Read cisena Kutoma 33 Bible Online

Kutoma 33 - cisena bible

Kutoma 33

¹Pidaona Yakobo kuti Esau akubwera pabodzi na amunache madzana manayi ale, iye adagawa ana ale kuna Lea, Rakele na kuna mabitchu achikazi awiri ale.

²Iye adakwata mabitchu achikazi awiri ale mbaaikha patsogolo pabodzi na anawo ene; kubuluka penepo Lea na anache, pakumalisira Rakele na Yosefe.

³Yakobo adenda patsogololetu pa onsenewo mbalamba kanomwe pikhafika iye chifupi na mbaleache.

⁴Mbwenye Esau adathamanga kagumanikana naye, iye adamkhumbatira mbampsompsona. Onsene awiri akhalira.

⁵Pidamwaza-mwaza Esau maso mbaona akazi na anawo ene, adavunza mbati, “Anthu ana iwewa mbani?” Yakobo adatawira mbati, “Enewa mbana ale apereka Mulungu kuna ine, nyabasanu, thangwi ya kundikomera kwache mtima.”

⁶Tenepo mabitchu achikazi pabodzi pene na anawo adafika mbalamba.

⁷Kubuluka penepo adafika Lea na anache, pakumalisira pache adafika Rakele na mwanache Yosefe mbalamba.

⁸Esau adavunza mbati, “Apombo gulu inango idagumanikana na ine ile? Penepile pikufuna kulonganji?” Yakobo adatawira mbati, “Penepile mphyakuti mundikomere napyo mtima, mbuyanga.”

⁹Esau adatawira mbati, “Mbaleanga, ine ndili napyo pyakukwana; koya pina iwepi.”

¹⁰Yakobo adalonga mbati, “Nkhabe, ndaphata miyendo ngakhala mwandikomera mtima tambirani mitukwanga. Kuona kwene nkhope yanu, kuna ine kwakhala ninga ndikuona nkhope ya Mulungu, podi imwe mwaonesa kukoma kwanu mtima kuna ine.

¹¹Ndaphata miyendo, tambirani mtukwa wabwera na ine kuna imwewu; Mulungu andikomera mtima, tenepo andipasa pyakusowa pyanga pyonsene.” Yakobo adathimiza kumdembetera mpakana iye adatambira.

¹²Esau adalonga mbati, “Mbatisasanyikeni pyakwenda. Ndinatsogola ndine.”

¹³Yakobo adatawira mbati, “Imwe mukudziwa kuti ana anangowa ngang'ono, pontho ndathema kunyerezera pifuyo pyonsene pinayamwisa anawopi. Ngakhala ipyo pinafambiswa mwakuthamanga, podi ikhale nsiku ene ibodzi, pifuyo pyonsene pinamala kufa.

¹⁴Ndaphata miyendo, mbuyanga, imwe tsogolani, ine ndinakutewereni pang'ono-pang'ono kufamba ninga munakwanisira ine na pifuyopi, pontho na ana mpakana ndikugumaneni mu Seiri.”

¹⁵Esau adalonga mbati, “Nditawirise kuti amunanga anango usale nawo.” Mbwenye Yakobo adatawira mbati, “Nkhabe funika kuchita tenepo; chikhafuna ine kwene ntchakuti mundikomere mtima.”[79]

¹⁶Natenepo nsiku yeneyo, Esau adautoma ulendo wakubwerera ku Seiri.

¹⁷Mbwenye Yakobo adenda ku Sukoti, kule kudakamanga iye nyumbache na mathanga kuti pifuyo pyache pikhalamo. Ndi thangwi yache mbutoyi idathulwa Sukoti.[80]

¹⁸Pikhadabwerera Yakobo kubulukira ku Mesopotamia, iye adafika mwadidi mwene kumzinda wa Shekemu, m'dziko ya Kanani, mbamanga msasache m'munda chifupi na mzindawo.

¹⁹Iye adaugula munda ule kubulukira kuna pidzukulu pya Hamori, babawo Shekemu, na kobiri zasiliva zakukwana dzana ibodzi.

²⁰Kweneko iye adamanga guwa yansembe mbaithula Eli, Mulungu wa Israele.