Read cisena Kutoma 20 Bible Online

Kutoma 20 - cisena bible

Kutoma 20

¹Abrahamu adabuluka ku Mamure mbaenda kuthando yatchetcha ya Negebu mbakakhala pakati pa Kadeshi na Shuri. Ndzidzi pang'ono Abrahamu adakhala mumzinda wa Gerari.

²Kweneko iye adalonga kuti Sara mkazache akhali nyamaingache. Tenepo Mfumu Abimeleki wa ku Gerari adachemeresa Sara mbaenda naye kunyumba kwache.

³Mosiku unango Mulungu adaonekera Abimeleki kundoto mbalonga mbati, “Iwe unati ufe thangwi wakwata mkazi weneyu; mkaziyu ngwakusembwa kale.”

⁴Mbwenye Abimeleki hakhadadzati gona naye mkazi ule tayu. Tenepo iye adalonga mbati, “Mbuya, ine sidadawe tayu. Kadi imwe munandivunga pabodzi na anthu anga?

⁵Abrahamu yekha ene adalonga kuti mkaziyu akhali nyamaingache, mkazi adalongambo chibodzi-bodzi. Ine ndachita penepi na mtima wakusowa chakupokonyisa, pontho manjanga hadadawe tayu.”

⁶Mulungu adatawira kundoto mbati, “Ande, ndadziwa kuti iwe udachita penepyo na mtima wakusowa chakuupokanya, natenepo ine ndakukhondesa kuti uleke kundidawira. Ndi thangwi yache ine sidakutawirise tayu kukhuya mkaziyo.

⁷Mbwenye chinchino pano bwezera mkaziyu kuna mamunache. Iye ndi mprofeti, pontho iye anati akupempherere, towera uleke kufa. Mbwenye ungakhonda kwene kumbwezera kuna mamunache, ndikukupangadi kuti unati ufe, iwe na anthu ako onsene.”

⁸Bzobzo mangwana mwache Abimeleki adachemeresa mathubu ache onsene mbaapanga pikhadachitika pile. Tenepo pidapiva iwo, adagoswerwa pyakwanga.

⁹Kubuluka penepo Abimeleki adachemeresa Abrahamu mbamvunza mbati, “Chachita iwe kuna ifechi ninji? Chakudawira ine ninji kuti udzese nyatwa ikuluyi pana ine na pana ufumu wanga onsene. Nkhabe munthu na mbodzi ene athema kuchita chinthu ninga chachita iwechi.

¹⁰Thangwi yache ninji udachita penepi?”

¹¹Abrahamu adatawira mbati, “Ine ndikhanyerezera kuti kuno nkhabe na mbodzi ene wakugopambo Mulungu, pontho kuti iwo mbadandipha kuti akwate mkazangayi.

¹²Mbwenye khundu inangoyi mkaziyu ndi nyamaingangadi. Iye ndi mwana babanga, kwache tasiyana amama; tenepo ine ndidamsemba.

¹³Natenepo pidandigwinya Mulungu kubuluka kunyumba ya babanga kwenda madziko a enechiro ndidampanga kuti, ‘Iwe unakwanisa kuonesa kukhulupirika kwako kuna ine konsene kunaenda ife pakulonga kuti ine ndine nkhoswe yako.’ ”

¹⁴Tenepo Abimeleki adabwezera Sara ule kuna Abrahamu, pontho na ndzidzi onthowo Abimeleki adapereka mabira, ng'ombe na mabitchu achimuna na achikazi ene kuna Abrahamu.

¹⁵Abimeleki adalonga kuna Abrahamu mbati, “Dziko yanga yonsene ukuiona, tenepo khala ponsene panafuna iwepo.”

¹⁶Kuna Sara adalonga mbati, “Ndikupereka kuna nkhoswe yako kobiri chikwi chibodzi zasiliva kutsikimizira kuna anthu onsene ana iwewa kuti iwe hudadawe tayu; munthu onsene anadziwa kuti iwe hudachite chinthu chakudawika tayu.”

¹⁷Tenepo Abrahamu adapemphera kuna Mulungu, Mulungu adawangisambo Abimeleki, mkazache na mabitchu ache achikazi kuti akwanise kubala pontho ana,

¹⁸thangwi MBUYA akhadafunga nthumbo ya akazi onsene a m'nyumba ya Abimeleki, thangwi ya pikhadachitika kuna Sara mkazi Abrahamu.