Read cisena Kutoma 40 Bible Online

Kutoma 40 - cisena bible

Kutoma 40

¹Pidagwanda ndzidzi ene anyabasa awiri a mfumu wa ku Iguputo, nyakuperekera vinyu na nyakuphika mikate wamkulu, akhadapolomola kuna mfumu.

²Iye adaazhangalira pyakwanga awiriwa

³mbaaponya m'perezo, m'nyumba mwa mkadamu wa anyakulondali, pontho m'nyumba montho mukhakoyiwa Yosefe mule.

⁴Pidakhala iwo m'perezo ndzidzi ukulu ene, mkadamu wa anyakulondali adaikha Yosefe kukhala nyakuafiliviri.

⁵Mosiku unango m'perezomo, nyakuperekera vinyu na nyakuphika mikate wamkulu adalota. Tenepo ndoto zawo zikhalonga pyakusiyana.

⁶Na machibese mwache pidadza Yosefe kuna iwo, adaona kuti nkhope zawo zikhali zakugwa.

⁷Tenepo iye adaavunza mbati, “Lero mwatani munatsukwala tenepa?”

⁸Iwo adatawira mbati, “Tonsene wa ife mosiku talota ndoto zache. Tenepo nkhabe munthu pano wakutithumbusulira ndoto zenezi tayu.” Yosefe adalonga mbati, “Ndi Mulungu ene basi ambachitisa munthu kukwanisa kuthumbusula ndoto. Ndipangeni ndoto zanuzo.”

⁹Natenepo nyakuperekera vinyu ule adalonga mbati, “Ine ndoto zanga zikhali tenepa: ndidaona mfesa pamaso panga

¹⁰wakukhala na matsamvu matatu. Sindzidzi masamba nkhuphukira, maluwa adaoneka mbizibala nsapo zakutokota kale.

¹¹Ine ndikhali na khomitcho ya mfumu m'manja mwangamu; natenepo ndidakwata mfesa zile mbandizitchitchithira m'khomitcho ile, mbandiipereka kuna mfumu.”

¹²Yosefe adalonga mbati, “Ndoto zenezi zikulonga tenepa: matsamvu matatuwo akuimirira nsiku zitatu.

¹³Nsiku zitatu zinadzazi, mfumu anakusudzula kukulekerera, pontho anakubwezera pabasa ikhaphata iwe. Iwe unaperekera khomitcho kuna iye ninga mukhachitira iwe pakutoma pikhali iwe nyakumperekera vinyu.

¹⁴Kwache ine ndikupempha kuti ngakhala pinthu pinakufambira mwadidi kweneko, undikumbukembo, pontho undikomerembo mtima kundithula kuna mfumu, towera undiphedze kubuluka m'perezo muno.

¹⁵Thangwi ine ndidachita kukwatwa mwakukhakhamizwa kubulukira dziko ya Aheberi, podi na kuno kwene ine handidachite chinthu chakuthema kuikhwa nacho m'perezo tayu.”

¹⁶Pidaona nyakuphika mikate wamkulu ule kuti kuthumbusula kudachita Yosefe ndoto za nyakuperekera vinyu ule kukhali kwadidi, iye adalongambo kuna Yosefe mbati, “Ine ndikhadalotambo. Ndoto zanga zikhali tenepa: ndikhathukula pitundu pitatu pya mikate pamsolo pangapa.

¹⁷M'chitundu chapadzululetu mukhali mikate ya mtundu na mtundu kwenda nayo kapasa mfumu, mbwenye mbalame zikhadya mikate ya m'chitundumo.”

¹⁸Yosefe adatawira mbati, “Ndoto zenezi zikulonga tenepa: pitundu pitatupyo pikuimira nsiku zitatu.

¹⁹Nsiku zitatu zinadzazi mfumu anakubulusa m'perezo mbakugwanda msolo, tenepo anakwata manungo ako kuamanika pamuti, mbalamembo zinadya mnofu wako.”

²⁰Pidagwanda nsiku zitatu, pansiku yakukumbukira kubalwa kwa mfumu, mfumuyo adasasanyira mathubu ache onsene phwando; natenepo iye adabulusa m'perezo nyakuperekera vinyu na nyakuphika mikate wamkulu ule mbadza nawo pamaso pa mathubu ache.

²¹Nyakuperekera vinyu ule adambwezera pabasa ikhaphata iye pakutoma;

²²mbwenye nyakuphika mikate ule adammanikwa pamuti ninga montho mukhadalongera Yosefe, pikhaathumbusulira iye ndoto zawo.

²³Mbwenye nyakuperekera vinyu ule hadanyerezereve pya Yosefe tayu; adamduwalira pyache.