Read cisena Kutoma 16 Bible Online

Kutoma 16 - cisena bible

Kutoma 16

¹Sarai mkazi Abramu hakhadambalira mwana tayu. Mbwenye mkaziyu akhali na bitchu wachikazi wa ku Iguputo, dzinache Hagara.

²Natenepo iye adalonga kuna Abramu mbati, “MBUYA andikhondesa kukhala na ana. Ndoko kapite m'bonde na bitchu wangayi; mwinango anakwanisa kundibalira ana.” Abramu adatawirizana napyo pidalonga mkazache pile.

³Natenepo mkazi ule adapereka Hagara kuna Abramu kuti akhale mkazache wachibitchu. Penepi pidachitika m'dziko ya Kanani, pidakhala Abramu pyaka khumi mbali mwenemo.

⁴Abramu adapita m'bonde na Hagara, tenepo iye adakwata mimba. Pidadzindikira Hagara kuti ana mimba adatoma kugaya na kululupisa Sarai mbuyache.

⁵Tenepo Sarai adalonga kuna Abramu mbati, “Wachitisa ndiwe kuti ine ndibonere tenepa.[30] Ine ndidakupasa bitchu wanga kukhala mkazako wamng'ono, mbwenye pidadziwa iye kuti ana mimba, adatoma kundilulupisa. Natenepo MBUYA mbapitonge kuti wadidi mbani pakati pa iwe na ine.”

⁶Abramu adatawira mbati, “Hagarayu ndi bitchu wako, pontho ali pansi pa utongi wako. Chita pinafuna iwe kuna iye.” Natenepo Sarai adaphatisa basa Hagara mwavinga mwakuti iye adathawa.

⁷Mngelo wa MBUYA adagumanikana na Hagara pamphuno ya madzi m'thando yatchetcha panjira yakwendera ku Shuri,

⁸mbalonga mbati, “Iwe Hagara, bitchu wa Sarai, ukubulukira kupi? Apo ukwenda kupi?” Iye adatawira mbati, “Ndikuthawa mbuyanga wamkazi.”

⁹Mngelo wa MBUYA ule adalonga mbati, “Bwerera kuna mbuyako mbukamvere.”

¹⁰Mngelo wa MBUYA adathimiza kulonga mbati, “Ine ndinati ndikupase pidzukulu pizinji mwakuti anthu hanakwanisa kupilengesa tayu.

¹¹Iwe una mimba, tenepo unabala mwana wamamuna, mbumthula Ishimaele,[31] thangwi MBUYA ava kulira kwako.

¹²Mbwenye mwanako anakhala ninga bulu wam'tsanga; iye anakhala wakupokanyisana na munthu onsene, pontho munthu onsene anapokanyisana nayembo. Iye nkhabe khala pakati pa abale ache onsene tayu.”

¹³Hagara adapivunza yekha ene mbati, “Ayi ine ndaonadi Mulungu mbandikhala na moyo kuti ndilonge pya penepi?” Natenepo iye adamthula MBUYA kuti, “Mulungu ambaona.”

¹⁴Ndi thangwi yache anthu ambachemera mchera uli pakati pa Kadeshi na Beredi ule kuti Mchera wa Nyamoyo Ambandiona ule.

¹⁵Hagara adambalira Abramu mwana wamamuna mbamthula Ishimaele.

¹⁶Pandzidzi wenewu Abramu akhali pyaka makumasere na pitanthatu pyakubalwa.