Read cisena Kutoma 41 Bible Online

Kutoma 41 - cisena bible

Kutoma 41

¹Pidagwanda pyaka piwiri, mfumu adalota. Tenepo ndoto zache zikhali tenepa: iye akhaimira chifupi na mkulo wa Nailo,

²pikhaona iye ng'ombe zikazi zinomwe zakubalika, pontho zakunenepa zikuluthuka m'madzi mbizitoma kudya mabande.

³Kubuluka penepo ng'ombe zinango zinomwe zokhonda balika, pontho zakuonda zidaluthukambo m'madzimo mbiziimira m'khundu mwa ng'ombe zinangozo m'khundu-khundu mwa mkulo ule.

⁴Tenepo ng'ombe zakuonda zidadya ng'ombe zakunenepa zile. Mfumu adatutumuka kuchitulo.

⁵Iye adagona pontho mbalota ngala zamapira zinomwe zakuvata, pontho zakudzala na maso zikhabuluka pamphesi ibodzi.

⁶Kubuluka penepo ngala zinango zinomwe zakutonzoneka thangwi zikhavulika na mphepo yakumabulukiro dzuwa zidabulukambo.

⁷Ngala zakuvata, pontho zakudzala na maso zile, zidadyiwa na ngala zakutonzoneka zile. Tenepo mfumu adatutmuka kuchitulo mbadzindikira kuti akhalota.

⁸Mangwana mwache na machibese mfumu ule adasanyika pyakwanga mumtima mwache; natenepo adachemeresa anyamatsenga onsene na anyanzeru onsene a mu Iguputo. Iye adaapanga anthuwo ndoto zache, mbwenye nkhabe na mbodzi ene adakwanisa kumthumbulusira.

⁹Tenepo nyakuperekera vinyu ule adalonga kuna mfumu mbati, “Lero ndathema kutawira kuti ndidachita chinthu chakuipa.

¹⁰Imwe mudatizhangalira ine pabodzi pene na nyakuphika mikate wamkulu, tenepo tonsene uwiriathu mudatiponya m'perezo m'nyumba ya mkadamu wa anyakulondali.

¹¹Mosiku unango tonsene wa ife tidalota ndoto zache, pontho ndotozo zikhalonga pyakusiyana.

¹²Mphale unango wa Chiheberi, nyabasache mkadamu wa anyakulondali ule tikhali naye kweneko. Ife tidampanga ndoto zathu, tenepo iye adatithumbusulira.

¹³Pinthu pidachitikadi ninga montho mudalongera iye. Ine mudandibwezera pabasa ikhali na ine pakutoma, mbwenye nyakuphika mikate wamkulu mudammanika pamuti.”

¹⁴Natenepo mfumu adachemeresa Yosefe. Kabodzi kene Yosefe adabuluswa m'perezo. Pidamala iye chingwa tsisi yache mbavala nguwo zinango adadza pamaso pa mfumu.

¹⁵Mfumu ule adalonga kuna Yosefe mbati, “Ine ndikhadalota ndoto, tenepo nkhabe munthu akukwanisa kundithumbusulira. Ine ndapangwa kuti iwe umbakwanisa kuthumbusula ndoto.”

¹⁶Yosefe adatawira mbati, “Ine nkhabe kwanisa kuzithumbusula, mbwenye Mulungu ndiye anapereka kuthumbusula kwadidi kuna imwe, Mfumu.”

¹⁷Mfumu ule adalonga mbati, “Ndoto zanga zikhali tenepa: ine ndikhaimira chifupi na mkulo wa Nailo,

¹⁸pikhaluthuka ng'ombe zikazi zinomwe zakubalika, pontho zakunenepa mumkulo mbizitoma kudya mabande.

¹⁹Kubuluka penepo ng'ombe zinango zinomwe zokhonda balika, pontho zakuonda zidaluthukambo mumkulo onthowo; ng'ombe zokhonda balika ninga tenepa chipo nee ndidzati ndaziona muno mu Iguputo tayu.

²⁰Ng'ombe zokhonda balika na zakuonda zile zidadya ng'ombe zakutoma zakubalika na zakunenepa zile.

²¹Mbwenye podi na pidamala izo kudya, nkhabe munthu mbadatawira tayu kuti izo zadyadi, thangwi izo zikhaoneka zakuonda basi ninga montho mwakale. Natenepo ndidatutumuka kuchitulo.

²²Ndidalota pontho tenepa: ndidaona ngala zamapira zinomwe zakuvata, pontho zakudzala na maso zikubuluka pamphesi ibodzi.

²³Kubuluka penepo ngala zinango zinomwe zakutonzoneka thangwi zikhadavulika na mphepo yakumabulukiro dzuwa zidabulukambo.

²⁴Ngala zakuvata, pontho zakudzala na maso zidadyiwa na ngala zakutonzoneka zile. Penepi ndidapilonga kuna anyamatsenganga, mbwenye nkhabe na mbodzi ene adakwanisa kundithumbusulira tayu.”

²⁵Yosefe adalonga kuna mfumu ule mbati, “Ndoto ziwiri za mfumu zikulonga chinthu chibodzi. Mulungu aonesa mfumu pile pinafuna iye kuchita.

²⁶Ng'ombe zikazi zinomwe zadidi zikuimira pyaka pinomwe, pontho ngala zamapira zinomwe zadidi zile zikuimira pyaka pinomwe. Ndoto zenezi zikulonga chinthu chibodzi chene.

²⁷Ng'ombe zikazi zinomwe zokhonda balika pontho zakuonda zidabuluka pakumalisira zile zikuimira pyaka pinomwe, pontho ngala zakutonzoneka zakuvulika, thangwi ya mphepo yakumabulukiro dzuwa zile zikuimira pyaka pinomwe pya njala.

²⁸Penepi pili ninga mwakupangirani ine, Mfumu, kuti Mulungu akuoneseni pinafuna iye kuchita.

²⁹Panakhala pyaka pinomwe pya utende m'dziko yonsene ino ya Iguputo.

³⁰Pingamala pyaka Penepyo, panakhala pyaka pinango pinomwe pya njala. Tenepo utende onsene muno mu Iguputo unaduwalika, thangwi njala inavunga dziko yonseneyi.

³¹Ndzidzi wa utende unaduwalikaletu thangwi njala inafuna kudzayo inakhala yakugoswa pyakwanga.

³²Ndoto zenezi zidaperekwa kuna mfumu m'njira ziwiri, thangwi pinthu penepi pyakhazikiswadi na Mulungu, pontho kuti iye anati apichite chinchino.”

³³Tenepo, Mfumu, sankhulani munthu wanzeru, pontho waudziwisi, pontho mumuikhe kukhala nyakuyang'anira dziko yonseneyi.

³⁴Imwe mwathema pontho kusankhula mathubu anango kuti asonkhese chachishanu chonsene papinthu pyavuna anthu pyaka pinomwe pya ndzidzi wa utende.

³⁵Muapange kuti asonkhese phoso konsene pandzidzi wa pyaka pya utende pinadzapi. Pontho phosoyo yathema kukoyiwa m'mizinda pansi pa utongi wa mfumu.

³⁶Tenepo phoso yeneyo inadyesa dziko pyaka pinomwe pya njala pinafuna kudza mu Iguputo, natenepo dziko hinanenseka na njala tayu.

³⁷Nzeru yeneyo idaoneka yadidi kuna mfumu na mathubu onsene.

³⁸Natenepo mfumu adaavunza mbati, “Ayi ife tinakwanisa kugumana munthu unango ninga weneyu; munthu wakuti ana Mzimu wa Mulungu?”

³⁹Tenepo mfumu adalonga kuna Yosefe mbati, “Podi Mulungu achitisa pinthu pyonsenepi kudziwika kuna iwe, nkhabe pontho munthu unango waudziwisi, pontho wanzeru ninga iwe tayu,

⁴⁰ine ndinakuikha kukhala mkadamu wa dziko yanga, pontho anthu anga onsene anavera matongero ako. Iwe unakhala wachiwiri wanga.”

⁴¹Natenepo mfumu adalonga kuna Yosefe mbati, “Ndikukuikha iwe kukhala mkulu wa boma wa dziko yonsene ya Iguputo.”

⁴²Tenepo adadula mphete yakukhala na chidindo chachifumu m'chala chache mbaivazika m'chala cha Yosefe. Adamvazika pontho mkhanjo wakuchena mwadidi mbamvazika mkufu wa golidi m'khosi mwache.

⁴³Iye adamkwizika pachingolo chachiwiri chachifumu, pontho anyakumuyang'anirache achilemedzo adakhuwa patsogolo pache mbati, “Pambukani! Pambukani!” Natenepo Yosefe adaikhwa kukhala mkulu wa boma wa dziko yonsene ya Iguputo.

⁴⁴Mfumu adalonga kuna Yosefe mbati, “Ine ndine mfumu, kwache nkhabe munthu na mbodzi ene muno mu Iguputo anachita chinthu na chibodzi chene, penu kwenda konsene kwene mwakukhonda tawiriswa na iwe tayu.”

⁴⁵Mfumu adamthula Yosefe dzina inango ya Chiiguputo yakuti Zefenati-Panea, mbampasa mkazi dzinache Asenati, mwana Potifera, nyansembe wa mumzinda wa Heliopolisi. Yosefe akhali pyaka makumatatu pyakubalwa pidatoma iye kutumikira mfumu wa ku Iguputo. Pidabuluka iye pamaso pa mfumu adafamba-famba dziko yonsene ya Iguputo.

⁴⁶

⁴⁷Pandzidzi wa pyaka pinomwe pya utende dziko idavunadi phoso izinji.

⁴⁸Yosefe adagumanyisa phoso yonsene idaphiwa pyaka pinomwe pya utende pile, mbakaikoya m'mizinda. Mumzinda onsene iye akhaikha phoso yakulimwa kubulukira m'minda ya kuzungulira mzindawo.

⁴⁹Yosefe adakoya phoso izinji pyakwanga. Kuinjipa kwache kukhali ninga tchetcha ya pagombe. Ikhali yakuinjipa pyakwanga mwakuti adaleka kuipima thangwi phosoyo ikhadapiringana pakupimika.

⁵⁰Pyaka pya njala mbipidzati fika, Yosefe adabala naye mkazache, Asenati, ana awiri achimuna.

⁵¹Iye adalonga mbati, “Mulungu adandichitisa kuduwalira nyatwa zanga zonsene, pontho na banja yonsene ya baba.” Natenepo mwana wautomboyo adamthula Manase.[91]

⁵²Iye adalonga pontho mbati, “Mulungu andipasa ana m'dziko ya nyatwa zanga.” Natenepo mwana wachiwiriyo adamthula Eferemu.[92]

⁵³Pyaka pinomwe pya utende pile pikhadatsanzaya na dziko ya Iguputo pikhadamala.

⁵⁴Tenepo pyaka pinomwe pya njala pidatoma ninga mukhadalongera Yosefe mule. Mukhali njala m'madziko anango onsene, mbwenye m'dziko yonsene ya Iguputo mukhali phoso.

⁵⁵Anthu a mu Iguputo pidatoma iwo gona na njala, adamulirira mfumu kuti aapase phoso. Natenepo iye adaapanga kuti aende kuna Yosefe pontho akachite pyonsene pinaapanga iye.

⁵⁶Njala idandendeya mbifalikira m'dziko monsene, natenepo Yosefe adafungula nyumba zonsene zakukoyeramo phoso mbagulisa phoso ile kuna anthu a mu Iguputo.

⁵⁷Anthu adadza ku Iguputo kubulukira kumadziko anango onsene kagula phoso kuna Yosefe, thangwi njala ikhadandendeya m'dziko yonsene yapansi.