Read cisena Kutoma 21 Bible Online

Kutoma 21 - cisena bible

Kutoma 21

¹MBUYA adamtsanzayisa Sara ninga mukhadadumbira iye.

²Tenepo adakwata mimba mbabalira Abrahamu mwana wamamuna uku akalamba kale. Mwanayo adabalwa pandzidzi onthowo ukhadalonga Mulungu kuti anabalwa.

³Abrahamu mwanayo adamthula Isake.

⁴Pikhali Isake nsiku zisere zakubalwa, Abrahamu adamgwanda nsonga yachimuna ninga mukhadampangira Mulungu.

⁵Mukhabalwa Isake Abrahamu akhali pyaka dzana pyakubalwa.

⁶Sara adalonga mbati, “Mulungu andichitisa kukomerwa na kusekera.[40] Onsene anavawo anasekera nane pabodzi.”

⁷Tenepo iye adathimiza kulonga mbati, “Mbani mbadakwanisa kulonga kuna Abrahamu kuti Sara anayamwisa mwana? Kwache ndambalira mwana wamamuna uku akalamba kale.”

⁸Mwana ule adakula mbamulekesa bele. Tenepo pansiku ikhalekeswa Isake kuyamwa Abrahamu adasasanya phwando ikulu.

⁹Mbwenye Sara adaona mwana wamamuna wa Hagara, munthu wa ku Iguputo adabalira Abrahamu mwana ule, kuti akhasingirira[41] Isake,[42]

¹⁰natenepo iye adalonga kuna Abrahamu mbati, “Mbuluse bitchu wa mkaziyo na mwanache ene, thangwi mwana bitchu hadatheme kukwata khundu pamfumako inafuna iwe kusiyira mwananga Isake tayu.”

¹¹Penepi pidamsanya mtima Abrahamu pyakwanga thangwi Ishimaele akhalimbo mwanache.

¹²Mbwenye Mulungu adalonga kuna Abrahamu mbati, “Leka swipa mtima na mwana, pontho na bitchu wamkaziyo. Chita pyonsene pinakupanga Sara, thangwi kudzera muna Isake iwe unakhala na pidzukulu ninga mudadumbira ine kale mule.

¹³Ndinapereka pontho ana azinji kuna mwana wa bitchuyi, towera iwo akhale dzinza ikulu. Iye ndi mwanako pontho.”

¹⁴Bzobzo mangwana mwache Abrahamu adapereka phoso na dudu ya madzi kuna Hagara. Iye adathukula mwanayo mbamuikha kunduli kwa Hagara mbaagwinya. Mkazi ule adabuluka mbatsalakatika m'thando yatchetcha ya Beeresheba.

¹⁵Pidamala madzi m'dudu mule, iye adamuleka pyache mwana pansi pa thenthere,

¹⁶mbakakhala pansi patsogolo mathanyo dzana ibodzi. Iye adalonga yekha ene mbati, “Ine nkhabe kwanisa kuona mwananga akufa.” Uku ali khale penepo mkaziyo[43] adatoma kulira.

¹⁷Mulungu adava kulira kwa mwana ule. Tenepo kubulukira kudzulu mngelo wa Mulungu adalonga mbati, “Hagara chinaswipa na iwe mtima ninji? Leka gopa! Mulungu ava kulira kwa mwanayo padamgonesa iwe pale.

¹⁸Lamuka ukamthukule kummatamisa. Ine ndinasasanya dzinza ikulu kubulukira muna pidzukulu pyache.”

¹⁹Tenepo Mulungu adafungula maso a Hagara mbaona mchera. Iye adenda penepo mbadzaza dudu yache mbakaperekambo anango kuna mwanache.

²⁰Mulungu akhali na mwanayo pikhakula iye. Iye adakhala m'thando yatchetcha ya Parani mbasanduka nyaluso pakupha nyama.

²¹Mache adamgumanira mkazi wa ku Iguputo.

²²Pandzidzi wenewu Abimeleki na Fikolo, mkadamu wa anyankhondo ache, adenda kuna Abrahamu mbalonga mbati, “Pyonsene pinaphata imwe Mulungu ali namwe.

²³Tenepo chinchino dumbirani pamaso pa Mulungu kuti ine, ananga na pidzukulu pyanga nee munatinyengeza tayu. Pontho onesani udidi kuna ine na kuna dziko inakhala imwe ninga mlendoyi ninga udidi udakuonesa ine.”

²⁴Abrahamu adalonga mbati, “Ndinadumbira.”

²⁵Abrahamu adadungunya kuna Abimeleki pya mchera ukhadakwata anyabasa a Abimeleki ule.

²⁶Mbwenye Abimeleki adalonga mbati, “Munthu adachita penepi sinamdziwa tayu. Iwe hudandipange tayu. Ine ndikupiva kwene lero.”

²⁷Tenepo Abrahamu adapereka mabira na ng'ombe kuna Abimeleki natenepo anthu awiriwa adachita chiverano.

²⁸Abrahamu adapambula anabira achikazi anomwe kubulukira pa mkumbi pache.

²⁹Abimeleki adamvunza mbati, “Unachitiranji tenepo?”

³⁰Abrahamu adatawira mbati, “Tambira anabira anomwewa. Ungachita tenepo, ndiye kuti watawira kuti adakumba m'cherawu ndine pano.”

³¹Natenepo mbutoyo idachemerwa Beeresheba,[44] thangwi kudumbirisana kwa anthu awiri ale kudachitikira penepo.

³²Pidamala iwo chita chiverano chawo pa Beeresheba, Abimeleki na Fikolo adabwerera ku dziko ya Afilisti.

³³Tenepo Abrahamu adabzala muti wabwemba mu Beeresheba mbapembedza MBUYA Mulungu Wakukhala na kukhala.

³⁴Abrahamu adakhala m'dziko ya Afilisti ndzidzi ukulu ene.