Read cisena Kutoma 18 Bible Online

Kutoma 18 - cisena bible

Kutoma 18

¹MBUYA adaonekera Abrahamu chifupi na miti yakupambulika yamthundu ya ku Mamure. Pikhakhala Abrahamu pamsuwo wa khumbi yache pandzidzi wamasikati mwenemo dzuwa ikuswa miti,

²adakwiza maso ache mbaona amuna atatu aimira penepo. Sindzidzi pidaaona iye, adathamanga kagumanikana nawo. Iye adalamba

³mbalonga mbati, “Ambuya, ndaphata miyendo, lekani gwanda okhonda imira pamsuwo panga; ine ndili pano kukutumikirani.

⁴Nditawiriseni kuti ndikakwate madzi akutsuka nawo manyalo anu. Munakwanisa kupuma pano pansi pa mutiwu.

⁵Ndinati ndidze pontho na kudya; penepyo pinakupasani mphamvu zakufamba nazo paulendo wanu. Imwe mwandilemedza pakudza pamsuwo panga, tenepo ndilekeni ndikutumikireni.” Iwo adatawira mbati, “Ande, ife tatawira.”

⁶Abrahamu adapita mwakuchimbiza m'khumbi mule, mbakalonga kuna Sara mbati, “Chimbiza, ukwate m'kabudumo ufa wadidiletu mbuphike mkate.”

⁷Tenepo adathamanga kunkumbi wa pifuyo pyache mbakwata mwanamphulu wadidi, wakufewa pontho wakunenepa mbampereka kuna nyabasache, ule adampha na kumtereka mwakuchimbiza.

⁸Iye adakwata mafuta amkaka, mkaka na nyama idatereka iye ile mbapiikha pamaso pa amuna ale. Pikhadya iwo Abrahamu adaimira chifupi na iwo patchinde ya muti ule.

⁹Tenepo iwo adamvunza Abrahamu mbati, “Mkazako Sara ali kupi?” Iye adatawira mbati, “Ali m'khumbimo.”

¹⁰Mbodzi mwa amuna ale adalonga mbati, “Chaka chamangwana pandzidzi ninga uno[34] ndinati ndibwere pontho, tenepo mkazako Sara anabala mwana wamamuna.” Sara akhali pamsuwo wa khumbiyo kunduli kwa Abrahamu kuvesera pikhalongwapyo.

¹¹Abrahamu na Sara akhadakalamba pyakwanga, pontho Sara ndzidzi wache wakukhala na ana ukhadapiringana.

¹²Natenepo Sara adaseka mbalonga yekha ene mbati, “Ine ndamala kale, pontho mamunanga akalamba. Ayi chinchino ndinakwanisa kukomerwa napyo?”

¹³Tenepo MBUYA adavunza Abrahamu mbati, “Ndi thangwi yanji Sara akhaseka mbalonga kuti, ‘Ndinakwanisadi ine kubala mwana na kukalamba kwachita ineku?’

¹⁴Ayi pana chinthu chokhonda kwanisika na MBUYA? Ninga mwalonga ine kale kuti chaka chamangwana pandzidzi ninga uno ndinabwera pontho, tenepo mkazako anabala mwana wamamuna.”

¹⁵Na thangwi yakuti Sara akhali na mantha adakhonda mbalonga mbati, “Sidaseka tayu.” Mbwenye MBUYA adatawira mbati, “Ande, iwe udaseka.”

¹⁶Kubuluka penepo amuna ale adalamuka mbaenda kumbuto, kule kudakakwanisa iwo kuona Sodomu. Abrahamu adenda nawo pabodzi kuaperekera.

¹⁷Tenepo MBUYA adalonga yekha ene mbati, “Abrahamu sinambisira tayu pinafuna ine kuchita.

¹⁸Pidzukulu pyache pinakhala dzinza ikulu pontho yamphamvu. Kudzera muna iye ndinati nditsanzayise madzinza onsene.[35]

¹⁹Ine ndamsankhula towera apangize anache na pidzukulu pyache kuti atewere njira za MBUYA pakuchita pinthu pyakuthema pontho pyakulungama. Ngakhala iwo anachita tenepo, ine, MBUYA, ndinamchitira pyonsene pidadumbira ine kuna iye.”

²⁰Tenepo MBUYA adalonga kuna Abrahamu mbati, “Ine ndava kulira kwa anthu anango pya kuipa kwachita mizinda ya Sodomu na Gomora, pontho kuti kudawa kwawo nkhukulu pyakwanga.

²¹Ine ndathema kutchitha, towera ndikaone ngakhala iwo ngakuipa pyakwanga ninga munavera ine kuliraku. Penepo ndinapidziwa ngakhala ipyo mphyakuonadi, penu tayu.”

²²Tenepo amuna awiri adalamuka mbaenda ku Sodomu, mbwenye MBUYA adasalira na Abrahamu.

²³Tenepo Abrahamu adafedzera chifupi na MBUYA mbamvunza mbati, “Kadi imwe munafunadi kavunga anthu okhonda dawa kubodzi na anyakudawa?

²⁴Ngakhala mumzindamo muna anthu makumashanu okhonda dawa, ayi munavunga basi mzinda onsene? Ayi imwe nkhabe leka khonda kuuvunga tayu, towera kupulumusa anthu makumashanuwo?

²⁵Mphyakuona kuti nee munavunga anyakukhonda dawa kubodzi kwene na anyakudawa tayu. Penepyo nkhabe kwanisika! Imwe nkhabe chita tenepo. Imwe mbamudachita tenepo, anyakukhonda dawa mbamudaatchunyusira kubodzi na anyakudawa. Penepyo nkhabe kwanisika! Si pyakuthema tayu kuti mtongi wa anthu onsene achite pinthu pyakukhonda lungama.”

²⁶MBUYA adatawira mbati, “Ngakhala ndinagumana anthu makumashanu okhonda dawa mumzinda wa Sodomu ndinati ndiuleke khonda kuuvunga thangwi ya iwo.”

²⁷Abrahamu adalonga pontho mbati, “Ndaphata miyendo, ndilekerereni kuwanga kwanga mtima kuthimiza kulonga na imwe, Mbuya. Ine ndine munthu pyanga, pontho nkhabe utongi wakulonga namwe chinthu na chibodzi chene tayu.

²⁸Apo mwinango ngakhala kunakhala anthu makumanayi na ashanu okha okhonda dawa, ayi munakavunga mzinda onsene thangwi achelewerapo anthu ashanu basi?” MBUYA adatawira mbati, “Ine nkhabe kauvunga mzinda ngakhala ndinagumanamo anthu makumanayi na ashanu okhonda dawa.”

²⁹Abrahamu adalonga kachitatu mbati, “Mwinango anakakhalamo anthu makumanayi okha.” MBUYA adatawira mbati, “Angakhalamo makumanayi ine nkhabe kauvanga mzindawo tayu.”

³⁰Abrahamu adalonga mbati, “Ndaphata miyendo, Mbuya, lekani kundizhangalira, mbwenye ndathema kuti ndilonge pontho. Apo angakhalako makumatatu okha?” Iye adatawira mbati, “Ine nkhabe kauvunga tayu ngakhala ndinagumanako makumatatu.”

³¹Abrahamu adalonga mbati, “Mbuya, ndaphata miyendo, ndilekerereni kuwanga kwanga mtima kuthimiza kulonga namwe. Apo mwinango nkhagumana anthu makumawiri?” Iye adatawira mbati, “Ine nkhabe kauvunga tayu ngakhala ndinagumanako makumawiri.”

³²Abrahamu adalonga mbati, “Mbuya, ndaphata miyendo, lekani kundizhangalira. Ndinati ndilonge namwe kakumalisa. Ayi ngakhala munakagumanako anthu khumi okha?” Iye adatawira mbati, “Ine nkhabe kauvunga tayu ngakhala ndinagumanako anthu khumi.”

³³Pidamala iye kulonga na Abrahamu, MBUYA adenda pyache, Abrahamu adabwererambo kumusa kwache.