Read cisena Kutoma 29 Bible Online

Kutoma 29 - cisena bible

Kutoma 29

¹Yakobo adathimiza ulendo wache mbafika kudziko ya anthu akumabulukiro dzuwa.

²Kweneko adaonako mchera uli m'munda, pontho na mikumbi itatu ya mabira ili gone-gone chifupi na mcherawo thangwi mabirawa akhamwa penepo. Mwala wakufunga nawo msuwo wa mcherawo ukhali ukulu.

³Ndzidzi onsene ukhagumanyikana mabira pamcherapo, amakabuswa akhagulung'undisa mwalawo kuubulusa pamsuwopo. Angamala penepo akhaubwezera pamsuwo wa mcherawo.

⁴Yakobo adavunza amakabuswa ale mbati, “Amunamwe mukubulukira kupi?” Iwo adatawira mbati, “Tikubulukira ku Harani.”

⁵Iye adalonga kuna iwo mbati, “Ayi mumbamdziwambo Labani, mwana wamamuna wa Nahori?” Iwo adatawira mbati, “Ande, timbamdziwa.”

⁶Tenepo Yakobo adavunza mbati, “Ayi iye ngwakuwanga ene?” Iwo adatawira mbati, “Ande, ngwakuwanga ene, pontho ngayang'anani mwanache wamkazi Rakele nguyo anadza apa na mabira a babacheyo.”

⁷Yakobo adalonga mbati, “Podi kunjaku kudzati doka tayu, pontho ndzidzi wakufungira mabira m'thanga hudzati kwana tayu. Apo mwatani munakhonda kuamwesa mbamuenda nawo pontho m'tsanga kaadyesa?”

⁸Iwo adatawira mbati, “Ife nkhabe kwanisa kuchita tenepo tayu mpakana mikumbi yonsene ya mabira ifike pano, pontho mwalawu ugulung'undiswe kuubulusa pamsuwo wa mcherawu. Penepo tinakwanisa kumwesa mabirathu.”

⁹Yakobo mbali mkati kulonga na amakabuswa ale, Rakele adafika na mabira a babache, thangwi iye akhali makabuswa.

¹⁰Pidaona Yakobo Rakele mwana Labani, nkhoswe yache mache, pontho na mabira a Labani, adenda mbakagulung'undisa mwala udafunga na iwo pamchera ule, mbamwesa mabira a Labani.

¹¹Natenepo Yakobo adampsompsona Rakele mbatoma kulira na kukomerwa.

¹²Iye adalonga kuna Rakele mbati, “Ine ndine mdzukuluache babako, mwana Rebeka.” Natenepo iye adathamanga mbakampanga babache.

¹³Sindzidzi Labani nkhuva pya mdzukuluache, mwana nyamaingache, adachimbiza kagumanikana naye. Iye adamkhumbatira mbampsompsona, tenepo adadza naye kumusa kwache. Pidapanga Yakobo Labani pya pyonsene pidachitika pile,

¹⁴Labani adalonga mbati, “Ndimomwene, iwe ndiwe manungo anga, pontho chiropa changa.” Pidakhala Yakobo kweneko mwezi wamumphu,

¹⁵Labani adalonga kuna Yakobo mbati, “Leka kundiphatira basa pezi pene thangwi ndiwe mbaleanga. Unafuna ndikupagalinji?”

¹⁶Labani akhali na ana awiri achikazi; wamkulu dzinache ikhali Lea, wamng'onoyimbo dzinache ikhali Rakele.

¹⁷Lea maso ache akhali akuthima,[58] mbwenye Rakele akhali wakutandwa mwadidi, pontho wakubalika.

¹⁸Yakobo adafunana na Rakele, natenepo iye adalonga mbati, “Ngakhala munanditawirisa kusemba Rakele ndinati ndikuphatireni basa pyaka pinomwe.”

¹⁹Labani adatawira mbati, “Mphyadidi kuti mkaziyu ndipase iwepo kusiyana na kupasa munthu unango. Khala kuno na ine.”

²⁰Yakobo adaphata basa pyaka pinomwe, towera asembe Rakele. Ndzidzi udaphata iye basa udaoneka ninga nsiku pang'ono kuna iye, thangwi iye adamfuna pyakwanga Rakele.

²¹Tenepo Yakobo adalonga kuna Labani mbati, “Nsiku zidapangana ife zakwana; ndipaseni mkazanga ndikazhali naye.”

²²Natenepo Labani adachita phwando yakukazhali mbachemera munthu onsene kudza kuphwandoko.

²³Mbwenye mosiku wenewo, m'mbuto mwa Rakele, Lea ndiye adaperekwa kuna Yakobo, tenepo Yakobo adapita naye m'bonde mkaziyo.

²⁴Labani adapereka bitchu wache wamkazi Zilipa, kuna mwanache Lea kuti akhale nyakumphatira basa.

²⁵Mangwana mwache Yakobo adadzindikira kuti mkazi akhadapaswa iye ule akhali Lea. Natenepo iye adenda kuna Labani mbakalonga mbati, “Chachita imwe kuna inechi ninji? Rakele ndiye adaphatira ine basa. Apo thangwi yache ninji mwandinyengeza?”

²⁶Labani adamtawira mbati, “Wenewo si mtemo wathu tayu kuno kukazhalisa wamng'ono, nanache mbadzati kazhali.

²⁷Dikhira mpakana dimingu ya dzoma ya kukazhali imale, tenepo ndinakupasa Rakele, ngakhala unandiphatira pontho basa pyaka pinango pinomwe.”

²⁸Yakobo adatawirizana napyo. Tenepo pidamala dzoma yakusekera kukazhali kwa Lea, Labani adapereka Rakele kuna Yakobo kuti akhale mkazache.

²⁹Labani adapereka bitchu wache wamkazi, Biliha, kuna Rakele kuti akhale nyakumphatira basa.

³⁰Yakobo adapitambo m'bonde na Rakele mbamfuna pyakwanga kupiringana Lea. Kubuluka penepo adaphatira pontho Labani basa pyaka pinango pinomwe.

³¹Pidaona MBUYA kuti Lea akhafunwa pang'ono kusiyana na Rakele, iye adamchitisa Lea kukhala na ana, mbwenye Rakele akhali ngomwa.

³²Lea adakwata mimba mbabala mwana wamamuna. Iye adalonga mbati, “MBUYA aona kusanyika kwanga, tenepo mamunanga anandifuna.” Natenepo mwanayo adamthula Rubeni.[59]

³³Iye adakwata pontho mimba mbabala mwana mamuna. Iye adalonga mbati, “MBUYA andipasa mwanayi, thangwi iye adaona kuti ine nee ndikhafunwa tayu.” Natenepo mwanayo adamthula Simioni.[60]

³⁴Iye adakwata pontho mimba yachitatu mbabala mwana unango wamamuna. Iye adalonga mbati, “Chinchino mamunanga anakhala phathi-phathi na ine, thangwi ndambalira ana atatu achimuna.” Natenepo mwanayo adamthula Levi.[61]

³⁵Kubuluka penepo adakwata pontho mimba mbabala mwana mamuna. Iye adalonga mbati, “Ndzidzi uno ndikukuza MBUYA.” Natenepo mwanayo adamthula Yuda.[62] Tenepo iye adaimira kubala.