Read cisena Kutoma 35 Bible Online

Kutoma 35 - cisena bible

Kutoma 35

¹Mulungu adalonga kuna Yakobo mbati, “Ndokoletu ku Betele mbukakhazikike kweneko. Pontho ukandimangireko guwa yansembe, ule ndidakuonekera pikhathawa iwe pamaso pa mbaleako Esau.”

²Natenepo Yakobo adalonga kuna banjache yonsene na kuna akhali na iye ale mbati, “Bulusani milungu yachilendo ina imweyi, pontho mupichenese mwekha ene mbamuvale nguwo zakuchena.

³Kubuluka penepo tendeni ku Betele, kule kunafuna ine kamangira Mulungu guwa yansembe; Mulungu ule adava kupempha kwanga pansiku ya nyatwa zanga, pontho ule ambakhala na ine konsene kunaenda ine.”

⁴Natenepo iwo adapereka milungu yachilendo ikhali na iwo, pontho mphete zikhavala iwo m'makutu mwawo kuna Yakobo. Tenepo iye adapikwata mbapifikhira pansi pa muti wamthundu chifupi na Shekemu.

⁵Pikhatoma iye na anache ulendo wawo, anthu akhakhala muluwani ya chifupi na iwo ale adaphatwa na mantha pyakwanga mwakuti iwo hadaathamangiseve tayu.

⁶Yakobo pabodzi na anthu ache onsene adadza kuluwani ya Luzi, kule chinchino kumbadziwika na dzina yakuti Betele, m'dziko ya Kanani.

⁷Kweneko adamanga guwa yansembe, tenepo mbutoyo adaithula Eli Betele, thangwi mphenepo padamuonekera Mulungu pikhathawa iye pamaso pa mbaleache Esau.

⁸Debora, makayayache Rebeka, adafa mbamuikha pansi pa muti wamthundu kumwera kwa Betele. Natenepo mutiwo udathulwa “Mthundu wa chiliro.”

⁹Pidabwerera Yakobo kubulukira ku Mesopotamia, Mulungu adamuonekera pontho mbamtsanzayisa.

¹⁰Mulungu adalonga mbati, “Dzinako ndi Yakobo, mbwenye kutomera lero kwenda m'tsogolo dzinako inakhala Israele.” Natenepo Mulungu adamthula Israele.

¹¹Tenepo Mulungu adalonga kuna iye mbati, “Ine ndine Mulungu Wamphamvu zonsene. Khala na ana azinji. Madzinza anabulukira muna iwepo, pontho mafumu anabulukira muna iwepo.

¹²Ine ndinati ndikupase dziko idapasa ine Abrahamu na Isake, pontho ndinaipasa pidzukulu pyako iwe ungafa.”

¹³Tenepo Mulungu adenda mbasiya Yakobo ponthopo.

¹⁴Yakobo adaimisa mwala wa chikumbuso pambuto pakhadalonga iye na Mulungu pale, pontho kuichitisa kukhala yakupambulika pakukhuthulirapo vinyu na mafuta aolivi.

¹⁵Mbutoyo adaithula Betele.

¹⁶Yakobo na banjache adabuluka ku Betele. Pikhadasala iwo na kansinzo kuti afike ku Efurata, ndzidzi wache Rakele wakuti abale mwana ukhadamkwanira. Tenepo iye adanenseka pyakwanga pikhabuluka mwanayo.

¹⁷Pidandendeya mtswotswowo, nyakumbazika adalonga kuna iye mbati, “Rakele, leka swipa mtima, ndi mwana wamamuna pontho.”

¹⁸Pikhathatha iye na imfa, mwanacheyo adamthula Benoni.[82] Mbwenye babache mwanayo adamthula Benjemani.[83]

¹⁹Pidafa Rakele adaikhwa m'khundu mwa njira yakwendera ku Efurata, kule chinchino kumbadziwika na dzina yakuti Betelehemu.

²⁰Yakobo adaimisa mwala wa chikumbuso panthumbipo. Na lero mwalawo uli penepo kuonesa nthumbi ya Rakele.

²¹Yakobo adafedza patsogolo kukhundu inango ya nsanja ya Ederi.

²²Pikhakhala Israele m'dziko mule, Rubeni adapita m'bonde na Biliha, mkazi wachibitchu wa babache. Yakobo adava penepi mbazhangali napyo.[84] Yakobo akhali na ana khumi na awiri.

²³Ana a Lea mbawa: Rubeni (mwana wautombo wa Yakobo), Simioni, Levi, Yuda, Isakara na Zebuloni.

²⁴Ana a Rakele mbawa: Yosefe na Benjemani.

²⁵Ana a Biliha, bitchu wamkazi wa Rakele, mbawa: Dani na Nafitali.

²⁶Ana a Zilipa, bitchu wamkazi wa Lea, mbawa: Gadi na Asheri. Ana enewa adabalwa mu Mesopotamia.

²⁷Yakobo adenda kuna Isake babache pa Mamure, penu Kiriati-Ariba, ule pontho ndi Hebroni, kule kukhakhala Abrahamu pabodzi pene na Isake.

²⁸Isake adafa uku ana pyaka dzana na makumasere, pontho akhadakulupala mwadidi. Tenepo anache Esau na Yakobo adenda kamuikha m'masiye babawo.