Read cisena Kutoma 2 Bible Online

Kutoma 2 - cisena bible

Kutoma 2

¹Natenepo kudzulu na pansi pano, pontho na pyonsene pili mwenemo pidamala sasanywa.

²Pansiku yachinomwe Mulungu adapuma, thangwi iye akhadamalisa basa yonsene ikhaphata iye.

³Tenepo iye adatsanzayisa nsiku yachinomwe mbaipambula kukhala nsiku yakupambulika, thangwi pansiku yeneyo iye adapuma podi akhadamalisa basa yonsene yakulenga.[5]

⁴Mwenemu ndiye mule mukhadalengwa kudzulu na pansi pano. Pidalenga MBUYA[6] Mulungu dziko yapansi na kudzulu,

⁵padziko yapansi pakhali nkhabe chakumera na chibodzi chene, thangwi ndzidzi wenewu MBUYA Mulungu hakhadadzati vumbisa mvula tayu, pontho pakhali nkhabe munthu wakulima;

⁶mbwenye madzi akhadza kubulukira pansi pa mataka mbawazira mataka.

⁷Tenepo MBUYA Mulungu adasasanya mamuna kubulukira kumataka a pansi pano[7] mbampumira muya wakupasa moyo mphuno mwache, tenepo munthuyo adakhala na moyo.

⁸Tenepo MBUYA Mulungu adalima munda mu Edeni kumabulukiro dzuwa, mwenemo adaikhamo munthu adasasanya iye ule.

⁹MBUYA Mulungu adachitisa kuti miti yonsene yakubalika imere mwenemo na kubala nsapo zadidi. Kati na kati ya munda ule, pakhali muti wakupasa moyo, pontho na muti wakupasa udziwisi wa chadidi na chakuipa.[8]

¹⁰Mkulo ukhafamba mu Edeni mbukapira m'mundamo. Kubulukira penepo mkulo ule udaswa mphapa mbukhala mikulo minayi.

¹¹Mkulo wakutoma dzinache ndi Pishoni; wenewu ndiye umbafamba kugwanda na m'dziko ya Havila, kule kumbagumanwa golidi.

¹²Golidi weneyu ndi golidi chadi-chadi, pontho kweneko kuna mafuta akununkhira okhonda oneka-oneka na miyala yakudula yakuthulwa onekisi.

¹³Mkulo wachiwiri dzinache ndi Gihoni; wenewu umbafamba kugwanda na m'dziko ya Kushi.

¹⁴Mkulo wachitatu dzinache ndi Tigrisi; wenewu umbafamba kumabulukiro dzuwa a dziko ya Asiria. Mkulo wachinayi ndi Yufurate.

¹⁵Tenepo MBUYA Mulungu adaikha munthu ule m'munda wa Edeni kuti aulime na kuuyang'anira.

¹⁶MBUYA Mulungu adampanga munthu ule mbati, “Iwe unakwanisa kudya nsapo za miti yonsene ili m'mundamu,

¹⁷mbwenye nsapo za muti wakupasa udziwisi wa chadidi na chakuipa leka kudya, thangwi nsiku inadya iwe nsapo za muti wenewu, unati ufe.”

¹⁸Tenepo MBUYA Mulungu adalonga mbati, “Si pyadidi tayu kuti mamuna akhale yekha. Ndinamsasanyira mwanzache wakuthemerana naye kuti amphedze.”

¹⁹Tenepo MBUYA Mulungu adakwata mataka mbasasanya nyama zonsene na mbalame zonsene mbadza nazo kuna munthu ule kuti aone madzina akhafuna iye kuzithula. Dzina yonsene idathula munthu ule, kuthula nyama zile, yeneyo ndiye dzinache.

²⁰Natenepo munthu ule adazithula madzina nyama zonsene na mbalame zonsene; mbwenye nkhabe ibodzi mwa izo ikhali mwanzache wakuthemerana naye kumphedza tayu.

²¹Tenepo MBUYA Mulungu adachitisa munthu ule kugona chitulo chakufa nacho. Iye mbali m'chitulo, Mulungu adabulusa mbavu ibodzi ya munthu ule, mbafunga pambutopo na mnofu.

²²MBUYA Mulungu adasasanya mkazi kubulukira kumbavu idabulusa iye pa mamuna mbadza naye kuna iye.

²³Tenepo mamuna ule adalonga mbati, “Pakumalisira pache ushu ndiye gogodo ya magogodo anga, pontho mnofu wa mnofu wanga; iye anachemerwa ‘Mkazi,’ thangwi adabulukira muna mamuna.”[9]

²⁴Na thangwi yeneyi mamuna anasiya babache na mache mbaphatikana na mkazache, tenepo awiriwo anakhala mbodzi.

²⁵Onsene awiriwa mamuna na mkazi akhakhala chipezi-pezi, kwache hakhachita manyadzo tayu.