Read cisena Kutoma 39 Bible Online

Kutoma 39 - cisena bible

Kutoma 39

¹Aishimaele akhadamkwata Yosefe kwenda naye ku Iguputo mbakamgulisa na Potifara, mbodzi wa mathubu a mfumu, ule akhali mkadamu wa anyakuyang'anira nyumba ya mfumu.

²MBUYA akhali na Yosefe mbachitisa pinthu pyache pyonsene kufamba mwadidi. Tenepo iye akhakhala m'nyumba ya mbuyache wa Chiiguputo ule.

³Pidaona mbuyacheyo kuti MBUYA akhali naye, pontho kuti MBUYA akhachitisa pyonsene pikhaphata iye kufamba mwadidi,

⁴Potifara adakomerwa naye mbamkwata kukhala nyakumfiliviri. Natenepo adamuikha kukhala nyakuyang'anira nyumbache yonsene na pyonsene pikhali na iye.

⁵Kutomera penepo kwenda m'tsogolo MBUYA adamtsanzayisa Muiguputo ule, na anthu onsene akhali na iye m'nyumba mwache, pontho na pinthu pyonsene pikhali na iye m'nyumba mwache na pya kumunda kwache kwene.

⁶Potifara adaikha pyonsene pikhali na iye m'manja mwa Yosefe, pontho iye hadaswipe mtima na chinthu na chibodzi chene tayu, kupambula pikhadya iye pene. Yosefe akhali mphale wakubalika pyakwanga, pontho akhali na manungo adidi.

⁷Tenepo pidagwanda ndzidzi ene, mkazi mbuyache adatoma kusirira Yosefe mbampanga kuti akapita naye m'bonde.

⁸Mbwenye Yosefe adakhonda mbampanga mkaziyo mbati, “Mbuyanga nkhabe swipa mtima na chinthu na chibodzi chene chili m'nyumbamu tayu, thangwi ine ndili pano. Iye andiikha kukhala nyakuyang'anira pyonsene pina iye.

⁹Ine ndina utongi onsene m'nyumba muno ninga una iye. Iye hadandikhondesa chinthu na chibodzi chene tayu kupambula imwepo. Apo ndinakwanisa tani kuchita chinthu chakuipa ninga chenechi, pontho na kudawira Mulungu?”

¹⁰Podi kwene kuti nsiku na nsiku mkazi akhampanga Yosefe kuti akapite naye m'bonde, Yosefe hakhatawira tayu.

¹¹Mbwenye nsiku inango, pidapita Yosefe m'nyumba kaphata basa, nkhabe mbodzi wa anyabasa a m'nyumbamo akhali penepo tayu.

¹²Mkaziyo adaphata mkhanjo wa Yosefe mbamkwekweta mbalonga mbati, “Tende tikapite m'bonde.” Mbwenye Yosefe adafukunyula mbathawira panja, tenepo adamsiyira mkhanjo uli kakaidwe m'manja mwa mkaziyo.

¹³Pidaona mkaziyo kuti Yosefe athawira panja mbasiya mkhanjo wache,

¹⁴iye adachemera anyabasache a m'nyumbamo mbalonga mbati, “Dzandionerenimbo pili kunopi. Mheberi adatidzesera mamunangayi akutilulupisa. Iye adapita kusubi kwanga kufuna kundiphatirira, mbwenye ine ndidakhuwa pyakwanga.

¹⁵Tenepo pidava iye kuti ndikukhuwa, adathawira panja mbasiya mkhanjo wache.”

¹⁶Mkaziyo adaukoya mkhanjo wa Yosefewo mpakana mbuyache Yosefe adabwerera.

¹⁷Tenepo iye adampanga mamunache pyonsene pidachitika pile mbati, “Bitchu wa Chiheberi adadza na imwe panoyi, adapita kusubi kwanga kundilulupisa.

¹⁸Mbwenye pidakhuwa ine, iye adathawira panja mbasiya mkhanjo wache.”

¹⁹Mbuyache Yosefe adazhangali napyo

²⁰mbatonga kuti Yosefe amangwe, pontho aponywe m'perezo mule mukhakoyiwa anyaperezo a mfumu. Tenepo iye adakhaladi mwenemo.

²¹Mbwenye MBUYA akhali na Yosefe mbamuonesa kumfuna kwache kokhonda mala, natenepo nyakuyang'anira perezo adakomerwa naye.

²²Iye adamuikha Yosefe kukhala nyapala wa anyaperezo anzache onsene, pontho adaikha m'manja mwache pinthu pyonsene pikhachitika mwenemopyo.

²³Nyakuyang'anira perezo ule hakhayang'anirave chinthu na chibodzi chene chikhali m'manja mwa Yosefe tayu, thangwi MBUYA akhali na Yosefe mbachitisa pinthu pyonsene pikhaphata iye kufamba mwadidi.