Read cisena Kutoma 23 Bible Online

Kutoma 23 - cisena bible

Kutoma 23

¹Sara adakhala na moyo pyaka dzana na makumawiri na pinomwe.

²Iye adafera ku Kiriati-Ariba (kweneku nkhu Hebroni) m'dziko ya Kanani, kweneko Abrahamu adamusintili mkazache ule.

³Tenepo Abrahamu adalamuka pambuto pakhadagona mtembo wa mkazache pale mbaenda kuna anthu akuthulwa Ahiti mbalonga kuna iwo mbati,

⁴“Ine ndine mlendo pakati panu; ndigulisirenimbo mbuto kuti ikhale masiye, towera ndiikhemo mkazanga.”

⁵Iwo adatawira mbati,

⁶“Ngativeserenimbo ife, Mbuyathu, imwe ndimwe mfumu wamphamvu pakati pathupa; kamuikheni mkazanu m'masiye adidiletu ana ifewa. Nkhabe mbodzi wa ife anakhonda nawo masiye kuti imwe muikhe mkazanu.”

⁷Tenepo Abrahamu adalamba pamaso pawo

⁸mbalonga mbati, “Ngakhala imwe munapifuna kunditawirisa kuti ndiikhe mkazanga kuno, ndipempherenimbo Eferoni, mwana Zohari kuti

⁹andigulise nkhwimbache ya Makipela ile ili chifupi na nkhomole ya mundache. Pemphani kuti ndigule naye pa kontache chadi-chadi pano pamaso pa imwe monsene, towera mbuto yeneyi ikhale yanga ene yakuikhiramo anyakufa.”

¹⁰Iye ene Eferoni, Mhiti, akhakhala pansi pabodzi na Ahiti anzache kumbuto yakugumanyikira pamsuwo wa mzinda. Tenepo iye adamtawira Abrahamu pamaso pa onsenewo

¹¹mbati, “Nkhabe, mbuyanga, ndiveserenimbo; ine ndikukupasani munda onsene na nkhwimba ene ili mwenemoyo. Ine ndikukupasani pyonsene pene pamaso pa anthu anga. Kaikheni mkazanu.”

¹²Abrahamu adalamba pontho pamaso pa anthu ale

¹³mbalonga mbati, “Ndaphata miyendo, ngandiveserenimbo kuno. Ine ndinati ndiupagali, towera ndikaikhe mkazanga kweneko.”

¹⁴Eferoni adatawira mbati,

¹⁵“Mbuyanga, mbuto yathema kupagalwi kobiri zasiliva madzana manayi basi. Ayi penepyo ninji pakati pathu? Ndokoni mukaikhe mkazanu.”

¹⁶Abrahamu adatawirizana napyo mbamulengesera kobiri idalonga Eferoni pamaso pa Ahiti anzache onsene: kobiri zasiliva madzana manayi malingana na konta ikhaphatiswa basa na anyamalonda.

¹⁷Natenepo munda wa Eferoni mu Makipela chifupi na Mamure, munda pabodzi pene na nkhwimba ikhali mwenemoyo, pontho na miti yonsene m'madire a mundawo pidaperekwa

¹⁸kuna Abrahamu kukhala pyache pene pamaso pa Ahiti onsene akhadadza kumsuwo wa mzinda ule.

¹⁹Pidamala Penepyo Abrahamu adamuikha Sara mkazache m'nkhwimba m'munda wa Makipela chifupi na Mamure (kweneku nkhu Hebroni) m'dziko ya Kanani.

²⁰Natenepo munda pabodzi pene na nkhwimba pikhali pya Ahiti pile pidasanduka mbuto ya Abrahamu yakuikhamo anyakufa.