Read cisena Kutoma 26 Bible Online

Kutoma 26 - cisena bible

Kutoma 26

¹M'dzikomo mukhadadza pontho njala kupambula njala yakutoma ikhali pandzidzi wa Abrahamu ile. Tenepo Isake adenda kuna Abimeleki, mfumu wa Afilisti, ku Gerari.

²MBUYA akhadaonekera kuna Isake, pontho akhadampanga mbati, “Leka kwenda ku Iguputo; mbwenye khala m'dziko muno mudakupanga ine kuti ukhalemo.

³Khala kuno. Ine ndinati ndikhale nawe mbandikutsanzayisa. Dziko yonseneyi ndinati ndiipereke kuna iwe na kuna pidzukulu pyako. Ine ndinati ndichite pinthu pidadumbira ine kupichita kuna babako Abrahamu.

⁴Ine ndinakupasa pidzukulu pizinji ninga nyenyezi za kuthambo, pontho ndinapereka kuna iwo dziko yonseneyi. Madzinza onsene anatsanzayiswa kudzera muna pidzukulu pyako.

⁵Ine ndinakutsanzayisa, thangwi Abrahamu adandivera mbakoya mwambo wanga na matongero anga onsene.”

⁶Natenepo Isake adakhala ku Gerari.

⁷Pidavunza amuna a kweneko pya mkazache, iye adalonga kuti akhali nyamaingache. Iye hadalonge kuti Rebeka akhali mkazache tayu thangwi akhagopa kuphiwa na amuna a kweneko, towera akwate Rebeka, ule akhali wakubalika pyakwanga.

⁸Pidakhala Isake kweneko ndzidzi ukulu ene, Mfumu Abimeleki wa Afilisti adasuzumira na pazhanera mbaona Isake na Rebeka akugwa maya.

⁹Natenepo Abimeleki adachemeresa Isake mbalonga mbati, “Weneyu ndi mkazakodi! Apo thangwi yache ninji udalonga kuti ndi nyamaingako?” Isake adatawira mbati, “Thangwi ine ndidanyerezera kuti ndinaphiwa ndingalonga kuti ndi mkazanga.”

¹⁰Abimeleki adalonga mbati, “Apo chachita iwe kuna ifechi ninji? Mwinango mbodzi wa amunangawa mbadagona naye mkazako, tenepo iwe mbudatichitisa kukhala anthu akudawa.”

¹¹Abimeleki adacheuza anthu onsene mbati, “Munthu onsene anavuya mamunayi penu mkaziyu anaphiwa.”

¹²Isake adabzala m'dziko mwenemo, tenepo chaka chenecho adavuna pizinji pyakwanga kadzana kupiringana pidabzala iye pile, thangwi MBUYA adamtsanzayisa.

¹³Isake adathimiza kukhala munthu wakupikwanisa mwakuti adasanduka munthu wakufuma pyakwanga.

¹⁴Na thangwi yakuti akhali na mikumbi izinji ya mabira na ng'ombe, pontho anyabasa azinji, Afilisti akhadaipirwa naye.

¹⁵Natenepo iwo adafikhira michera yonsene ikhadakumbwa na anyabasa a Abrahamu mbali moyo.

¹⁶Tenepo Abimeleki adalonga kuna Isake mbati, “Buluka m'dziko mwathu muno. Iwe wasanduka munthu wamphamvu pyakwanga kupiringana ife.”

¹⁷Natenepo Isake adabuluka mbakamanga misasache paphedi ya Gerari, kule kudakhala iye ndzidzi ene.

¹⁸Iye adakumba pontho michera ikhadakumbwa pandzidzi wa Abrahamu, ikhadafikhirwa na Afilisti pidafa Abrahamu ile. Isake adaithula michera ile madzina onthowo akhadathula babache.

¹⁹Nyabasa wa Isake adakumba mchera paphedipo mbagumana madzi.

²⁰Pakhali mapoko-poko pakati pa amakabuswa a ku Gerari na amakabuswa a Isake mbalonga mbati, “Mcherawu ngwathu.” Natenepo Isake adauthula mcherawo, “Mapoko-poko.”

²¹Anyabasa a Isake adakumba pontho mchera unango, tenepo pakhali pontho mapoko-poko a pya mchera wenewu. Natenepo Isake adauthula mcherawo “Malwa.”

²²Iye adafendedzera kutali na penepo mbakumba mchera unango. Pamchera wenewu pakhali nkhabe mapoko-poko. Natenepo Isake adauthula “Ufulu.” Iye adalonga mbati, “Chinchino MBUYA atipasa ufulu wakukhala m'dziko muno. Tenepo tinati tikhale anthu akupikwanisa.”

²³Kubuluka kweneko Isake adafuluka mbaenda ku Beeresheba.

²⁴Mosiku wenewo MBUYA adamuonekera mbalonga mbati, “Ine ndine Mulungu wa babako Abrahamu. Leka gopa; ine ndili nawe. Ndinati ndikutsanzayise, pontho ndinakupasa pidzukulu pizinji thangwi ya kudumbira kudachita ine kuna nyabasanga Abrahamu.”

²⁵Isake adamanga guwa yakuperekerapo nsembe mbapembedza MBUYA. Tenepo adamanga msasache penepo, anyabasachembo adakumba mchera unango.

²⁶Abimeleki na Ahuzati, phungu wache, pontho na Fikolo, mkadamu wa anyankhondo adadza kubulukira ku Gerari kaona Isake.

²⁷Natenepo Isake adavunza mbati, “Lero chachitika ninji kuti mudze dzandiona, podi imwe mudaipirwa nane mbamundithamangisa m'dziko mwanu?”

²⁸Iwo adatawira mbati, “Chinchino ife tadziwa kuti MBUYA ali nawe, tenepo tapinyerezera kuti pakhale kudumbirisana pakati pa iwe na ife. Tinafuna iwepo udumbire

²⁹kuti hunatikuwaza tayu ninga mudachitira ife kuna iwe kukhonda kukukuwaza. Ife tikhali anthu adidi kuna iwe, pontho tidakubulusa mwa mtendere. Tenepo chinchino mphyakuveka kuti MBUYA akutsanzayisa.”

³⁰Isake adaasasanyira phwando, tenepo iwo adadya na kumwa.

³¹Bzobzo mangwana mwache iwo adadumbira kuna unango na mwanzache. Isake adagonekana nawo, tenepo iwo adenda na mtendere.

³²Pansiku yeneyo anyabasa a Isake adadza mbampanga pya mchera ukhadakumba iwo. Iwo adalonga mbati, “Taagumana madzi.”

³³Iye adauthula mcherawo “Kudumbirisana.” Penepa ndiye padabulukira dzina ya mzinda wa Beeresheba.[51]

³⁴Pikhali Esau pyaka makumanayi pyakubalwa, adasemba atsikana awiri a Chihiti. Madzinawo mbawa: Yuditi, mwana wamkazi wa Beeri; na Basemati, mwana wamkazi wa Eloni.

³⁵Akazi enewa adakhala pyakutsukwalisa kuna Isake na Rebeka.