Read cisena Kutoma 4 Bible Online

Kutoma 4 - cisena bible

Kutoma 4

¹Tenepo Adamu adapita m'bonde na mkazache. Mkaziyo adakwata mimba mbabala mwana wamamuna. Iye adalonga mbati, “Na chiphedzo cha MBUYA ndatambira mwana wamamuna.” Natenepo mkaziyo mwanayo adamthula Kaini.[16]

²Kubuluka penepo adabala pontho mwana unango wamamuna dzinache Abele. Abele akhali makabuswa, Kaini akhali nyakulima.

³Pidagwanda ndzidzi ene, Kaini adadza na pinango pidavuna iye mbapipereka nsembe kuna MBUYA.

⁴Abele adadza na mwanabira mbodzi wakutoma kubalwa kubulukira pa mkumbi wache. Iye adampha mbapereka nsembe khundu zache zadidiletu kuna MBUYA. Tenepo MBUYA adakomerwa na Abele mbatambira nsembe yache.

⁵Mbwenye iye adakhonda Kaini na nsembe yache ene. Natenepo Kaini adazhangali pyakwanga mbaswirizwa napyo.

⁶Tenepo MBUYA adalonga kuna Kaini mbati, “Watani unazhangali? Watani unaswirizwa?

⁷Iwe mbudachita pinthu pyakulungama, ayi ine mbidakomerwa nawe[17] tayu? Mbwenye iwe ungakhonda kuchita pinthu pyakulungama, kudawa kwakunjunjira pamsuwo pako, kufuna kukuikha pansi pa utongi wache, tenepo iwe wathema kukundwa.”

⁸Tenepo Kaini adalonga kuna Abele mbaleache mbati, “Tende kumunda.”[18] Pikhali iwo kumunda kule Kaini adasandukira Abele mbaleache mbampha.

⁹MBUYA adamvunza Kaini mbati, “Mbaleako Abele ali kupi?” Iye adatawira mbati, “Sinakudziwa tayu kuna iye. Kadi ine ndine nyakuyang'anira mbaleanga?”

¹⁰Tenepo MBUYA adalonga mbati, “Thangwi ninji wachita chinthu chakugoswa ninga chenechi? Chiropa cha mbaleako chikundilirira kubulukira m'mataka.

¹¹Iwe chinchino ndiwe wakutembererwa, pontho hunalimave tayu pamataka, ale adafungula mulomo wache kutambira chiropa cha mbaleako kubulukira m'manja mwako.

¹²Ungayesa kulima, mataka hanabalisa chinthu na chibodzi chene tayu. Iwe unakhala manzenza, okhonda khazikika padziko yapansi.”

¹³Kaini adalonga kuna MBUYA mbati, “Kutchunyuswa kwanga nkhukulu mwakuti sinakwanisa kukupirira tayu.

¹⁴Lero imwe mukundithamangisa m'dziko muno, pontho ndabuluswa na pamaso panu pene mbandikhala manzenza, okhonda kukhazikika, tenepo munthu anandigumanayo anati andiphe.”

¹⁵Mbwenye MBUYA adatawira mbati, “Nkhabe tayu: ngakhala munthu anakupha anthu anomwe anaphiwa kubwezera kuphiwa kuchitwa iweko.” Natenepo MBUYA adaikha chidzindikiro pana Kaini kucheuza munthu onsene anagumanikana na Kaini kuti aleke kumpha.

¹⁶Tenepo Kaini adenda pyache kubuluka pamaso pa MBUYA mbakakhala m'dziko inango yakuchemerwa “Manzenza,” ile ili kumabulukiro dzuwa a Munda wa Edeni.

¹⁷Kaini adapita m'bonde na mkazache, tenepo mkazache adakwata mimba mbabala mwana wamamuna dzinache Enoki. Kaini adamanga mzinda mbaithula, Enoki, dzina ya mwanacheyo.

¹⁸Enoki adabala Iradi, Iradi adabala Mehujaele, Mehujaele adabala Metushaele, Metushaele adabala Lameki.

¹⁹Lameki akhali na akazi awiri, Ada na Zila.

²⁰Ada adabala Yabala, ule akhali kholo wa anthu akufuya pifuyo na akukhala m'makumbi ale.

²¹Mbaleache akhali Yubala, kholo wa anthu onsene akuimba anyakatangale na pitoliro.

²²Zila adabala Tubali-Kaini, kholo ya amisiri onsene akufula pida pyamtundu na mtundu[19] kubulukira kunkuwa na simbi. Nyamaingache Tubali-Kaini akhali Naama.

²³Lameki adalonga kuna akazache mbati, “Ada na Zila, ngavani kuno, ine ndapha mwana mphale unango, thangwi iye andimenya.

²⁴Ngakhala ndimodi kuti munthu anapha Kaini, anthu anomwe anaphiwa kubwezera kuphiwa kwacheko, tenepo munthu anafunambo kundiphayo, anthu makumanomwe na anomwe anaphiwa kubwezera kuphiwa kwangako.”

²⁵Adamu adapita m'bonde na Hava mbabala pontho mwana unango wamamuna. Hava adalonga mbati, “Mulungu andipasa mwana kupita m'mbuto ya Abele thangwi adaphiwa na Kaini.” Natenepo mwanayo adamthula Seti.[20]

²⁶Seti adabala mwana wamamuna mbamthula Enosi. Pandzidzi wenewo anthu adatoma kuphatisa basa dzina ya MBUYA kumpembedza.