Read cisena Kutoma 28 Bible Online

Kutoma 28 - cisena bible

Kutoma 28

¹Isake adachemera Yakobo. Pidamala iye kumpasa mwenyikiro adampanga mbati, “Leka semba mtsikana wa mu Kanani muno.

²M'mbuto mwache ndoko kudziko ya Mesopotamia, kumusa kwa mbuyako wamamuna Betuele, adabala mako ule. Kweneko kasembe mtsikana mbodzi wa ana achikazi a Labani, nkhoswe Yache mako.

³Mulungu Wamphamvu zonsene mbatsanzayise banjako, pontho mbakupase ana azinji, towera ukhale baba wa madzinza azinji.

⁴Iye akutsanzayise pabodzi na pidzukulu pyako pene ninga mudatsanzayisira iye Abrahamu, towera mupokosere dziko ikhakhala iwe ninga mlendoyi, ile idapereka Mulungu kuna Abrahamu.”

⁵Isake adagwinya Yakobo ku Mesopotamia, kuna Labani ule akhali mwana wamamuna wa Betuele wa Chiaramu, pontho nkhoswe yache Rebeka, mache Yakobo na Esau.

⁶Esau adapidziwa kuti Isake adamtsanzayisa Yakobo, pontho kuti amgwinya ku Mesopotamia kasemba mkazi. Iye adapidziwa pontho kuti pidatsanzayiswa iye na Isake, Isake onthoyo adampanga kuti aleke semba mkazi wa mu Kanani.

⁷Iye adagumana kuti Yakobo akhadavera babache na mache pontho kuti akhadenda ku Mesopotamia.

⁸Esau adadzindikira kuti babache hadakomerwe na akazi a mu Kanani tayu.

⁹Natenepo iye adenda kuna Ishimaele, mwana Abrahamu, mbakasemba mwanache wamkazi dzinache Mahalati, nyamaingache Nebaioti, kuthimizira pa akazache akale ale.

¹⁰Yakobo adabuluka ku Beeresheba mbaenda ku Harani.

¹¹Pidafika iye pambuto inango[54] iye adaimira kuti agone penepo, thangwi kunja kukhadadoka. Iye adakwata mwala kuuchita nsago mbagona penepo.

¹²Iye adalota kuti akhaona manera akuimira kubulukira pansi kufikiratu kudzulu, na angelo akutchitha na kukwira pamanerapo.

¹³Pontho kuti MBUYA akhaimira chifupi na iye[55] mbalonga mbati, “Ine ndine MBUYA, Mulungu wa Abrahamu na Isake. Ine ndinapereka kuna iwe na kuna pidzukulu pyako dziko inagona iweyi.

¹⁴Pidzukulu pyako pinainjipa pyakwanga ninga fumbi ya padziko yapansi. Iwo anafalikira khundu zonsene za dziko yapansi. Pontho kudzera muna iwe na kuna pidzukulu pyako ndinati nditsanzayise madzinza onsene.[56]

¹⁵Kumbuka kuti konsene kunaenda iwe ndinakhala nawe na kukukoya mwadidi, pontho ndinakudzesa pontho kudzikoyi. Ine nee ndinakusiyabi mpakana ndichite pyonsene pidadumbira ine kuti ndinakuchitira.”

¹⁶Yakobo adatutumuka kuchitulo mbalonga mbati, “MBUYA ali pano! Iye ali pambuto ino, pontho penepi ine nee ndikhapidziwabi!”

¹⁷Iye adachita mantha mbalonga mbati, “Mbuto ino njakugoswadi! Pano pathemadi kukhala nyumba ya Mulungu pontho mphamsuwo wakwendera kudzulu.”

¹⁸Bzobzo mangwana mwache Yakobo adalamuka mbakwata mwala ukhadachita iye nsago ule mbauimirisa kuti ukhale chikumbuso. Tenepo adakwata mafuta akusasanywa na olivi mbaakhuthulira padzulu pa mwala ule, kuuchitisa kukhala wakupambulika kuna Mulungu.

¹⁹Yakobo adaithula mbuto ile Betele.[57] (Luwani ya kweneko pakutoma ikhadziwika na dzina yakuti Luzi.)

²⁰Tenepo Yakobo adadumbira kuna MBUYA mbati, “Ngakhala imwe munakhala nane na kundikoya mwadidi paulendo unaenda inewu, pontho na kundipasa pyakudya na nguwo,

²¹pontho ndingabwerera mwadidi mwene kumusa kwa babanga, penepo munakhala Mulungu wanga.

²²Mwala waimisa ine apawu ninga chikumbuso inakhala mbuto yakukupembedzeranipo, pontho ndinapereka chakhumi cha pyonsene pinandipasa imwe.”