Read cisena Kutoma 25 Bible Online

Kutoma 25 - cisena bible

Kutoma 25

¹Abrahamu adasemba mkazi unango dzinache Ketura.

²Iye adambalira Zimirani, Yokishani, Medani, Midiani, Ishibaki na Shua.

³Yokishani adabala Sheba na Dedani, pontho pidzukulu pya Dedani pikhali Aashuri, Aletushi na Aleumi.

⁴Ana achimuna a Midiani akhali Efa, Eferi, Hanoki, Abida na Elida. Onsenewa akhali pidzukulu pya Ketura.

⁵Abrahamu adasiyira Isake pyonsene pikhali na iye.

⁶Mbwenye pikhali iye na moyo adapereka mitukwa kuna ana achimuna akhadabala iye na akazi anango ale. Kubuluka penepo adaagwinya ana enewa kuti akakhale kudziko yakumabulukiro dzuwa kutali na Isake mwanache.

⁷Abrahamu adakulupala pyakwanga mbafa ana pyaka dzana na makumanomwe na pishanu.

⁹Anache, Isake na Ishimaele, adamuikha m'nkhwimba ya Makipela m'munda wa Eferoni mwana Zohari, Mhiti, ule akhali kumabulukiro dzuwa kwa Mamure.

¹⁰Wenewo ukhali munda ule udagula Abrahamu kubulukira kuna Ahiti; onsene Abrahamu na mkazache ene Sara adaikhwa penepo.

¹¹Pidafa Abrahamu, Mulungu adatsanzayisa Isake, ule akhakhala chifupi na “Mchera wa Nyamoyo, Ambandiona ule.”

¹²Ishimaele, mwana Hagara munthu wa ku Iguputo, ule akhali bitchu wachikazi wa Sara, adabalira Abrahamu mwana ule

¹³akhalimbo na ana. Anawo mbawa kwache aikhwa panyandandanda kutomera wautombo mpakana chimalisira bele: Nebaioti, Kedara, Adibeele, Mibisamu,

¹⁴Mishima, Duma, Masa,

¹⁵Hadadi, Tema, Yeturi, Nafishi na Kedema.

¹⁶Iwo akhali makolo a madzinza khumi na awiri, natenepo midzi na misasa ikhakhala iwo idachemerwa na madzinawo.

¹⁷Ishimaele akhali pyaka dzana na makumatatu na pinomwe pikhafa iye.

¹⁸Pidzukulu pya Ishimaele pidakhala pambuto ya pakati pa Havila na Shuri kumabulukiro dzuwa a Iguputo kunjira yakwendera kudziko ya Asiria. Iwo adakhala mbuto zakusiyana na pidzukulu pinango pya Abrahamu.

¹⁹Ishi ndi mbiri ya Isake mwana Abrahamu.

²⁰Isake akhali pyaka makumanayi pyakubalwa pidasemba iye Rebeka mwana wamkazi wa Betuele (Muaramu wakubulukira ku Mesopotamia), pontho nyamaingache Labani.

²¹Na thangwi yakuti Rebeka akhali wakusowa ana. Isake adampempherera kuna MBUYA. MBUYA adava kupempha kwache, natenepo Rebeka adakwata mimba.

²²Iye akhadikhira kuti anabala mapasa. Anawo mbadzati balwa adatoma kuthimbana okhokha m'mimba mwache mwakuti Rebekayo adalonga mbati, “Thangwi yache ninji pinthu ninga penepi pikundichitikira?” Natenepo iye adenda kavunza nzeru kuna MBUYA kuti adziwe pikhamchitikirapyo.

²³MBUYA adamtawira mbati, “Madzinza mawiri ali m'mimba mwakomo. Unabala magulu mawiri a anthu ale anati agawikane. Unango anakhala wamphamvu pyakwanga kupiringana mwanzacheyo. Mkulu anatumikira mwana.”

²⁴Nsiku zache zakubala zidakwana, tenepo adabala ana achimuna amapasa awiri.

²⁵Wautombo akhali wakufirira, pontho khandache ikhali ninga nguwo yakusasanywa na ubweya, natenepo iye adathulwa Esau.[48]

²⁶Wachiwiri kubalwayi adabalwa uku dzanjache yaphata chitende cha Esau, natenepo mwanayo adathulwa Yakobo.[49] Pikhabalwa ana enewa Isake akhali pyaka makumatanthatu pyakubalwa.

²⁷Aphale ale adakula, natenepo Esau adasanduka nyaluso pakukhulisa, munthu wakukhala na moyo wakufuna kukhala m'tsanga. Mbwenye Yakobo akhali munthu wakumatama, pontho wakukhala pamsuwo.

²⁸Isake akhamfuna Esau, thangwi akhakomerwa na kudya nyama zikhakhulisa Esau zile, mbwenye Rebeka akhamfuna Yakobo.

²⁹Nsiku inango pikhaphika Yakobo nyimo zache, Esau adapita m'nyumba kubulukira kakhulisa. Iye akhadaphatiswa na njala

³⁰mbalonga kuna Yakobo mbati, “Ine ndaphatiswa na njala, ngandipasembo pang'ono chakufiracho.” (Yeneyi ndi thangwi yache iye adathulwa Edomu.)[50]

³¹Yakobo adatawira mbati, “Ndinati ndikupase male ungandigulisa chidzo cha ukulu wako.”

³²Esau adatawira mbati, “Ande, ndatawira! Podi ine ndikufuna kufa na njala; apo chidzo cha ukulumbo chinandiphedzanji?”

³³Yakobo adatawira mbati, “Dumbira kuti unandigulisadi chidzo cha ukulu wako.” Esau adadumbira mbagulisa chidzo cha ukulu wache kuna Yakobo.

³⁴Tenepo Yakobo adapereka kuna Esau mkate na pimsuzi pya nyimo zile. Iye adadya mbaenda pyache. Na njira yeneyi Esau adalulupisa chidzo cha ukulu wache.