Read cisena Kutoma 15 Bible Online

Kutoma 15 - cisena bible

Kutoma 15

¹Pikhadamala penepi, Abramu adaona masomphenya mbava MBUYA akulonga kuna iye kuti, “Abramu, leka gopa. Ine ndinakutchinjiriza kuna pyakugoswa, pontho ndinakupasa mfupo ukulu.”

²Mbwenye Abramu adatawira mbati, “MBUYA Mulungu, mfupowo unandiganyalisanji podi ine nkhabe mwana, pontho nyakufuna kupita panyumba panga ndi Eliezere, munthu wa ku Damasikoyu.

³Imwe nee mwandipasa mwana tayu; natenepo bitchu wa panyumba panga anati apite panyumba panga.”

⁴Tenepo adava MBUYA akulonga kuna iye kuti, “Eliezere, bitchuyi nkhabe pita panyumba pako tayu, mbwenye mwanako chadi-chadi ndiye anafuna kupita panyumba pako.”

⁵MBUYA adenda na Abramu panja mbalonga mbati, “Ngayang'ana kudzuluku, pontho yesera kulengesa nyenyezi; iwe unati ukhale na pidzukulu pizinji ninga penepyo.”

⁶Abramu adakhulupira MBUYA, na thangwi ya penepi MBUYA adakomerwa naye mbamuyesa munthu wakulungama.

⁷Tenepo MBUYA adalonga kuna iye mbati, “Ine ndine MBUYA, ule adakubulusa mu Uri, dziko ya Akaladea, mbandikupasa dziko ino kuti ikhale yako ene.”

⁸Mbwenye Abramu adavunza mbati, “MBUYA Mulungu, ndinapidziwa tani kuti dzikoyi inakhala yanga ene?”

⁹Tenepo MBUYA adatawira mbati, “Kandikwatire mwanamphulu wamkazi, mbuzi ikazi, na bira wamamuna. Pyonsene pikhale na pyaka pitatu pyakubalwa. Ukwate pontho jiwa na nkhangaiwa.”

¹⁰Abramu adadza nazo nyama zonsene kuna Mulungu, mbazigwanda m'mapindi awiri mbaikha mwadidi mapindiwo mwakuyang'anisana, mbwenye mbalame hadazigwande tayu.

¹¹Tenepo malezi adaphama pana nyamapo, mbwenye Abramu adaathamangisa.

¹²Pikhathobila dzuwa, Abramu adagona chitulo chakufa nacho, pontho mdima ukulu wakugoswa udadza pana iye.

¹³Tenepo MBUYA adalonga kuna iye mbati, “Upidziwiletu kuti pidzukulu pyako pinakhala alendo m'dziko ya enechiro, pontho iwo anakhala mabitchu a anthu a dziko yeneyo mbavuyiwa pikulu pyaka madzana manayi.

¹⁴Mbwenye ndinatchunyusa dziko inafuna iwo kuiphatira basa ninga mabitchu. Kumamalisiro kwache iwo anabuluka m'dziko ya enechiroyo na mfuma izinji.

¹⁵Mbwenye iwe unakulupala mwadidi, mbufa mwadidi, pontho unaikhwa m'masiye mwadidi.

¹⁶Mifendu minayi ya anthu inati ikwane pidzukulu pyako mbipidzati kubwerera kuno, thangwi kudawa kwa Aamori kudzati fika pakundendeya tayu kuti atchunyuswe nako.”

¹⁷Pikhathobila dzuwa pontho pikhaswipa kunja, chikalango cha moto wakupuchira na nsakali ya moto idaoneka ikugwanda na pakati pa mapindi a nyama zile.

¹⁸Pansiku yeneyo MBUYA adachita chiverano na Abramu mbalonga mbati, “Ndinati ndipereke dzikoyi kuna pidzukulu pyako kutomera madire a Iguputo mpakana kumkulo ukulu wa Yufurate;

¹⁹kuphataniza pontho na dziko ya Akeni, ya Akenizi, ya Akadimoni,

²⁰ya Ahiti, ya Aperizi, ya Arefaimu,

²¹ya Aamori, ya Akanani, ya Agirigashi na ya Ayebusi.”