Read cisena Kutoma 27 Bible Online

Kutoma 27 - cisena bible

Kutoma 27

¹Isake adakalamba pyakwanga mwakuti adasanduka zimola. Iye adachemera mwanache wautombo Esau mbampanga mbati, “Mwananga.” Iye adatawira mbati, “Baba.”

²Isake adalonga mbati, “Ine ndakalamba, pontho nsiku yakufa kwanga nkhabe kudziwikabi.

³Natenepo chinchino pano kwata utako na matswimo ako uende m'tsanga kundipherambo nyama.

⁴Tenepo uiphike mwadidi ninga mumbafunira ine mbudza nayo kuna ine. Ndingamala kudya ndinakutsanzayisa kwakumalisira ndidzati kufa.”

⁵Pikhalonga Isake kupanga Esau, Rebeka akhavesera. Natenepo pidabuluka Esau kwenda kakhulisa,

⁶iye adalonga kuna Yakobo mbati, “Ndalila kuva kwene babako akumpanga Esau kuti,

⁷‘Kandikwatire nyama undiphikire. Ndingamala kudya, ndinakutsanzayisa pamaso pa MBUYA ndidzati kufa.’ ”

⁸Rebeka adathimiza kulonga mbati, “Natenepo mwananga, uvesere, pontho uchite pinalonga inepi.

⁹Uende kumkumbi mbukakwateko ana mbuzi akunenepa awiri, towera ndiaphike, pontho kuti ndiasasanye pyakudya pyadidi ninga mumbafunira babako.

¹⁰Tenepo iwe ukukwate kwenda nako kuna babako, iyembo anakutsanzayisa mbadzati kufa.”

¹¹Mbwenye Yakobo adalonga kuna mache mbati, “Imwe mukupidziwa kuti Esau ndi munthu waubweya m'manungo mwache, mbwenye ine manungo anga ngakumyalala.

¹²Mwinango baba anandimphamphasa mbandigumana kuti ndikumnyengeza; na njira yeneyi ndinapipasa ndekha ene dzedze m'mbuto mwa kutsanzayiswa.”

¹³Mache adamtawira mbati, “Mwananga, leka dzedze yonsene igwere pyanga ine pano; mbwenye iwe chita kwene ninga mwakupangira ine, pontho ndoko kandikwatire mbuzizo.”

¹⁴Natenepo iye adenda kazikwata mbuzizo mbadza nazo kuna mache. Machemboyo adaziphika mwadidi ninga mumbafunira babache.

¹⁵Tenepo Rebeka adakwata nguwo zadidiletu za Esau, zile zidakoya Rebeka m'nyumba, mbazivazika Yakobo.

¹⁶Iye adakwata nthembe za mbuzi mbaziikha m'mikono mwa Yakobo na khundu inango yakumyalala ya khosi yache.

¹⁷Mache Yakobo ule adakwata nyama yakuphikwa mwadidi ile pabodzi pene na mkate ukhadaphika iye mbapipereka kuna Yakobo.

¹⁸Tenepo Yakobo adenda kuna babache mbalonga mbati, “Baba.” Babacheyo adatawira mbati, “Ndawo! Mwanangache ngupi?”

¹⁹Yakobo adatawira mbati, “Ndine mwananu wautombo Esau; ndachita ninga mudandipangira imwe mule. Ndaphata miyendo, khalani na matako mudye nyama yakudzeserani ineyi, towera mukwanise kunditsanzayisa.”

²⁰Isake adatawira mbati, “Mwananga, waigumana tani mwakuchimbiza tenepa?” Yakobo adatawira mbati, “MBUYA Mulungu wanu ndiye andiphedza kuti ndiigumane.”

²¹Isake adalonga kuna Yakobo mbati, “Fedza chifupi na ine towera ndikwanise kukumphamphasa. Kadi ndiwedi mwananga Esau?”

²²Yakobo adafedzera chifupi na babache, ule adamphamphasa mbalonga mbati, “Falakoyi ikuveka ninga ya Yakobo, mbwenye mikonoyi ikuveka ninga ya Esau.”

²³Iye hadamdzindikire Yakobo tayu, thangwi mikono yache ikhali ubweya ninga ya Esau. Iye akhali chifupi kuti amtsanzayise,

²⁴mbwenye adamvunza pontho mbati, “Kadi ndiwedi mwananga, Esau?” Yakobo adatawira mbati, “Ndine ene pano.”

²⁵Isake adalonga mbati, “Dza nayo kuno nyamayo. Ndingamala kudya ndinakutsanzayisa.” Yakobo adadza naye pamaso pa babache mbadza pontho na vinyu pang'ono wakumwera.

²⁶Natenepo babache adalonga kuna iye mbati, “Fedza chifupi mwananga, pontho undimpsompsone.”

²⁷Pikhadza iye chifupi kuti ampsompsone, Isake adava khwema ya nguwo zache, natenepo adamtsanzayisa. Iye adalonga mbati, “Khwema yadidi ya mwananga yakhala ninga kununkhira kwa munda udatsanzayiswa na MBUYA ule.

²⁸Mulungu akupase bume kubulukira kudzulu, pontho achitise mindako kukhala na mataka akubalisa pinthu. Iye akupase mapira na vinyu wakuinjipa.

²⁹Madzinza akhale anyabasako, pontho anthu alambe pamaso pako. Iwe utonge abale ako onsene, pontho pidzukulu pya mako pilambe pamaso pako. Anyakukutembererawo mbatembererwembo, pontho anyakukutsanzayisawo mbatsanzayiswembo.”

³⁰Isake adamalisa kumtsanzayisa Yakobo, tenepo sindzidzi Yakobo nkhubuluka, Esau nanache adadza kubulukira kakhulisa.

³¹Iye adaphikambo pyakudya pyadidi mbaenda napyo kuna babache. Iye adalonga mbati, “Baba, ndaphata miyendo, khalani na matako mudye nyama yakudzeserani ineyi, towera munditsanzayise.”

³²Isake adavunza mbati, “Ndiwe ani iwe?” Iye adatawira mbati, “Mwananu wautombo Esau.”

³³Isake adatoma kutetemera pyakwanga na mantha mbavunza mbati, “Apo mbani adapha nyama mbadza nayo kuna ine? Ine ndaidya kwene chinchino pano mbudzati bwera. Ine ndamtsanzayisa kwakumalisira. Natenepo mtsanzayisowo ngwache kwenda na kwenda.”

³⁴Pidava Esau penepi, adalira mwakugaluza fala, pontho mwakupha mtima mbalonga mbati, “Nditsanzayisenimbo ine, baba!”

³⁵Isake adatawira mbati, “Mphwako adadza mbandinyengeza. Tenepo iye akwata mtsanzayiso wako onsene.”

³⁶Esau adalonga mbati, “Keneka nkhachiwiri kundichenjerera. Si chachilendo tayu kuti dzinache ndi Yakobo.[52] Iye adandikwatira chidzo cha ukulu wanga, lero pontho andikwatira mtsanzayiso wanga.” Tenepo iye adavunza mbati, “Ayi mudandikoyerambo tayu mtsanzayiso na pang'ono pene?”

³⁷Isake adatawira mbati, “Ine ndamchitisa kukhala mbuyako, pontho kuti abale ache onsene akhale anyabasache. Ndampasa vinyu na mapira. Natenepo nkhabe pontho chinthu chakuti ndinakwanisa kukuchitira tayu, mwananga!”

³⁸Esau adalonga kuna babache mbati, “Baba, mtsanzayiso una imwe ngubodzi ene basi? Nditsanzayisenimbo ine, baba!” Tenepo Esau adalira pikulu pene.

³⁹Isake adamtawira mbati, “Mbuto inafuna iwe kukhala inakhala nkhabe mataka akubalisa pinthu. Bume yakubulukira kudzulu nkhabe kugwa m'minda mwako tayu.

⁴⁰Iwe moyo wako onsene unaphatisa basa talasada yakumenyera nkhondo, pontho unakhala bitchu wa mphwako. Mbwenye ungampandukira[53] unabuluka pansi pa utongi wache.”

⁴¹Esau adazonda Yakobo thangwi babache akhadamtsanzayisa Yakobo. Iye adanyerezera mumtima mwache kuti, “Ndzidzi wakusintili kufa kwa baba uli chifupi, pingamala penepyo ndinampha Yakobo.”

⁴²Mbwenye pidava Rebeka pya pinthu pikhanyerezera Esau pile, adachemeresa Yakobo mbampanga mbati, “Vesera kuno, mbaleako Esau ana manyerezero akufuna kukupha kuti abwezere.

⁴³Natenepo, mwananga, chita pinakupanga inepi. Chinchino pano thawa uende kuna nkhoswe yanga, Labani, kumzinda wa Harani.

⁴⁴Kakhale naye kweneko nsiku zingasi mpakana mtima wa mbaleako ukhuludzike,

⁴⁵pontho aduwalire pinthu pidamchitira iwe. Tenepo ndinatuma munthu kukukwata kubwerera nawe kuno. Nditayirenji ananga onsene awiri ndzidzi ubodzi?”

⁴⁶Rebeka adalonga kuna Isake mbati, “Ndikusanyika, pontho ndatopa nawo akazi a Chihiti a Esau. Ngakhala Yakobo anasembambo mbodzi wa atsikana a Chihitiwa, mphyadidi kuti ine ndife pyanga.”