Read cisena Kutoma 32 Bible Online

Kutoma 32 - cisena bible

Kutoma 32

¹Pikhaenda Yakobo kwawo, angelo anango adagumanikana naye.

²Pidaaona iye, adalonga kuna iwo mbati, “Ino ndi gulu ya Mulungu.” Natenepo mbuto ile idaithula Mahanaimu.[76]

³Yakobo adatuma patsogolo pache anyamphangwa kuna nanache, Esau, ku Seiri, dziko ya Edomu.

⁴Iye adaapanga mbati, “Imwe mwathema kalonga ipi kuna mbuyanga Esau: ‘Nyabasanu Yakobo alonga kuti ine ndikhakhala na Labani, pontho ndakhala naye mpakana lero.

⁵Ndina ng'ombe, mabulu, mabira, mbuzi, na mabitchu achimuna na achikazi. Lero ine ndikutuma mphangwa zenezi kuna imwe, mbuyanga, towera mundikomere mtima.’ ”

⁶Pidabwerera anyamphangwa ale kuna Yakobo, adalonga mbati, “Ife tidenda kuna nananu Esau, tenepo chinchino pano akubwera dzagumanikane namwe. Iye ali pabodzi na amuna madzana manayi.”

⁷Yakobo akhali na mantha, pontho akhaswipa mtima. Iye adagawa anthu akhali na iye ale m'magulu awiri mbachita chibodzi-bodzi na mabirache, ng'ombe zache na ngamila zache.

⁸Iye adanyerezera kuti, “Ngakhala Esau anasosa gulu ibodzi, gulu inango yakusalayi inakwanisa kuthawa.”

⁹Natenepo Yakobo adapemphera mbati, “Mulungu wa mbuyanga Abrahamu, Mulungu wa babanga Isake, ndivesereni, MBUYA, ule adalonga kuna ine mbati, ‘Bwerera kudziko ya kwanu na ya abale ako, pontho ndinachitisa pinthu pyako pyonsene kukufambira mwadidi.’

¹⁰Ine nyabasanu, ndine munthu okhonda thema kuoneswa kundifuna kwanu kokhonda mala pontho kukhulupirika kwanu konsene. Pikhawambuka ine mkulo wa Yorodani, ndikhali kwene na mthondodzo m'manja mwanga, mbwenye lero ndasanduka magulu mawiri.

¹¹Ndikupemphera kuti mundipulumuse m'manja mwa nananga Esau, thangwi ndikugopa kuti mwinango anadza pabodzi pene na akazache pontho anache kutisosa mbativunga tonsenefe.

¹²Mbwenye imwe mudandipanga kuti, ‘Ine ndinati ndichitise pinthu pyako kufamba mwadidi, pontho ndinachitisa pidzukulu pyako kuinjipa ninga tchetcha ya pagombe yakuti nee inakwanisika lengeseka tayu.’ ”

¹³Pidagona iwo penepo mosiku wenewo, Yakobo adasankhula kubulukira pa pifuyo pyache kuti pikhale mtukwa kuna nanache Esau; mathunzwi madzana mawiri na mabokho makumawiri, mabira achikazi madzana mawiri na achimuna makumawiri, ngamila zamkaka na anawo ene makumatatu, ng'ombe zikazi makumanayi, pontho mikono khumi, pontho mabulu achikazi makumawiri na achimuna khumi.

¹⁶Iye adapigawa malingana na mtundu wache mbaikha nyabasache mbodzi pa mkumbi onsene kuuyang'anira. Iye adalonga kuna iwo mbati, “Ndokoni patsogolo panga, pontho musiye mbuto pakati pa mkumbi na mkumbi.”

¹⁷Iye adapanga nyabasache wakutoma mbati, “Ungagumanikana na nananga Esau mbakuvunza kuti, ‘Mbuyako mbani? Ukwenda kupi? Pifuyo pili patsogolo pakopi mphyani?’

¹⁸Wathema kutawira kuti, ‘Penepi mphya nyabasanu Yakobo. Iye apitumiza kuti pikhale mtukwa kuna mbuyache Esau. Yakobo ene mwenechiroache ali m'ndulimu.’ ”

¹⁹Iye adalonga chibodzi-bodzi kuna nyabasa wachiwiri, wachitatu na kuna anango onsene, ale akhali anyakuyang'anira mikumbi ile mbati, “Imwe mwathema kulonga tenepa:

²⁰‘Ande, nyabasanu Yakobo ali m'ndulimu.’ ” Yakobo akhanyerezera kuti, “Na mitukwayi ndinamkhuludza mtima Esau, pontho ndingagumanikana naye mwinango anandilekerera.”

²¹Iye adatumiza mitukwa ile patsogolo pache, mbwenye iye ene mwenechiro adagona pamsasapo.

²²Mosiku onthowo Yakobo adalamuka mbakwata akazache awiri na mabitchu achikazi awiri, pontho na anache khumi na mbodzi ale, mbawambuka mkulo wa Yaboki.

²³Pidamala iye kuawambusa, iye adawambusa pontho pyonsene pikhali na iye,

²⁴mbwenye iye adasalira yekha ene m'nduli. Tenepo munthu unango adadza mbathimbana naye mpakana m'makalakwecha.

²⁵Pidaona munthu ule kuti iye akhachimwana kumkunda, adamenya nswukundu ya Yakobo, tenepo mwendo wa Yakobo adabzuguduka pikhathimbana iwo.

²⁶Munthu ule adalonga kuna Yakobo mbati, “Ndileke ndiende, kunja kukuchena uku.” Yakobo adatawira mbati, “Nkhabe, ungakhonda kunditsanzayisa sinakuleka tayu.”

²⁷Munthu ule adavunza mbati, “Dzinako mbani?” Yakobo adatawira mbati, “Ndine Yakobo.”

²⁸Munthu ule adatawira mbati, “Dzinako hinakhalave Yakobo tayu. Iwe wathimbana na Mulungu, pontho na anthu mbuakunda, natenepo dzinako inakhala Israele.”[77]

²⁹Yakobo adalonga mbati, “Ngandipangenimbo dzinanu.” Mbwenye iye adatawira mbati, “Thangwi yache ninji unafuna kudziwa dzinanga?” Tenepo iye adamtsanzayisa Yakobo.

³⁰Yakobo adalonga mbati, “Ndaona Mulungu maso na maso, kwache ndina moyo.” Natenepo mbuto ile adaithula Peniele.[78]

³¹Pikhabuluka Yakobo pa Peniele, dzuwa idabuluka. Natenepo iye akhatchikhama, thangwi ya nswukundu yache.

³²Kutomera penepo mpakana lero anthu a ku Israele nkhabe kudya uzingo wa nswukundu tayu, thangwi Yakobo adamenywa chifupi pa uzingo wenewo.