya iwepo.”

¹⁴Pidapita iye mu Iguputo mule, anthu a mwenemo adaonadi kuti mkazache akhali wakubalika pyakwanga.

¹⁵Mathubu a mfumu wa Iguputo adamuona mkazi ule mbakalonga kuna mfumu pya kubalika kudachita iye, natenepo adaendeswa kunyumba yachifumu.

¹⁶Na thangwi ya mkazi ule, mfumu adamuyang'anira Abramu mwadidi mbampasa mikumbi ya mabira, mbuzi, ng'ombe, mabulu, mabitchu na ngamila.

¹⁷Mbwenye na thangwi yakuti mfumu adakwata Sarai, mkazi Abramu, MBUYA adagwisa utenda wakugoswa pa mfumu na pana anthu onsene a kunyumba kwache.

¹⁸Tenepo mfumu adachemeresa Abramu mbamvunza mbati, “Chachita iwe kuna inechi ninji? Udalekeranji kundipanga kuti weneyu ndi mkazako?

¹⁹Apo udalongeranji kuti weneyu ndi nyamaingako mbundichitisa kumkwata ninga mkazanga? Mkazako ushu; umkwate pontho mubulukemo m'dziko muno!”

²⁰Mfumu ule adatonga amunache kubulusa Abramu m'dzikomo, natenepo iwo adakwata Abramu, na Sarai mkazache, pontho na pyonsene pikhali na iye, mbaabulusa m'dzikomo.