Read cisena Kutoma 34 Bible Online

Kutoma 34 - cisena bible

Kutoma 34

¹Nsiku inango Dina, mwana wamkazi wa Lea na Yakobo, adenda kacheza na akazi a mu Kanani.

²Shekemu, mwana Hamori wa Chihivi, ule akhali mfumu wa nthemba yeneyo, pidaona iye Dina, adamphatirira.

³Mtimache udakwatika naye Dina, mwana Yakobo. Iye adamfuna pyakwanga mtsikanayo mwakuti adalonga naye mafala akutapira.[81]

⁴Natenepo Shekemu adalonga kuna Hamori babache mbati, “Ndisemberenimbo mtsikanayi kuti akhale mkazanga.”

⁵Yakobo adava kuti mwanache wamkazi Dina aswipiswa. Podi anache achimuna akhadenda kumunda na pifuyo, iye adamatama pyache mpakana iwo onsene adabwerera kumusa.

⁶Natenepo Hamori, babache Shekemu, adenda kalonga na Yakobo.

⁷Sindzidzi pidava ana a Yakobo pidachitika pile, adafika kumusa kubulukira kuminda. Iwo adatutumuka napyo mbazhangali pyakwanga thangwi Shekemu akhadachita chinthu chakuchitisa manyadzo pyakwanga mu Israele pakuphatirira mwana wamkazi wa Yakobo, chinthu chakuti nee chidatheme kuchitika tayu.

⁸Mbwenye Hamori adalonga mbati, “Mwananga Shekemu mtimache onsene wagona pana mwananuyi. Ine ndaphata miyendo, mpaseni mtsikanayi kuti akhale mkazache.

⁹Tendeni tisemberane; imwe musembe anathu, ifembo tisembe ananu.

¹⁰Imwe munakwanisa kukhala pakati pathu; munakwanisa kukhala pambuto yonsene inafuna imwe; khalani mwenemo, chitanimo malondanu mbamukhale na pinthu pyanu pene.”

¹¹Tenepo Shekemu adalonga kuna babache Dina na kuna nkhoswe zache mbati, “Ndikomerenimbo mtima ine, pontho ndinati ndikupaseni pyonsene pinafuna imwe.

¹²Ndipangeni konta ya chuma, pontho longani mitukwa inafuna imwe, tenepo ndinati ndikupagalini chonsene chinalonga imwe. Chinafuna ine chene ntchakuti mundipase mtsikanayi kuti akhale mkazanga.”

¹³Na thangwi yakuti Dina akhadaswipiswa, ana achimuna a Yakobo akhatawira Shekemu, pontho na Hamori, babache Shekemuyo mwakuanyengeza.

¹⁴Iwo adalonga kuna iwo mbati, “Ife nkhabe kwanisa chita chinthu ninga chenechi tayu. Ife nkhabe kwanisa kusembesa nyamaingathu kuna mamuna okhonda gwandwa nsonga yachimuna; kweneku nkhutichitisa manyadzo.

¹⁵Ife tinakwanisa kuphatizana namwe ngakhala munatawira chinthu chibodzi, kuti imwe mukhale ninga ife pakugwanda nsonga zakumaso amunanu onsene.

¹⁶Tenepo tinakutawirisani kusemba anathu, ifembo tinasemba ananu. Tinakhazikika pakati panu mbatikhala anthu abodzi na imwe.

¹⁷Mbwenye ngakhala munakhonda kugwandwa nsonga, ife tinamkwata nyamaingathu mbatienda pyathu.”

¹⁸Pikhalonga iwopyo pidaoneka pyadidi pamaso pa Hamori na mwanache Shekemu.

¹⁹Mphale, ule akhali wakulemedzwa pyakwanga kupiringana anthu onsene a pabanja pawo, hadavunge ndzidzi kuchita pidalonga iwopyo tayu, thangwi iye akhamfuna pyakwanga mwana Yakobo.

²⁰Natenepo Hamori na mwanache Shekemu adenda kumsuwo wa mpanda wa mzindawo kalonga na anzawo a mumzindamo.

²¹Iwo adalonga mbati, “Anthuwa mbadidi. Tendeni tiatawirise kukhala m'dziko mwathu muno, pontho achitemo malondawo. Dzikoyi njikulu; anakwanisa kukhalambo. Ife tinakwanisa kusemba anawo, iwombo mbasemba anathu.

²²Mbwenye iwo anatawira kukhala nafe ninga anthu abodzi, ngakhala ife amuna tonsene tinagwandwa nsonga zakumaso ninga mumbachitira iwo.

²³Ayi pifuyo pyawo na pyonsene pina iwo pinakhala pyathu tayu? Apo tendeni tiphatizane nawo, towera akhale pakati pathu.”

²⁴Amuna onsene ale akhadenda kumsuwo wa mzinda, adatawirizana napyo pidalonga Hamori na mwanache Shekemu, natenepo mwana wamamuna onsene mumzindamo adagwandwa nsonga yachimuna.

²⁵Pidagwanda nsiku zitatu, mtswotswo wa amuna ale udzati mala tayu, ana awiri a Yakobo, Simioni na Levi, nkhoswe zache Dina, adakwata matalasadawo mbapita mumzindamo mwakukhonda oniwa na anthu mbapha amuna onsene

²⁶pabodzi pene na Hamori, pontho mwanache Shekemu. Natenepo adamkwata Dina kumbulusa m'nyumba mwa Shekemu mbaenda pyawo.

²⁷Pidamala iwo kupha amuna a mumzindamo, ana anango achimuna a Yakobo adadza mbasakaza mzinda onsene kubwezera kuswipiswa kudachitwa nyamaingawo Dina.

²⁸Iwo adakwata mabira, ng'ombe, mabulu na pyonsene pya mumzindamo, pontho na pya kumunda.

²⁹Iwo adakwata pyakufunika pyonsene, pontho adakwata akazi na ana ene mwakuakhakhamiza mbatswairiratu m'nyumba zawo zonsene mbakhonda kusiya na chibodzi chene.

³⁰Yakobo adalonga kuna Simioni na Levi mbati, “Mwandipolomolera nyatwa; chinchino Akanani na Aperizi, pontho na onsene ali m'dziko muno anati andizonde. Ine nkhabe amuna azinji; iwo angagumanyikana pabodzi kumenyana na ine, banjathu yonsene inavungika.”

³¹Mbwenye iwo adatawira mbati, “Ife nkhabe yang'ana kwene nyamaingathu kuseluswa ninga puta tayu.”