Read cisena Kutoma 37 Bible Online

Kutoma 37 - cisena bible

Kutoma 37

¹Yakobo adathimiza kukhala m'dziko ya Kanani kukhakhala babache kule;

²tenepo mbiri ya banjache Yakobo njishi. Yosefe mwana mphale wa pyaka khumi na pinomwe akhadyesa mabira a babache pabodzi pene na abale ache, ana a Biliha na Zilipa, akazi achibitchu a babache. Iye akhadza na mphangwa zakuipa kuna babache zakulonga pinthu pikhachita abale ache.

³Yakobo akhamfuna pyakwanga Yosefe kupiringana anache onsene, thangwi iye adabalwa mwenemo Yakobo akalamba kale. Tenepo iye adamsasanyira mkhanjo wakulapha wakukhala na mikono.[87]

⁴Pidaona abale ache kuti babawo akhamfuna pyakwanga Yosefe kupiringana iwo onsene, adamzonda mwakuti iwo hakhalongave naye mafala adidi tayu.

⁵Mosiku unango Yosefe adalota, natenepo pidapilonga iye kuna abale ache, iwo ndiye adanyanyiratu kumzonda.

⁶Iye adalonga kuna iwo mbati, “Ngavani ndoto zalota ine mosikuzi.

⁷Tonsene tikhali m'munda kumanga misumbu yathu ya tirigu. Mwakututumusa mtolo wanga udaimira dzololo, mbwenye misumbu yanu idadza mbizungulira msumbu wanga mbaulambira.”

⁸Abale ache adamvunza mbati, “Kadi iwe ukunyerezera kuti unakhala mfumu mbutitonga?” Natenepo iwo ndiye adanyanyiratu kumzonda, thangwi ya ndoto zachezo pontho na pikhalonga iye pya iwo.

⁹Kubuluka penepo Yosefe adalota pontho ndoto zinango mbaapanga abale ache mbati, “Ine ndalota ndoto zinango. Ndidaona dzuwa, mwezi na nyenyezi khumi na ibodzi zikundilambira.”

¹⁰Iye adazilonga pontho ndoto zachezo kuna babache. Tenepo babache adamsumulula mbati, “Ndoto zenezi nsamtundu wanji? Kadi iwe ukunyerezera kuti ine, mako na abale ako ene tinabwera pamaso pako mbatikulambira?”

¹¹Abale ache adaipirwa naye, mbwenye babache adakoya pyonsenepi mumtima mwache.

¹²Nsiku inango pikhadenda abale ache Yosefe kumzinda wa Shekemu kudyesa mabira a babawo,

¹³Yakobo adalonga kuna Yosefe mbati, “Ndinafuna kuti uende ku Shekemu kunadyesa abale ako mabira kule.” Yosefe adatawira mbati, “Ande, ndasasanyika.”

¹⁴Babacheyo adalonga mbati, “Ndoko ukaone ngakhala abale ako na mabira ene ali pyadidi. Ungamala ubwerere undipange.” Natenepo adamgwinya kubulukira m'phedi ya Hebroni. Yosefe adafika ku Shekemu,

¹⁵tenepo pidamuona munthu unango akutsalakatika m'minda, adamvunza mbati, “Unasakanji?”

¹⁶Iye adatawira mbati, “Ndikusaka abale anga akudyesa mabira ale. Kadi munakwanisa kundipangambo kuna iwo?”

¹⁷Munthu ule adatawira mbati, “Iwo abulukako kale kuno, mbwenye ndikhaava kulonga pyakwenda kuluwani ya Dotani.” Natenepo Yosefe adenda kuna abale ache mbaagumana ku Dotani.

¹⁸Abale ache adamuona na pakansinzo akudza, tenepo iye mbadzati fika, iwo adaverana pyakumpha.

¹⁹Iwo adalonga kuna unango na mwanzache mbati, “Nyandoto ule uyo anadzayo.

²⁰Tendeni timphe, mtembo wache tiuponye mumchera ubodzi wakusowa madzi. Tinakwanisa kalonga kuti adyiwa na pirombo pyam'tsanga. Tenepo tinati tione pinafuna chita ndoto zache.”

²¹Pidapiva Rubeni, adayesera kumpulumusa Yosefe m'manja mwawo mbalonga mbati, “Mbatilekeni kumpha.

²²Lekani chuchisa chiropa chache, mbwenye mponyeni kwene muchera m'thando yatchetcha muno mbamukhonda kumkuwaza.” Iye adalonga penepi na manyerezero akufuna kupulumusa Yosefe m'manja mwawo na kumbwezera kuna babache.

²³Pidafika Yosefe pana abale ache pale, iwo amdula mkhanjo ule, mkhanjo wakulapha wakukhala na mikono.[88]

²⁴Kubuluka penepo adamkwata mbamponya mumchera wakusowa madzi.

²⁵Pidakhala iwo pansi kudya, adakwiza maso awo mbaona gulu ya Aishimaele ikudza kubulukira ku Gileadi kwenda ku Iguputo. Ngamila zawo zidathukula mitolo ya pinthu pyakukomesa muliwo na pyakununkhira.

²⁶Yuda adalonga kuna abale ache mbati, “Ife tinaganyalinji tingampha mbaleathu, chiropa chache mbatichifikhira.

²⁷Tendeni timgulise kuna Aishimaelewa, towera tileke kumkuwaza, pontho weneyu ndi mbaleathu chadi-chadi; ndife manungo, pontho chiropa chibodzi.” Abale ache ale adatawirizana napyo.

²⁸Tenepo pidadza anyamalonda a Chimidiani chifupi, abale ache adambulusira Yosefe kunja kwa mchera mbamgulisa na kobiri zasiliva zakukwana makumawiri kuna Aishimaele. Iwo adamkwata mbaenda naye ku Iguputo.

²⁹Pidabwerera Rubeni kumchera kule, adasuzumira mbagumanamo kuti Yosefe nkhabemo, tenepo adang'amba nguwo zache, thangwi ya kupha mtima.

³⁰Iye adenda kuna abale ache mbalonga mbati, “Mphale ule nkhabemo! Apo ndinachita tani?”

³¹Natenepo iwo adapha mbuzi mbakwata mkhanjo wa Yosefewo mbaubizika m'chiropa cha mbuzi chile.

³²Iwo adakwata mkhanjo ule mbaenda nawo kuna babawo mbakalonga mbati, “Tagumana ichi. Ayi chenechi si cha mwananu tayu?”

³³Yakobo adachidzindikira mbalonga mbati, “Ande, ntchache. Pirombo pyam'tsanga pyamudya. Mwananga Yosefe amala gwanda mapindi-mapindi.”

³⁴Yakobo adang'amba nguwo zache mbavala masakha, thangwi iye akhamsintili mwanache ndzidzi ukulu ene.

³⁵Anache onsene achimuna na achikazi ene adamthondoza, kwache adakhonda kuthondozwa, mbalonga mbati, “Ine ndinati ndienda kudziko ya anyakufa[89] uku ndikusintili basi mwananga.” Natenepo adathimiza basi kumsintili mwanache Yosefe.

³⁶Tenepo mu Iguputo, Amidiani adamgulisa Yosefe kuna Potifara, ule akhali mbodzi wa mathubu a mfumu, pontho akhali mkadamu wa anyakuyang'anira nyumba ya mfumu.