Read cisena Kutoma 38 Bible Online

Kutoma 38 - cisena bible

Kutoma 38

¹Pandzidzi wenewo Yuda adasiya abale ache mbaenda kakhala na munthu unango dzinache Hira wa kuluwani ya Adulamu.

²Kweneko Yuda adagumanikana na mtsikana wa Chikanani, ule babache akhali Shua. Iye adamsemba mtsikanayo,

³mbabala naye mwana wamamuna dzinache Eri.

⁴Mkaziyo adakwata pontho mimba mbabala mwana wamamuna mbamthula Onani.

⁵Iye adabala pontho mwana wamamuna mbamthula Shela. Pikhabalwa mwanayo, Yuda akhakhala ku Kezibu.

⁶Yuda adamsembera mwanache wautombo Eri mkazi dzinache Tamara.

⁷Makhaliro a Eri akhali akuipa mwakuti MBUYA pidamkomere tayu. Natenepo MBUYA adampha.

⁸Tenepo Yuda adalonga kuna mwanache wachiwiri Onani, mphwache Eri mbati, “Ndoko ukampita panyumba mkazi nanako, pontho kachite pyonsene pyakufunika kuna iye ninga kunyadoako, towera mbaleako umbalire ana.”

⁹Mbwenye Onani adadziwa kuti anawo hanakhala ache tayu. Natenepo ndzidzi onsene ukhapita iye m'bonde na mamfelwa ule, mbewu yache akhaitayira pyache pansi, towera akhonde balira mbaleache ana.

¹⁰Pikhachita iyepyo, MBUYA hadakomere napyo tayu, natenepo iyembo adaphiwa na MBUYA.

¹¹Tenepo Yuda adalonga kuna mkwenyache Tamara mbati, “Banga ndoko kumusa kwa babako. Pontho leka kasembwa mpakana mwananga Shela akule.” Iye adalonga penepi, thangwi akhagopa kuti Shela anafambo ninga mudafera abale ache. Natenepo Tamara adenda kumusa kwawo.

¹²Pidagwanda ndzidzi ukulu ene mkazache Yuda adafa. Pidamala nsiku zakusintili mkazache, iye pabodzi pene na shamwaliache Hira wa ku Adulamu adenda ku Timina kukhachingwa mabirache kule.

¹³Munthu unango adampanga Tamara mbati, “Tebzalako akwenda ku Timina kachingisa mabirache.”

¹⁴Natenepo iye adakunundula nguwo za umamfelwa mbavala nguwo yakumpsampsika nayo nkhope mbakakhala pamsuwo wakupitira mu Enaimu, luwani ile ikhali m'khundu mwa njira yakwendera ku Timina. Iye adapidziwa kuti Shela akhadakula, mbwenye Yuda hadafune kumpereka Tamara kuna Shela kuti akhale mamunache tayu.

¹⁵Pidamuona Yuda, iye adanyerezera kuti akhali puta, thangwi akhadampsampsika nkhope yache.

¹⁶Na kukhonda dzindikira kuti iye akhali mkwenyache, iye adenda kuna iye m'khundu mwa njira mbalonga naye mbati, “Bwera, ndinafuna ndigone nawe.” Mkazi ule adavunza mbati, “Munandipasanji ndingagona namwe?”

¹⁷Iye adatawira mbati, “Ndinakutumizira mwana mbuzi pa pifuyo pyanga.” Mkazi ule adatawira mbati, “Ine ndinatawira ngakhala munandiphatirire pinyolo mpakana mumtumize mwana mbuziyo.”

¹⁸Iye adavunza mbati, “Pinyolo wache ngwanji anafuna iwe kuti ndiphatirire?” Mkaziyo adatawira mbati, “Ndinafuna chidindo na nkhambalache, pontho na mthondodzo unafamba na imwewo.” Iye adapipereka kuna mkaziyo. Tenepo iye adagona naye, mkaziyo mbakwata mimba.

¹⁹Tamara adenda kumusa kwache mbakunundula nguwo yakumpsampsika nayo kunkhope ile mbavala pontho nguwo zache za umamfelwa.

²⁰Yuda adatuma Hira shamwaliache na kamwana mbuzi kuna mkazi ule kuti akakwate pinthu pidapereka iye pinyolo kuna mkaziyo, mbwenye Hira hadamgumane mkaziyo tayu.

²¹Hira ule adavunza amuna anango akhakhala pa Enaimupo mbati, “Puta akhali m'khundu mwa njira muno ali kupi?” Iwo adatawira mbati, “Chipo pano nee padzati khala puta tayu.”

²²Iye adabwerera kuna Yuda mbalonga mbati, “Nee ndamgumanakobi. Amuna a penepo alonga kuti chipo nee padzati khala puta penepo tayu.”

²³Yuda adalonga mbati, “Mulekeni pyache akwate pinthupyo. Ife sinafuna kusekwa na anthu apanobi. Ine ndidayesa-yesa kuti ndimpagali, mbwenye iwe nee udamgumanabi.”

²⁴Pidagwanda miyezi mitatu, munthu unango adalonga kuna Yuda mbati, “Mkwenyako Tamara akuchita uputa, natenepo iye ana mimba pinalonga ifepi.” Yuda adalonga mbati, “Kambuluseni panja mbamumpise pamoto, towera afe.”

²⁵Pikhabuluswa iye panja, adatumiza mphangwa kuna tebzalache mbati, “Mimba ina ineyi ndapaswa na mwenechiro pinthu ipi.” Iye adathimiza kulonga mbati, “Piyang'anisiseni ngakhala munamdzindikira mwenechiro pinthu ipi: chidindo na nkhambalache, pontho na mthondodzo.”

²⁶Yuda adapidzindikira mbalonga mbati, “Iye ngwakulungama kupiringana ine. Ine ndapichimwana kumchitira pidalonga ine, thangwi ndidathema kumpasa mwananga wamamuna Shela kuti asembane naye.” Tenepo Yuda hadagoneve naye mkazi ule tayu.

²⁷Pidafika ndzidzi wache wakuti abale, pidadziwika kuti iye anati abale mapasa.

²⁸Pikhanenseka iye na mtswotswo wakubala, mwana mbodzi adabulusa mkono kunja, natenepo nyakumbazika adakwata kausalu kakufira mbammanga nako mumkono mwa mwanayo, mbalonga mbati, “Ushu ndiye adatoma kuona kunja.”

²⁹Mbwenye pidabwezera iye mkono wache m'bwalo mphwache adabalwa, tenepo nyakumbazika adalonga mbati, “Mwenemu ndiye mwagumanira iwe njira yakubulukira!” Natenepo iye adathulwa Perezi.[90]

³⁰Kubuluka penepo mbaleache ule akhali na usalu wakufira mumkono mwache adabalwa mbathulwa Zera.