Read cisena Kutoma 31 Bible Online

Kutoma 31 - cisena bible

Kutoma 31

¹Yakobo adava kuti ana achimuna a Labani akhalonga mbati, “Yakobo akwata pinthu pyonsene pya babathu. Mfuma yonsene ina iye ile, ikhali ya babathu.”

²Pontho iye ene Yakobo adaona kuti makhaliro a Labani kuna iye hakhali ninga mwakale tayu.

³Tenepo MBUYA adalonga kuna iye mbati, “Bwerera kudziko ya babako na abale ako. Ine ndinakhala nawe.”

⁴Natenepo Yakobo adatumira mphangwa Rakele na Lea kaapanga kuti agumanikane naye m'minda kukhali mikumbi yache kule.

⁵Iye adalonga kuna iwo mbati, “Ine ndaona kuti makhaliro a babanu kuna ine si ninga mwakale mule tayu. Mbwenye Mulungu wa babanga ambakhala na ine.

⁶Imwe monsene mukudziwa kuti babanu ndamphatira basa na mphamvu zanga zonsene.

⁷Mbwenye iye andinyengeza mbasanduza kupagalwi kwanga kakhumi. Kwache Mulungu hadanditawirise kuti andikuwaze tayu.

⁸Ndzidzi onsene ukhalonga Labani kuti, ‘Kupagalwi kwako kunakhala kukwata mbuzi zamathotho-mathotho,’ mikumbi yonsene idateya ana amathotho-mathotho. Pikhalonga iye kuti, ‘Kupagalwi kwako kunakhala kukwata mbuzi zamisilingi-misilingi,’ mikumbi yonsene idateya ana amisilingi-misilingi.

⁹Mulungu akwata pifuyo pyonsene kupibulusa kuna babanu mbapipereka kuna ine.

¹⁰“Pandzidzi wakuteya pifuyo, ndidalota ndoto zakuti mabokho akhabebesa ale akhali amisilingi-misilingi, amathotho-mathotho na amadamba-madamba.

¹¹Mngelo wa Mulungu adalonga kuna ine kundoto mbati, ‘Yakobo.’ Ine ndidatawira kuti, ‘Ndili pano.’

¹²Iye adathimiza kulonga kuti, ‘Ngayang'ana mabokho onsene anabebesana ngamisilingi-misilingi, mathotho-mathotho na amadamba-madamba. Ine ndachitisa penepi kuti pichitike thangwi ndaona pyonsene pinakuchitira Labani.

¹³Ine ndine Mulungu ule adakuonekera ku Betele, kule kudaimisa iwe mwala kukhala chikumbuso mbuupereka manja mwanga pakuukhuthulira mafuta aolivi padzulu pache, pontho kule kudadumbira iwe pamaso panga. Chinchino sasanyika ubwerere kudziko kudabalwa iwe.’ ”

¹⁴Rakele na Lea adatawira mbati, “Nkhabe pontho chinthu chasala chakuti tinakwata babathu angafa.

¹⁵Iye ambatichitira pinthu khala ninga ndife alendo. Iye adatisembesa pontho chinchino kobiri zonsene zidasembeswa na ife amala kuzidya.

¹⁶Mfuma yonsene yakwata Mulungu kubulukira kuna babathu kuipereka kuna ife, njathu na anathu. Chitani pyonsene pyakupangani Mulungu.”

¹⁷Natenepo Yakobo adasasanyika pyakwenda kuna babache m'dziko ya Kanani. Iye adakwizika anache na akazache pa ngamila mbazwinga pifuyo pyache pyonsene kwenda patsogolo pache, pontho na pyonsene pikhadagumana iye m'dziko ya Mesopotamia.

¹⁸

¹⁹Labani akhadenda kachingisa mabirache, natenepo Rakele adaba milungu ya m'nyumba mwa babache.

²⁰Yakobo adanyengezambo Labani pakukhonda kumpanga kuti iye akhafuna kuthawa pyache.

²¹Yakobo adakwata pyonsene pikhali na iye mbabuluka mwakuchimbiza. Iye adawambuka mkulo wa Yufurate mbatoma kwenda kudziko ya mapiri ya Gileadi.

²²Pidagwanda nsiku zitatu Labani adava kuti Yakobo akhadathawa.

²³Iye adakwata anthu ache mbatewera Yakobo. Iwo adamala nsiku zinomwe m'njira mpakana adamphatira m'dziko ya mapiri ya Gileadi.

²⁴Mosiku wenewu Mulungu adalotesa Labani mbampanga mbati, “Chenjera, leka kamthuswa Yakobo na pang'ono pene.”

²⁵Yakobo akhadamanga msasache paphiri, natenepo Labani adamangambo msasache pabodzi na amunache m'dziko ya mapiri ya Gileadi.

²⁶Labani adalonga kuna Yakobo mbati, “Udandinyengezeranji tenepa kukwata ananga kwenda nawo pyako ninga akazi akuphatwa kunkhondo?

²⁷Udandinyengezeranji tenepa kubuluka pyako mwakuzemba? Iwe mbudandipanga, ine mbidakugwinya mwadidi na kusekera pontho kuimba pakuphatisa basa pisekese na anyakatangale.

²⁸Iwe hudanditawirise tayu kumpsompsona ananga pontho pidzukulu pyanga kugonekana nawo. Pinthu pidachita iwepyo mphyapezi-pezi.

²⁹Ine ndina mphamvu zakukuwaza nazo, mbwenye mosiku wa dzulowu Mulungu wa babako andicheuza kuti ndileke kukuthuswa na pang'ono pene.

³⁰Ndapidziwa kuti iwe udabuluka thangwi udatchuwa pyakwanga kwanu, apombo udaberanji milungu ya m'nyumba mwanga?”

³¹Yakobo adatawira mbati, “Ine ndikhagopa kuti munandipokosera ananuwa.

³²Mbwenye ngakhala munamgumana unango pano kuti ana milungu yanu, weneyo aphiwe. Amunanga ali pano ninga mboni, sakani chinthu chonsene chanu, pontho chinthu chanucho mungachigumana chikwateni.” Yakobo hadapidziwe tayu kuti Rakele akhadaba milungu ya Labani.

³³Labani adapita mbakayang'ana m'khumbi mwa Yakobo. Kubuluka penepo adapita mwa Lea, na mwa mabitchu ache awiri achikazi ale, kwache monsenemo hadagumanemo milungu yache ile tayu. Kubuluka penepo adapita m'khumbi mwa Rakele.

³⁴Rakele akhadakwata milungu ile, mbaiikha m'thumba ya chakukhalira pa ngamila, tenepo iye adaikhalira. Labani adasaka-saka m'khumbi monsene, kwache hadaigumanemo tayu.

³⁵Rakele adalonga kuna babache mbati, “Baba, lekani kundizhangalira, mbwenye ine sinakwanisa kuimira pamaso panu tayu thangwi ndili kumwezi.” Labani adasaka-saka, kwache milungu yache hadaigumane tayu.

³⁶Natenepo Yakobo adazhangali pyakwanga mbavunza mbati, “Ndakudawiraninji? Ndaswa mwambo wanji wakuti wakupasani mphamvu zakundisaka-saka nazo?

³⁷Chinchino mwasaka-saka monsene muna pinthu pyanga, apo ntchinthu chanji cha m'nyumba chagumana imwe kuti ntchanu? Chiikheni pakwechapa kuti abale anu na amunanga achione, pontho alekeni iwo apitonge kuti mbani pakati pa imwe na ine achita pyadidi.

³⁸Ine ndakhala namwe pyaka makumawiri; mabiranu na mbuzi zanu hazidaleke kuteyana tayu. Pontho ine sidadye kamwana mbuzi penu biranu tayu.

³⁹Ndzidzi onsene bira angaphatwa na nyama zam'tsanga, ndikhagula ndekha ene inango kubwezera penepo. Ine nee ndikhadza nayo kuna imwe tayu kukuonesani kuti si ine ndidachitisa penepi. Imwe mukhandipagalisa chinthu chonsene chakubiwa, penu chibiwe na masikati penu na mosiku.

⁴⁰Ndzidzi uzinji ndikhaona nyatwa na kupisa kwa dzuwa masikati, pontho na kutonthola mosiku. Ine nee ndikhakwanisa kuona chitulobi.

⁴¹Penepi pikhali tenepa pyaka pyonsene makumawiri pikhakhala ine na imwe. Pyaka khumi na pinayi ndidakuphatirani basa towera ndisembe ananu awiriwa, pontho pyaka pitanthatu ndidaphata basa, towera mundipasembo pifuyo pyanupi, kwache imwe mwandipunza kupagalwi kwanga kakhumi.

⁴²Ngakhala Mulungu wa babanga, Mulungu wa Abrahamu na Isake hakhali nane tayu, imwe mbamudandigwinya kale chimanja-manja. Mbwenye Mulungu adaona kusanyika kwanga na basa yaphata ine, pontho mosiku wa dzulowu adakusumululani.”

⁴³Labani adatawira Yakobo mbati, “Akaziwa mbananga; anawa nganga, pontho pifuyopi mphyanga. Kulonga pyakuona pyonsene pinaona iwe panopi mphyanga. Podi ine sinakwanisa kuchita chinthu na chibodzi chene kuti ndigoswe anangawa na anawo ene tayu,

⁴⁴ndasasanyika kuchita nawe chiverano. Tende tisasanye mulu wa miyala kuti ukhale chikumbuso cha chiverano chathu.”

⁴⁵Natenepo Yakobo adakwata mwala mbauimisa kuti ukhale chikumbuso.

⁴⁶Iye adapanga amunache kuti asasanye mulu unango wa miyala. Tenepo iwo adadya pyakudya pyawo m'khundu-khundu mwa mulu wa miyala ule.

⁴⁷Labani adauthula mulu ule Yegara-Sahaduta,[72] mbwenye Yakobo adauthula Galedi.[73]

⁴⁸Labani adalonga kuna Yakobo mbati, “Mulu wa miyalawu ndiye unakhala chikumbuso kuna tonsenefe.” Ndi thangwi yache mbuto ile idathulwa Galedi.

⁴⁹Labani adalonga pontho mbati, “MBUYA mbaone pinachita ife tonsene pinalekana ife unango na mwanzache.” Natenepo mbuto ile idathulwa pontho Mizipa.[74]

⁵⁰Labani adathimiza kulonga mbati, “Ngakhala unakavuya anangawa penu kusemba akazi anango, podi kwene kuti ine ndikhonde kupidziwa, mbwenye ukumbuke kuti Mulungu akutiona.

⁵¹Miyala yamuluka ine pakati pa iwe na ine njishi, pontho mwala wakuti ukhale chikumbuso ngufu.

⁵²Pyonsene piwiri, mulu wa miyala na mwala wachikumbuso mphyakutikumbusa. Ine nkhabe gwanda kupiringana muluwu kukusosa tayu. Iwembo leka kugwanda kupiringana mulu wenewu, penu mwala wa chikumbuso kundisosa.

⁵³Mulungu wa Abrahamu na Mulungu wa Nahori[75] ndiye anakhala mtongi pakati pathu.” Tenepo na dzina ya Mulungu, ambapembedza Isake babache ule, Yakobo adadumbira kuti anakoya chiverano chile.

⁵⁴Iye adapha nyama mbaipereka nsembe paphiri. Natenepo adachemera amunache kadya. Pidamala iwo kudya adagona paphiri ponthopo.

⁵⁵Bzobzo mangwana mwache, Labani adampsompsona ana achikazi ale, pontho na pidzukulu pyache kugonekana nawo. Kubuluka penepo adalamuka mbabwerera kwawo.