Read cisena Kutoma 14 Bible Online

Kutoma 14 - cisena bible

Kutoma 14

¹Mafumu manayi, Amurafele wa ku Shinari, Arioki wa ku Elasara, Kedorilaomere wa ku Elamu na Tidala wa ku Goimu,

²adenda kachita nkhondo na mafumu anango ashanu, Bera wa ku Sodomu, Birisha wa Gomora, Shinabu wa ku Adima, Shemebere wa ku Zeboimu na mfumu wa ku Bela (penu Zoari).

³Mafumu onsene ashanu akumalisirawa adagumanyikana paphedi ya Sidimu, ile chinchino ndi Nyanza Yakufa, mbasasanya gulu ibodzi ya nkhondo.

⁴Pyaka khumi na piwiri iwo akhali pansi pa utongi wa Kedorilaomere, mbwenye chaka chakhumi na chitatu iwo adampandukira.

⁵Chaka chakhumi na chinayi Kedorilaomere pabodzi pene na mafumu adasasanya nawo gulu ibodzi ya nkhondo ale, adalamuka mbakakunda Arefaimu a mumzinda wa Ashiteroti-Kanaimu, Azuzi a mumzinda wa Hamu, Aemimu a m'phedi ya Kiriataimu,

⁶na Ahori a m'mapiri a Seiri, mbaathamangisa mpakana ku Eliparani chifupi na nkhomole ya thando yatchetcha.

⁷Kubuluka penepo iwo adazungunukira m'nduli mbaenda ku Kadeshi, ile kale ikhachemerwa Enimishipati. Iwo adakunda anthu onsene a dziko ya Aamaleki pontho na Aamori ene, akhakhala mu Hazazoni Tamara ale.

⁸Tenepo mfumu wa ku Sodomu, mfumu wa ku Gomora, mfumu wa ku Adima, mfumu wa ku Zeboimu na mfumu wa ku Bela (yeneyi ndi Zoari) adandandalisa anyankhondo awo paphedi ya Sidimu, mbamenyana

⁹na Kedorilaomere mfumu wa ku Elamu, Tidala mfumu wa ku Goimu, Amurafele mfumu wa ku Shinari na Arioki mfumu wa ku Elasara; mafumu mashanu kumenyana na mafumu manayi.

¹⁰Phedi ya Sidimu ikhadadzala na madzenje a upula, natenepo pikhathawa mafumu a Sodomu na Gomora pabodzi na amunawo ale, anango a iwo adagwera m'madzenje mule, mbwenye anango onsene adathawira kumapiri.

¹¹Mafumu manayi ale adathukula pyonsene pya mu Sodomu na Gomora, podi na phoso yawo ene mbaenda pyawo.

¹²Loti, mdzukuluache Abramu, akhakhala mu Sodomu, natenepo iwo adathukula Loti na pinthu pyache pyonsene.

¹³Mbwenye munthu mbodzi, ule akhadathawa, adadza mbalonga pyonsenepi kuna Abramu, munthu wa Chiheberi, ule akhakhala chifupi na miti yakupambulika ile mwenechiroache akhali Mamure wa Chiamori. Mamure na abale ache awiri, Eshikolo na Aneri, akhali gulu ibodzi yankhondo na Abramu.

¹⁴Pidava Abramu kuti mdzukuluache aphatwa ninga nyaperezo, iye adachemeresa anyankhondo ache onsene a mumsasa mwache. Onsene pabodzi akhali madzana matatu na khumi na asere. Iwo adathamangisa mafumu manayi ale mpakana ku Dani.

¹⁵Na mosiku mwache Abramu adagawa anyankhondo ache m'magulu-magulu. Iwo adamenya anyamalwawo ale mbaakunda. Natenepo adaathamangisa mpakana ku Hoba kumpoto kwa mzinda wa Damasiko,

¹⁶mbapulumusa pinthu pyonsene pikhadakwatwa pile. Abramu adapulumusa pontho Loti mdzukuluache mbabwera naye na pinthu pyache pyonsene pabodzi pene na akazi na anthu anango.

¹⁷Pidabwera Abramu kubulukira kunkhondo kukhadakunda iye Kedorilaomere na mafumu anango kule, mfumu wa mu Sodomu adalamuka kagumanikana naye paphedi ya Shave, yakuchemerwa pontho Phedi ya Mfumu.

¹⁸Pontho Melekizedeki, ule akhali mfumu wa mzinda wa Salemu, pontho nyansembe wa Mulungu Wakudzulu-dzulu, adadza na mikate na vinyu kuna Abramu,

¹⁹mbamtsanzayisa mbati, “Mulungu Wakudzulu-dzulu, ule adasasanya kudzulu na pansi pano mbakutsanzayise iwe, Abramu!

²⁰Mulungu Wakudzulu-dzulu ule adakupasa mphamvu zakukunda nazo anyamalwako mbalemedzwe!” Tenepo Abramu adapereka kuna Melekizedeki chakhumi cha pinthu pyonsene pidapulumusa iye pile.

²¹Mfumu wa Sodomu adalonga kuna Abramu mbati, “Pinthu pyonsenepi pidapulumusa iwe ukwate, mbwenye undibwezere anthu anga onsene.”

²²Abramu adatawira mbati, “Ine ndinadumbira pikulu pene pamaso pa MBUYA, Mulungu Wakudzulu-dzulu, Nyakusasanya kudzulu na pansi pano,

²³kuti ine nkhabe koya chinthu na chibodzi chene chako tayu, podi na usalu ene penu nthambo za nkhwaira, towera iwe uleke kwanisa kulonga kuti, ‘Amchitisa Abramu kufuma ndine pano.’

²⁴Ine nkhabe kwata chinthu na chibodzi chene kuti chikhale changa tayu. Chinafuna ine kutawira ntchenecho chene chidaphatisa amunangawa basa. Mbwenye aleke anthu adenda na ine pabodzi, Aneri, Eshikolo na Mamure, akwate khundu yawo.”