Read cisena Kutoma 13 Bible Online

Kutoma 13 - cisena bible

Kutoma 13

¹Abramu adabuluka kumpoto kwa dziko ya Iguputo pabodzi pene na mkazache na pyonsene pikhali na iye, pontho Loti adenda naye pabodzi, mbafika kuthando yatchetcha ya Negebu.

²Abramu adafuma pyakwanga. Akhali na pifuyo pontho siliva na golidi.

³Tenepo iye adabuluka kuthando yatchetcha ya Negebu mbafamba mbuto na mbuto kwendera ku Betele. Iye adafika pambuto, ile ikhali pakati pa Betele na Ai, kule kukhadamanga iye misasache pakutoma pale,

⁴pontho kule kukhadamanga iye guwa yakuperekerapo nsembe. Kweneko Abramu adapembedza MBUYA.

⁵Loti akhafamba na Abramu ule akhalimbo na mikumbi ya pifuyo, pontho akhali na banjache na anyabasache.

⁶Mbwenye pakhali nkhabe mbuto yakukwana ya mpovu mwakuti anthu awiri ale hadakwanise kukhala pabodzi tayu, thangwi onsene uwiriawo akhali na pifuyo pizinji pyakwanga.

⁷Natenepo mapoko-poko adalamuka pakati pa amakabuswa a Abramu na a Loti. Pandzidzi wenewo Akanani na Aperizi akhakhalambo m'dzikomo.

⁸Tenepo Abramu adalonga kuna Loti mbati, “Ife ngubaleathu, natenepo paleke khala mapoko-poko pakati pa iwe na ine, penu pakati pa amakabuswako na amakabuswanga.

⁹Ayi dziko yonseneyi hunaiona iwe tayu? Apo, tende tiphadzane pyathu. Ngakhala iwe unaendera kumabzere, inembo ndinaendera kumadyo; ngakhala iwe unaendera kumadyo, inembo ndinaendera kumabzere.”

¹⁰Loti adakwiza maso ache mbaona kuti phedi yonsene ya Yorodani kwendera ku Zoari ikhali na madzi azinji ninga Munda wa MBUYA,[29] penu ninga dziko ya Iguputo. Ndzidzi wenewo MBUYA hakhadadzati kuvunga mizinda ya Sodomu na Gomora.

¹¹Natenepo Loti adasankhula phedi yonsene ya Yorodani kuti ikhale yache. Tenepo adabuluka mbafedzera kukhundu yakumabulukiro dzuwa. Enewo ndiye akhali maphadzaniro ache a amuna awiri ale.

¹²Abramu adakhala m'dziko ya Kanani, mbwenye Loti adakhala paphedi ya pakati pa mizinda, mbamanga msasache chifupi na Sodomu,

¹³mzinda ule anthu ache akhali akuipa, pontho akudawika pamaso pa MBUYA.

¹⁴Pidamala Loti kuphadzana na Abramu, MBUYA adalonga kuna Abramu mbati, “Kubulukira pana iwepo, kwiza maso ako mbuyang'ane kumpoto, kumwera, kumabulukiro dzuwa na kumadokero dzuwa.

¹⁵Dziko yonsene inaona iweyi ndinati ndiipereke kuna iwe na kuna pidzukulu pyako mbikhala yako kwenda na kwenda.

¹⁶Ndinati ndikupase pidzukulu pizinji pyakuti nkhabe munthu anakwanisa kupilengesa pyonsene tayu. Pinainjipa ninga tchetcha ya padziko yapansi mwakuti ngakhala munthu anakwanisa kulengesa tchetcha padziko yapansi, penepo pidzukulu pyako pinakwanisika kulengeswambo.

¹⁷Chinchino ndoko ufambe kuzungulira dziko yonseneyi towera uione, thangwi ndikufuna ndikupase dziko yonseneyi.”

¹⁸Natenepo Abramu adathukusa misasache mbakakhala chifupi na miti yakupambulika yamthundu ya ku Mamure kuluwani ya Hebroni. Kweneko adamangako guwa yakuperekerapo nsembe kuna MBUYA.