Read cisena Kutoma 30 Bible Online

Kutoma 30 - cisena bible

Kutoma 30

¹Mbwenye Rakele hadambalire Yakobo mwana na mbodzi ene tayu, natenepo iye adachita naye ntchanje nanache mbalonga kuna Yakobo mbati, “Ndipase ana, gopa ndinafa.”

²Yakobo adazhangali naye Rakele mbalonga mbati, “Ine si ine Mulungu tayu. Mulunguyo ndiye akukuchitisa kuti ukhonde bala.”

³Rakele adalonga mbati, “Kwata bitchu wanga wachikazi ugone naye, towera andibalire mwana. Na njira yeneyi ndinakwanisa kukhala mama kudzera muna iye.”

⁴Natenepo adapereka Biliha kuna mamunache, iyembo mbagona naye.

⁵Biliha adakwata mimba mbabalira Yakobo mwana wamamuna.

⁶Rakele adalonga mbati, “Mulungu atonga mseru wanga mwakundikomera. Iye ava kupempha kwanga mbandipasa mwana wamamuna.” Natenepo mwanayo adamthula Dani.[63]

⁷Biliha adakwata pontho mimba mbabala mwana wamamuna wachiwiri.

⁸Rakele adalonga mbati, “Ndathimbana nayedi nananga, kwache ndamkunda.” Natenepo mwanayo adamthula Nafitali.[64]

⁹Pidadzindikira Lea kuti akhadaimira kubala, adapereka Zilipa, bitchu wache wamkazi kuna Yakobo kukhala ninga mkazache.

¹⁰Tenepo Zilipa adabalira Yakobo mwana wamamuna.

¹¹Lea adalonga mbati, “Ndina mwayi.” Natenepo mwanayo adamthula Gadi.[65]

¹²Zilipa adabalira pontho Yakobo mwana unango wamamuna,

¹³tenepo Lea adalonga mbati, “Ndakomerwa pyakwanga pene! Chinchino akazi anandithula munthu wakukomerwa!” Natenepo mwanayo adamthula Asheri.[66]

¹⁴Pandzidzi wakuvuna tirigu, Rubeni adenda kumunda mbakagumanako mitombwe yamchena mbadza nayo kuna Lea mache. Rakele adalonga kuna Lea mbati, “Ndipasenimbo pang'ono mchena wa mwananu.”

¹⁵Lea adatawira mbati, “Kundikwatira mamunanga kwachita iweku, kudakwane tayu? Lero pontho ukufuna kukwata na mchena wa mwananga ene.” Rakele adalonga mbati, “Ngakhala unandipasa mchena wa mwanako, mosiku uno pano unakwanisa kupita m'bonde na Yakobo.”

¹⁶Na mawulo, pikhadza Yakobo kubulukira kuminda, Lea adenda kagumanikana naye mbampanga mbati, “Mosiku uno unapita m'bonde na ine pano, thangwi ndachita kukugula na mchena wa mwananga.” Natenepo Yakobo adapita naye m'bonde mosiku wenewo.

¹⁷Mulungu adava kupempha kwa Lea. Tenepo Lea adakwata mimba mbabalira Yakobo mwana wamamuna wachishanu.

¹⁸Lea adalonga mbati, “Mulungu andifupa, thangwi ndidapereka bitchu wanga kuna mamunanga.” Natenepo mwanayo adamthula Isakara.[67]

¹⁹Lea adakwata pontho mimba mbabalira Yakobo mwana wamamuna wachitanthatu.

²⁰Iye adalonga mbati, “Mulungu andipasa mtukwa wadidi. Chinchino mamunanga anandilemedza thangwi ndambalira mwana wamamuna wachitanthatu.” Natenepo mwanayo adamthula Zebuloni.[68]

²¹Kubuluka penepo adabala mwana wamkazi mbamthula Dina.

²²Kubuluka penepo Mulungu adamkumbuka Rakele; iye adava kupempha kwache mbachita kukhala pyakukwanisika kuti Rakele akhale na ana.

²³Iye adakwata mimba mbabala mwana wamamuna. Iye adalonga mbati, “Mulungu andibulusa manyadzo pakundipasa mwana wamamuna.

²⁴Ndinapempha pontho MBUYA kuti andipase mwana unango wamamuna.” Natenepo mwanayo adamthula Yosefe.[69]

²⁵Pidabalwa Yosefe, Yakobo adalonga kuna Labani mbati, “Ndilekeni kuti ndibwerere kudziko ya kwathu.

²⁶Mundipase akazanga na ananga, adaphatira ine basa ale, tenepo ndinaenda pyanga. Imwe mukuidziwa basa ikulu yakuphatirani ineyi.”

²⁷Labani adalonga kuna iye mbati, “Ngakhala iwe unakwanisa kundiverambo nsisi, leka kwendabi, thangwi ine ndadziwa kudzera mukuloteswa kuti MBUYA anditsanzayisa thangwi ya iwepo.”

²⁸Iye adathimiza kulonga mbati, “Longa kontache inafuna iwe kuti upagalwi, ndinati ndikupagali.”

²⁹Yakobo adatawira mbati, “Imwe mukupidziwa mule mwakuphatirani ine basa, pontho na mule mwainjipira pifuyo pyanu mwenemo pili m'manja mwanga.

³⁰Pyakuchepa pikhali na imwe, ine ndidzati bwera, pyainjipa pyakwanga, pontho MBUYA akutsanzayisani konsene kukhaenda ine.[70] Mbwenye lero ndinachita lini pinthu pyakuphedza napyo banjanga?”

³¹Labani adavunza mbati, “Apo ndikupasenji?” Yakobo adatawira mbati, “Lekani kundipasa chinthu na chibodzi chene. Mbwenye ndinathimiza kuyang'anira mikumbi yanu ngakhala munatawirizana na pinalonga inepi.

³²Munditawirise lero ndiende pakati pa mikumbi yanu yonsene ndikabulusepo mabira na mbuzi zamadamba-madamba penu mathotho-mathotho, pontho na anabira onsene akuswipa.[71] Kupagalwi kwanga kunakhala kweneko.

³³M'tsogolo muno munakwanisa kuona ngakhala ndachita pyakulungama. Mungabwera dzaona pyapagalwi ine, ngakhala panakhala mabira penu mbuzi pyakukhonda khala na madamba-madamba penu mathotho-mathotho, pontho na bira okhonda swipa, mupidziwe kuti yeneyo yachita kubiwa.”

³⁴Labani adatawira mbati, “Ande, ndatawira, tinapichita ninga mwapilongera iwemo.”

³⁵Mbwenye nsiku yonthoyo, Labani adabulusa mabokho onsene amisilingi-misilingi penu madamba-madamba na mathunzwi onsene amathotho-mathotho na amadamba-madamba, penu amisilingi yakuchena. Iye adabulusa pontho mabira onsene akuswipa mbapereka mkumbiwo kuna mwanache wamamuna kuti audyese.

³⁶Tenepo mwanayo adakwata mkumbiwo mbaenda nawo kutali na Yakobo; ulendowo ukhali wa nsiku zitatu. Yakobo adadyesambo mikumbi ya Labani idasalirayo.

³⁷Yakobo adakwata matsamvu awisi a miti yapopula, alimodi na njale, mbasuwa pimiti pinango matsamvu mule, natenepo m'matsamvu mule mudaoneka misilingi yakuchena.

³⁸Tenepo iye adakwata matsamvu ale mbaaikha m'michera mule, towera pikhale patsogolo pawo ipyo pingabwera kumwa madzi, thangwi penepa ndiye pakhabebesana ipyo.

³⁹Natenepo pikhabebesana mbuzi patsogolo pa matsamvu ale, zidakwata bele mbiziteya ana amisilingi-misilingi, amadamba-madamba, pontho amathotho-mathotho.

⁴⁰Yakobo adalekanisa mbuzi na mabira, tenepo adaachitisa onsene kuyang'ana kuna mkumbi wa Labani, ule ukhali wakuswipa na wamisilingi-misilingi. Na njira yeneyi iye adakwanisa kusasanya mkumbi wache mbakhonda kuuvungaza pabodzi na mkumbi wa Labani tayu.

⁴¹Pifuyo pyakunenepa na pyamphamvu pingabebesana Yakobo akhaikha matsamvu ale patsogolo m'michera mwawo kuti zibebesane chifupi na matsamvuwo.

⁴²Mbwenye Yakobo hadaikhe matsamvu ale patsogolo pa pifuyo pyakusowa mphamvu. Natenepo pifuyo pyonsene pyakusowa mphamvu pikhali pya Labani, mbwenye pyonsene pyakunenepa na pyamphamvu pikhali pya Yakobo.

⁴³Na njira yeneyi Yakobo adafuma pyakwanga. Akhali na mikumbi izinji ya pifuyo, mabulu na ngamila, pontho na mabitchu achimuna na achikazi.